काठमाडौं– मिटरब्याजीविरुद्ध देशभरबाट २ हजार २ सय ८९ उजुरी परेको छ। प्रधानमन्त्रीको निर्देशनमा गत साउन २७ गते बनेको मिटरब्याजी अपराध नियन्त्रणका उपाय सिफारिस गर्न गठित कार्यदलले गृहमन्त्री समक्ष सोमबार बुझाएको प्रतिवेदनमा २ हजार २ सय ८९ उजुरी परेको उल्लेख गरिएको छ।
ती मध्ये ५९ वटा उजुरीको फरफारक भइसकेको कार्यदलले जनाएको छ। ७ वटा उजुरीमा छानबिन गरी अदालतमा मुद्दा दायर गरिएको छ। अन्य ७ वटामा प्रहरीद्वारा अनुसन्धान भइरहेको छ।
मिटरब्याजीविरुद्ध उजुरी दर्ता गर्ने कार्यलाई निरन्तरता दिँदै उजुरीउपर छानबिन गर्ने प्रक्रियालाई सम्बन्धित स्थानीय प्रशासनले तीव्रता दिएको उल्लेख गरिएको छ।
कार्यदलले मिति २०७९ भाद्र ८ देखि १२ गतेसम्म लुम्बिनी प्रदेशको नवलपरासी मधेश प्रदेशका सर्लाही, महोत्तरी, धनुषा, सप्तरी र सिरहा तथा प्रदेश नं. १ को मोरङ गरी ७ वटा जिल्लामा पुगी पीडितहरूसँग छलफल गरेको थियो।
एउटै व्यक्तिका विरुद्ध ४ वा सोभन्दा बढी उजुरी परेको पाइएको छ। उजुरीमा उल्लेख भएअनुसार आरोपितहरूको संख्या अहिलेसम्म ३३ रहेको र एकै व्यक्तिले २३ जनाविरुद्ध मिटरब्याजीको उजुरी दर्ता गरेको देखिएको छ।
कार्यदलले स्थानीय प्रशासनले प्राप्त उजुरीमा तत्काल छानबिन र कारबाहीमा निरन्तरता दिनुपर्ने शीर्षकअन्तर्गत ४ वटा, संघीय एकाईहरूको भूमिका र राजनीतिक प्रतिवद्धता शीर्षकमा ५ वटा, सरकारका वार्षिक नीति तथा कार्यक्रम अन्तर्गत २ वटा, कानूनी सचेतना र सुधारअन्तर्गत १० वटा एवं सचेतना साक्षरता र वित्तीय पहुँचअन्तर्गत ११ वटा गरी जम्मा ३२ बुँदामा आफ्नो सिफारिस गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769489968.png)
-1769487479.png)
-1764146706.png)
