काठमाडौं– ‘उहाँ (मुख्य प्रशिक्षक अब्दुल्लाह अल्मुताइरी) बुबाजस्तो हुनुहुन्छ। उहाँ भएसम्म हामी ढुक्क छौं। उहाँले कसलाई कता खेलाउने, नखेलाउने या खराब नतिजा निस्किए के गर्ने भन्ने जिम्मेवारी लिनुहुन्छ। हामी बेफिक्री भएर खेल्न पाएका छौं। प्रशिक्षक त यस्तो हुनुपर्छ !’ गत वर्ष असोजमा आयोजना भएको साफ च्याम्पियनसिपको तयारी गर्ने बेला कप्तान तथा गोल रक्षक किरण चेम्जोङ प्रशिक्षकको भूमिकालाई लिएर स्पष्ट थिए।
उनको यो भनाइ स्वभाविक थियो। नेपाली राष्ट्रिय टोलीमा कुवेती नागरिक अल्मुताइरीले प्रशिक्षकको भूमिकामा ‘इन्ट्री’ मारेपछि खेलाडीले मैदान बाहिर र भित्र हुनै अनावश्यक कुराको चिन्ता लिनु परेको थिएन। अल्मुताइरी नै खराब नतिजा आफ्नो पुर्पुरोमा लिन्थे। राम्रो नतिजा निस्किए खेलाडीको प्रशंसा गर्थे। केही विवाद आए आफैंलाई गाली गर्न अल्मुताइरीले खुला आह्वान गर्थे।
उनी आफ्नै मर्जीमा टिम बनाउँथे, अनुभवी खेलाडीलाई बाहिर राखेको भन्दै खुब गाली खान्थे। अनि वर्षौंदेखि बेञ्चमा रहेका र टोलीमा पर्न संघर्षरत रहेका खेलाडीलाई मैदान उतारेर आत्मविश्वास दिलाउथे।
यसले केही मात्रामा भए पनि राष्ट्रिय टोलीमा वर्षौंदेखि रहेको सिनियर खेलाडीको ‘सिन्डिकेट’लाई तोडेको थियो। ‘ए’ डिभिजन मात्रै होइन, ‘सी’ र ‘बी’ खेलिरहेका खेलाडीले पनि राष्ट्रिय टोलीको जर्सी एकदिन भए पनि लगाउने सपना बुनिसकेका थिए। उनीमाथि विश्वास गर्नुको कारण खेलाडीको प्रयोग नै थियो भन्दा फरक नपर्ला। अल्मुताइरी रहँदासमेत राष्ट्रिय टोलीमा पर्न न कसैको पावर लगाउनु पर्थ्यो न त कसैको भनसुन नै।
अल्मुताइरी भन्थे,‘हाम्रो खेलाडीसँग पर्याप्त प्रतिभा छ। तर, हामीले सदूपयोग गर्न सकेका छैनौं। केही राष्ट्रिय टोलीबाट खेलिरहेका खेलाडीलाई विदेशी क्लब लगेर खेलाउने हो भने टिम बलियो हुन्छ। म सकेसम्म यसका लागि पहल गर्छु।’
कतार फुटबल एसोसिएसनको सहयोगमा नेपाल आइपुगेका अल्मुताइरीबाट अखिल नेपाल फुटबल संघ (एन्फा)ले सुखद् नतिजा मात्रै होइन, खेलाडीको व्यक्तित्व विकासमा पनि सुधार गरिदियाेस् भन्ने चाहना राख्थ्यो। अल्मुताइरी कतारी राजपरिवारसँग प्रत्यक्ष सम्बन्ध राख्ने भएका कारण पनि उनी सुविधासम्पन्न स्थानमा लगेर फुटबलको प्रशिक्षण दिलाउन सक्ने र चोटपटक लागे उतै उपचार गरिदिने व्यवस्था मिलाउन सक्ने सामर्थ्य राख्थे। यता, कतारी र कुवेती क्लबसँगको राम्रो चिनजानका भएका उनले नेपाली फुटबल खेलाडीलाई पनि मौका दिलाउने प्रयास गरेका थिए।
ती भाग्यमानी खेलाडी थिए, फरवार्ड अञ्जन विष्ट र मिल्डफिल्डर तेज तामाङ। अल्मुताइरीले निकै विश्वास गरेर अञ्जन र तेजलाई कुवेती क्लबमा आबद्ध गर्ने प्रक्रिया अगाडि बढाएका थिए।
अल्मुताइरीसँग नजिक रहेका एन्फाका पदाधिकारीका अनुसार तेजलाई मासिक ७ र अञ्जनलाई ६ हजार अमेरिकी डलरमा अनुबन्ध गराउन प्रक्रिया अगाडि बढाइएको थियो। ‘कुवेतमा एसिया कपको छनोट खेल्न जाँदा त्यही कन्ट्रयाक्ट गराउने योजना थियो। तर, प्रक्रिया मिलेन र पछाडि धकेलियो,’ ती पदाधिकारीले नेपाल लाइभसँग भने।
अल्मुताइरी राष्ट्रिय टोलीमा नियुक्त भएर आएसँगै उनको नजर यी दुई खेलाडीमाथि गढेको थियो। वर्षौंदेखि राष्ट्रिय टोलीबाट खेल्दै आए पनि अञ्जनले सोचेअनुरूप प्रदर्शन गर्न सकेका थिएनन्। तर, अल्मुताइरीको आगमनसँगै उनको खेल्ने शैली परिवर्तन भयो। उनलाई अल्मुताइरीले नेपाली टोलीको मुख्य खेलाडीका रूपमा अघि सारे।
थप जिम्मेवारीलाई सम्हाल्दै अञ्जन आक्रामक भूमिका निर्वाह गर्दै आएका छन्। अञ्जनले हालसम्म राष्ट्रिय टोलीका लागि ७ गोल गरेका छन्। उनले अल्मुताइरी आएपछि मात्र १० खेलमा ५ गोल गरिसकेका छन्।
अञ्जन भन्थे, ‘विगतको तुलनामा प्रशिक्षक अल्मुताइरीको आगमनसँगै टोलीमा परिवर्तन आएको छ। पहिलाभन्दा अहिले खेल्ने शैली फेरिएको छ। नयाँ रणनीति भएकाले पनि विगतभन्दा फरक रूपमा प्रस्तुत भएका छौं। मुख्य कुरा भनेको हाम्रो नेपालमा फरवार्डले मात्र गोल हान्नुपर्छ भन्ने सोच छ। तर, अहिले प्रशिक्षकले जसले पनि गोल हान्न सक्छ भन्ने विश्वास गर्नुभएको छ।’
अञ्जनको मात्रै होइन, मिडफिल्डर तेजको पनि खेल्ने शैलीमा आकाश–पातालको फरक आएको थियो। २०७७ चैतमा त्रिपुरेश्वरस्थित दशरथ रंगशालामा आयोजना भएको ‘थ्री नेसन्स कप’मा उत्कृष्ट प्रदर्शन गरेका तेज त्यसपछि विश्वकप छनोटको टोलीमा भने अटाएका थिएनन्।
लगत्तै नेपाल सुपर लिग (एनएसएल) मा काठमाडौं रेजर्सलाई उपाधि दिलाउन महत्त्वपूर्ण भूमिका खेलेका तेज त्यस दौरान चोटग्रस्त बने। जसका कारण गतवर्ष जेठमा विश्वकप छनोटका ३ र इराकसँगको मैत्रीपूर्ण खेल गुमाए।
पछिल्लो पटक साफ च्याम्पियनसिपको तयारीका लागि घोषणा गरिएको टोलीमा भने तेज प्रारम्भिक छनोटमा परे। प्रशिक्षक अल्मुताइरीसँग पहिलो पटक प्रशिक्षण गरेका तेजले भारतविरूद्ध दुवै खेलमा सुरूआती रोजाइमा खेले। तेज नेपाली टोलीको केन्द्रमा पनि रहे। दुवै मैत्रीपूर्ण खेलमा नेपाली टोलीबाट उच्च प्रदर्शन गर्नेमा तेज नै चुनिए।
अल्मुताइरीले भारतविरूद्धको त्यस खेल र साफमा तेजलाई विगतमा खेलेकोभन्दा केही फरक भूमिकामा खेलाए। लामो समयदेखि रक्षात्मक मिडफिल्डको भूमिकामा रहेका तेजले त्यसपछि भने आक्रमण बन्दै ‘बक्स टू बक्स’ मिडफिल्डरको रूपमा खेल प्रदर्शन गर्दै आएका छन्।
यसअघि विशाल राईले खेल्दै आएको यस भूमिकामा तेज अब्बल ठहरिएका छन्। रक्षात्मक रूपमा निपूर्ण उनले मिडफिल्डमा ‘टर्न’ गर्दै विपक्षीबाट बल टाढा राख्न र चलाखीपूर्ण पास निकाल्न सक्छन्। उनीसँग अञ्जनजस्तै खेलको पूरै समय डटेर खेल्न सक्ने ‘स्टामिना’ भएको कारण पनि अल्मुताइरी प्रफुल्लित छन्।
विगतमा रक्षात्मक मिडफिल्डमा खेल्ने भएकाले तेजले पोस्टमा धेरै प्रहार गरेको देख्न पाइन्न थियो। नेपाल पुलिस क्लबबाट खेल्दा हेम तामाङ र निरकुमार राईसँग मिडफिल्ड साझेदारी बनाएका उनले क्लब स्तरमा भने केही प्रयास गर्थे। तर, अल्मुताइरीको प्रशिक्षणमा भने तेजले पोस्टमा लामो दूरीबाट प्रहार पनि गरे।
विक्रम लामा चोटका कारण बाहिर रहेपछि तेजले राष्ट्रिय टोलीमा मिडफिल्ड सम्हाल्ने अवसर पाएका थिए। सन् २०१८ को बंगबन्धु गोल्डकपमा ताजिकिस्तानविरूद्ध सुरूआती रोजाइमा रहेर पूरा समय खेलेका तेजले त्यसपछि प्यालेस्टाइनविरूद्ध पनि मिडफिल्ड सम्हाले। रोहित चन्द डिफेन्समा खेल्दा अल्मुताइरीले पुजन उपरकोटीलाई मिडफिल्डमा प्रयोग गरेका थिए। पुजनले उक्त पोजिसनमा राम्रो प्रदर्शन गरेपछि तेजले केही आक्रामक जिम्मेवारी पाएका थिए।
यसकारण छ अल्मुताइरीको नजर
गतवर्ष साफको फाइनलमा भारतसँग नेपाल पराजित भएसँगै कुवेत फर्किएका अल्मुताइरीले त्यसपछि पुन: एन्फासँग ४ वर्ष सम्झौता गरेका थिए। अहिले टोलीमा अधिकांश खेलाडी फिट नरहेको र प्राय: युवा अवस्थामा रहेको कारण नेपालले अन्तर्राष्ट्रिय स्तरमा कुनै टोलीलाई बलियो चुनौती दिन नसक्ने उनको बुझाइ छ। उनी पर्याप्त अन्तर्राष्ट्रिय मैत्रीपूर्ण खेल चाहन्छन्। यी खेलमा युवा खेलाडी उनको रोजाइमा पर्ने छन्।
उनले अहिले कुनै पनि प्रतियोगिताका लागि नेपाली टोलीलाई तयार पारिरहेका छैनन्। उनको लक्ष्य फिफा विश्वकप २०२६, एसियन कप २०२७ को छनोट र साफ च्याम्पियनसिप २०२३ छ। यी खेल अगाडि उनी अञ्जन र तेजलाई निखार्न चाहन्छन्। किनभने उनीहरूमाथि अल्मुताइरीको विश्वास बलियो छ।
‘यी दुई खेलाडी युवा अवस्थामा नै छन्। उनीहरू २०२६ सम्म पुग्दा २७/२८ को उमेरमा पुग्छन्। यसपछि मुस्किलले ४ वर्ष फुटबल खेल्न सक्छन्। यो टोलीको लागि नतिजा दिनुपर्ने उमेर हो। उनीहरूले अहिले मिहिनत गरेभने यो उमेरसम्म पुग्दा राम्रो नतिजा दिनसक्नेमा प्रशिक्षक अल्मुताइरी ढुक्क छन्। त्यसैले उनी यी दुई खेलाडीलाई तयार पार्न विदेशी क्लबबाट खेलाउन चाहन्थे,’ एन्फाका ती पदाधिकारीले भने।
तर, गत वैशाखमा एएएफसी एसिया कप छनोटको तयारीमा रहेका बेला उपकप्तान रोहित चन्दले प्रशिक्षक अल्मुताइरीसँग ‘विद्रोह’ गरे। यी दुई खेलाडी पनि चन्दको ‘विद्रोह’को सिकार भए। त्यसयता नेपाली टोलीबाट बाहिर रहेका अञ्जन र तेजलाई अल्मुताइरीले पुन: पत्याएका छन्।
अल्मुताइरीले बंगलादेशसँग तय भएको मैत्रीपूर्ण खेलमा ‘विद्रोह’ गरेका ११ सिनियर खेलाडीबाट उनीहरू दुईलाई मात्रै बोलाएका थिए। बाँकी ९ जनालाई भने अल्मुताइरी परिवर्तन चाहन्छन्। आफ्नो लक्ष्यअनुसार अगाडि बढ्ने कोसिस गरिरहेका अल्मुताइरी २०२६ सम्म सरदरमा २७/२८ उमेर भएको युवा टोली बनाउन चाहन्छन्।
अहिलेको अवस्थालाई हेर्ने हो भने मिडफिल्डर सुजल श्रेष्ठ ३० पुगिसकेका छन्। यता, अट्याकिङ मिडफिल्डर विशाल राईको उमेर पनि २९ पुगिसकेको छ। फरवार्ड लाइन सम्हालिरहेका अनन्त तामाङ र विमल घर्तीमगर समान २४ वर्षका छन् भने नवयुग श्रेष्ठ ३२ वर्ष पुगिसकेका छन्। यस्तै, सुमन लामा पनि २६ वर्ष पुगेका छन्।
२०२६ सम्म पुग्दा सुजल, विशाल, नवयुग र सुमनले कुनै चोट बोकेनन् भने पनि अल्मुताइरीको लक्ष्यअनुसार खेल्न अयोग्य हुनेछन्। त्यसैले अल्मुताइरी उनीहरूको विकल्प चाहन्छन्।
अहिले अल्मुताइरीको नजर अञ्जन र तेजमा मात्रै होइन, साफ यू–२० खेलेर नेपाल फर्किएका युवा खेलाडीमा पनि छ। उनी एन्फाले राजनीति गरेर नहटाएको खण्डमा भने यी युवा खेलाडीका साथ एक मिश्रित र बलियो टोली बनाउन चाहन्छन्।
तर, एन्फा विगतमा हालका अध्यक्ष पंकजविक्रम नेम्वाङसँग र खेलाडीसँग भएको टसलका कारण उनको विकल्प खोज्ने प्रयासमा छ। त्यसैले आगामी असोज दोस्रो साता बंगलादेशसँग घरेलु मैदानमा हुने मैत्रीपूर्ण खेलका लागि प्रदीप हुमागाईंलाई कार्यवाहक प्रशिक्षकमा नियुक्त गरेको छ।
यदि एन्फाले अल्मुताइरीको विकल्प खोजे निश्चय नै अञ्जन र तेज उनको योजनामा समावेश हुने छैनन्। तर, उनलाई नै निरन्तरता दिए आफूविरूद्ध गरेको ‘विद्रोह’ भुल्छन् कि भुल्दैन त्यो हेर्न रोचक हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1785910910.png)
-1764146706.png)
