कठमाडाैं- पाकिस्तानका तीव्र गतिका बलर शाहिन अफ्रिदीले एसिया कप गुमाउने भएका छन्। पाकिस्तान क्रिकेट बोर्ड (पीसीबी) ले एक विज्ञप्ति जारी गर्दै घुँडाको पछिल्लो स्क्यान र रिपोर्टलाई ध्यानमा राख्दै मेडिकल सल्लाहकार समितिले उनलाई ४–६ हप्ता आराम गर्न सल्लाह दिएको जानकारी दिएको छ।
गत महिना गालेमा श्रीलंकाविरुद्धको दोस्रो टेस्टमा शाहिनलाई चोटिल बनेका थिए। उनी नेदरल्यान्ड्स भ्रमणमा पाकिस्तानी टोलीको हिस्सा पनि थिए। तर, एउटा पनि एकदिवसीय खेल खेलेनन्। बाबर आजमले अगस्ट २७ बाट सुरु हुने एसिया कपका लागि फिट हुनका लागि शाहिनले कम्तिमा एक एकदिवसीय खेल खेल्ने बताएका थिए। उनको अनुपस्थितिले पाकिस्तानको एसिया कप जित्ने आशामा धक्का लागेको छ।
योसँगै उनी टी–२० विश्वकपका लागि पनि फिट हुनेमा शंका छ। यद्यपि, पीसीबीले टी–२० विश्वकपअघि न्यूजिल्यान्डमा हुने टी–२० सिरिजसम्म उनी फिट हुनेमा आशावादी रहेको बताएको छ। पछिल्लो टी–२० विश्वकपमा उनी पाकिस्तानका सबैभन्दा किफायती बलर थिए। उनले भारतविरुद्धको पहिलो खेलमा प्रारम्भिक विकेट लिँदै पाकिस्तानको जितमा महत्त्वपूर्ण योगदान पुर्याएका थिए।
पछिल्ला केही वर्षमा २२ वर्षीय शाहिन बाबरसँगै तीनवटै ढाँचामा पाकिस्तानका प्रमुख खेलाडीका रूपमा उभिएका छन्। उनले पाकिस्तानका लागि आराम नगरी धेरै खेल खेलेका छन् तर चोटका कारण बाहिरिएको यो पहिलोपटक हो। उनले ४० टी–२० अन्तर्राष्ट्रिय खेलमा ४७ विकेट लिएका छन् भने तीनवटै ढाँचामा कम्तिमा २५ खेल खेलेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772777462.png)
