काठमाडौं– च्याम्पियन्स लिगको सिजन २०२२–२३ को समूह चरणको ‘ड्र’ मा बार्सिलोना र बायर्न म्युनिख एउटै समूहमा परेलगत्तै बायर्न स्ट्राइकर थोमस मुलरले एउटा भिडिओ सन्देश पोस्टिए। आफ्ना पूर्वसहकर्मी रोबर्टो लेवान्डोस्कीको नाम लिँदै मुलरले भने, ‘फुटबल फ्यानहरुका लागि यो कस्तो राम्रो ड्र। मिस्टर लेवान्डोस्की, म्युनिखमा छिट्टै भेटौंला। आउनुहोस्, च्याम्पिन्स लिगको सिजन रक गरौं।’
मुलरले लेवान्डोस्कीलाई दिएको निम्तोको समय आइपुग्न अबको केही घण्टामात्रै बाँकी छ। च्याम्पियन्स लिगको दोस्रो खेलमा मंगलबार राति दुई युरोपियन ‘जायन्ट्स’ स्पेनिस महारथी बार्सिलोना र जर्मन लिग बुन्डेसलिगा च्याम्पियन बायर्न म्युनिख आमने–सामने हुँदैछन्। खेल नेपाली समय अनुसार राति १२:४५ बजे सुरु हुनेछ।
बार्सिलोनका प्रमुख प्रशिक्षक जाभी हर्नान्डेज आफ्नो टोलीलाई बायर्न म्युनिखको घरेलु मैदान एलियान्ज एरेना पुगिसकेका छन्। आज हुने बायर्नसँगको खेललाई लिएर बार्सिलोनको सिजन २०२२/२३ को वास्तविक परीक्षा हुने बताइएको छ। क्याटलान क्लब बार्सिलोनाले यस सिजनको च्याम्पियन्स लिगको पहिलो खेलमा भिक्टोरीया प्लानेजविरुद्ध ५–१ अन्तरले हराउँदै सुखद सुरुवात गरेको छ। उता बायर्नले पनि आफ्नो पहिलो खेलमा इटालियन ‘सिरी ए’ क्लब इन्टर मिलानलाई २–० गोल अन्तरले हराएर च्याम्पिन्स लिगमा आफ्नो दबादबालाई कायमै राखेको छ।
यसै सिजन बायर्नबाट बार्सिलोनमा आबद्ध भएका स्टार पोलिस स्ट्राइकर रोबर्ट लेवान्डोस्कीकै ह्याट्रिकमा बार्सिलोनाले च्याम्पियन्स लिगमा सानदार सुरुवात गरेको छ। च्याम्पियन्स लिगमा ह्याट्रिक गरेका उनै लेवान्डोस्की यतिबेला आफ्नो पूर्वक्लबविरुद्ध मैदानमा उत्रन जर्मन पुगिसकेका छन्।
च्याम्पियन्स लिगको बायर्नविरुद्धका अन्तिम चार खेलमा बार्सिलोना नराम्रोसँग पराजित भएको थियो। चार खेलमा १७ गोल खाएर बार्र्सिलोनाले खराब इतिहास बनाउँदा ४ गोल लेवान्डोस्कीले नै गरेका थिए। तिनै लेवान्डोस्की अहिले बार्सिलोनको मुख्य हतियार बनेर बायर्नलाई हराउने लक्ष्यसहित एलियान्ज एरेना पुगिसकेका छन्।
यता, प्रशिक्षक जुलियन नागेल्सम्यानको क्लब बायर्नले पनि बलियो मानिएको इन्टर मिलानलाई हराएर उच्च आत्मबल बनाएको छ। लेवान्डोस्कीलाई बेचेर प्रिमियर लिग क्लब लिभरपुलबाट साडिओ मानेलाई भित्र्याएको बायर्नले मानेबाट ठूलो आश गरेको थियो। मानेले बुन्डेसलिगामा ३ गोल गरिसकेका छन्।
गत सिजन युरोपियन च्याम्पियन्स लिगको समूह चरण नै पार गर्न नसकेपछि युरोपा लिग खेलेको बार्सिलोनामा अहिले धेरै उथलपुथल भइसकेको छ। प्रशिक्षक जाभी हर्नान्डेजले टिममा धेरै परिवर्तन गरिसकेका छन्। त्यसको सकारात्मक नतिजा देखिइसकेको भन्दै बार्सिलोना अहिले उच्च मनोबलमा छ।
यही हप्ता भएको ला–लिगाको खेलमा बार्सिलोनाले कार्डिजलाई ४–० ले हराएर गत सिजन भन्दा यो पटक बलियो भएको संकेत दिइसकेको छ। च्याम्पियन्स लिगको उद्घाटन खेल र ला–लिगामा गरेको उत्कृष्ट प्रर्दशनबाट उच्च मनोबलका साथ एलियान्ज एरिना पुगेको बार्सिलोनामाथि पुरानौ दबादबा राख्ने दाउमा बायर्न छ।
यता, च्याम्पियन्स लिगमा आफ्नो घरेलु मैदानमा बायर्नले बार्सिलोनासँग हारेको रेकर्ड अहिलेसम्म छैन। च्याम्पियन्स लिगमा बायर्नको घरेलु मैदानमा भएको ६ खेलमा ४ मा जित निकालेको बायर्न २ खेलमा बराबरीमा रोकिएको थियो।
यस सिजन भएका अन्तिम पाँच खेलका नतिजा हेर्ने हो भने बायर्न भन्दा बार्सिलोना राम्रो अवस्थामा देखिन्छ। अन्तिम पाँच खेलमा २ मा जित र ३ मा बराबरीमा बायर्न रोकिँदा बार्सिलोनाले १ मा बराबरी खेलेको छ भने चार खेलमा जित हात पारेको छ।
यो सिजन बार्सिलोना बलियो देखिएका कारण :
ठूला प्रतियोगितामा जाभीको रेकर्ड
जाभीले बार्सिलोनको प्रशिक्षकको जिम्मेवारी सम्हालेसँगै ठूलो म्याचमा उनलाई तुलनात्मक रुपमा सफलता मिलेको देखिन्छ। २०२१–२२ को मध्यबाट उनले बार्सिलोनाको प्रशिक्षक सम्हालेपछि रियल मड्रिडलाई ४–०, एथ्लेटिको मड्रिडलाई ४–२, नापोलीलाई ५–३ र सेभिल्लालाई १–० ले बार्सिलोनाले हराएको छ।
यसै सिजन पनि बार्सिलोनाले बलियो मानिएको सेभिल्लालाई ३–० ले हराएको छ। मैत्रीपूर्ण खेलमा प्रिमियर लिग च्याम्पियन म्यानचेस्टर सिटीसँग पनि ३–३ को बराबरी खेलेर बार्सिलोनाले आफूलाई बलियो रुपमा प्रस्तुत गरेको छ। जाभीले आफ्ना खेलाडीलाई आत्मबल/हौसला बढाउँदै खेल्न प्रेरित गरिरहेका छन्।
प्रसस्तै विकल्प
बार्सिलोनासँग अहिले प्रशस्त विकल्प हुँदा मुख्य खेलाडी केंग्ली कोमनबिनै बायर्न मैदान उत्रनुपर्ने अवस्था छ। मैदानमा उत्रने मात्रै होइन, बार्सिलानोको बेन्चमा रहने खेलाडी पनि त्यतिकै भरपर्दा छन्।
लेवान्डोस्की, डेम्बेले, राफिना मंगलबारको खेलमा जाभीको पहिलो रोजाइ बन्न सक्छन्। उनीहरु पहिलो रोजाइमा हुँदा फाती, फेर्रान टोरेस, मेम्फीस डिपाय जस्ता प्रभावशाली खेलाडीको विकल्प जाभीसँग हुनेछ। मिडफिल्डमा पनि सर्जिओ बुस्केट्स, पेड्री, गाभी, फ्रेंकी डिजोङ, फ्यांक केसेई जस्ता खेलाडी छन्।
लेवान्डोस्की फ्याक्टर
बायर्नमाथि बदला लिन बार्साको मुख्य फ्याक्टर भनेकै लेवान्डोस्की हुन्। बायर्नले च्याम्पियन्स लिगमा बार्सिलोनालाई दुई पटक ३–० गोलको अन्तरले हराउँदा बायर्नको अट्याकिङका मुख्य हतियार लेवान्डोस्की थिए।
तर, यो सिजन ठीक उल्टो छ, लेवान्डोस्की अहिले बायर्न छाडेर बार्सिलोना आइपुगेका छन्। बार्सिलोना आएका लेवान्डोस्की अहिले पनि उत्तिकै फर्ममा छन्। यस सिजनका ६ खेलमा उनले ९ गोल र २ असिस्ट गरिसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
