काठमाडौं– जिल्ला प्रहरी परिसर काठमाडौंको जिम्मेवारी सम्हालेको करिब १ महिनापछि प्रहरी वरिष्ठ उपरीक्षक (एसएसपी) भरतबहादुर बोहराले गत मंगलबार (साउन १७ गते) सादा पोशाक (घुमुवा) को रुपमा सूचना संलकनमा खटिएका प्रहरी अधिकारीलाई प्रशिक्षण दिए।
परिसर काठमाडौंको हलमा काठमाडौंका सबै वृत्त, प्रभाग तथा सादा पोशाकमा खटिने प्रहरी अधिकारीलाई भेला परेर उनले प्रशिक्षण दिएका थिए।
सो क्रममा एसएसपी बोहराले रकम लेनदेन लगायत विभिन्न आर्थिक काण्डमा सादा पोशाकका प्रहरीले बेला–बेलामा मुछिएर विवादमा आउने गरेको भन्दै सबैलाई आचरण विपरितको काम नगर्न निर्देशन दिएका थिए।
‘प्रहरी अधिकारीले व्यवसायिक भएर काम गर्नुपर्ने र सूचना संकलन जस्तो महत्वपूर्ण जिम्मेवारीमा खटिएका सादा प्रहरीहरुमाथि पनि बेला बेलामा आचरण विपरित काम गर्ने गरेको भन्ने सूचनाहरु आउने गरेकाले व्यवसायिक भएर काम गर्नुस्’, एसएसपी बोहराले भनेका थिए,‘आचरण विपरित काम गर्नेलाई भने कारबाहीको भागिदार बनाइनेछ।’
प्रशिक्षण सकिएपछि उनीहरुलाई आचरण विपरितका काम गर्दिन र व्यवसायिक भएर काम गर्छु भन्दै कसमसमेत खुवाइएको थियो।
एसएसपीले आचरण विपरितको गतिविधि नगर्न भन्दै प्रशिक्षण दिएको बेला सुन्ने र आचरण विपरित काम नगर्ने भन्दै कसम खाने मध्येका एक थिए सादा पोशाकका प्रहरी, शिव सुनार। आचरण विपरित काम गर्दिन भनेर कसम खाएका उनै सुनार भोलिपल्टै अपहरण जस्तो जघन्य आरोपमा पक्राउ परेका छन्।
बर्दियाको राजापुर नगरपालिका–१० घर भएका २८ वर्षीय सुनार प्रहरी वृत्त बालाजुमा कार्यरत रही सादा पोशाकमा खटिँदै आएका थिए। उनै सुनार आचरण विपरित काम गर्दिन भनेर कसम खाएको भोलिपल्ट साउन १८ गते एक चिनियाँ नागरिकलाई अपहरण गरेको आरोपमा पक्राउ परे।
चिनियाँलाई अपहरण गरेको आरोपमा उनीसहित ६ जना पक्राउ परेका थिए। ती मध्ये दुईजना प्रहरी हुन्। न्यायाधीशका पर्सनल सेक्युरेटी अफिसर (पीएसओ) हवल्दार गोरखा आरुघाट गाउँपालिका–७ घर भइ काठमाडौं रानीबारी बस्दै आएका २७ वर्षीय कर्णबहादुर गुरुङ, गोरखाको सिरानचोक–५ घर भइ काठमाडौं धापासी बस्दै आएका २८ वर्षीय लक्ष्मण गुरुङ, सर्लाहीको लालबन्दी नगरपालिका–११ घर भइ काठमाडौं मित्रनगर बस्ने २८ वर्षीय रोहित भनिने पूर्णबहादुर पुलामी मगर, प्यूठानको प्यूठान नगरपालिका–८ घर भइ मित्रनगर नै बस्ने २८ वर्षीय विशाल मगर तथा नुवाकोटको शिवपुरी गाउँपालिका–६ घर भइ काठमाडौं बानियाँटार बस्ने २७ वर्षीय बिनोद केसी पनि पक्राउ परेका थिए।
यो समूहले काठमाडौं लाजिम्पाटबाट एक चिनियाँ नागरिक याङ याङलाई अपहरण गरेर बन्धक बनाउँदै एक करोड रुपैयाँ फिरौती माग गरेको थियो। अपहरणमा परेका चिनियाँलाई बुधबार राति १० बजे प्रहरीले उद्दार गरेको थियो।
३ वर्ष जेल बसेर फेरि अपहरण, उपनाम मात्रै ६ वटा
चिनियाँ नागरिक याङलाई अपहरण गरेको आरोपमा पक्राउ परेका मध्ये लक्ष्मण गुरुङ यसअघि पनि अपहरण घटनामा जेल परेको पाइएको छ। २०७१ सालमा नुवाकोट घर भइ काठमाडौं बस्दै आएका हिमालराज गिरी र पशुपतिदेवी पाण्डेलाई अपहरण गरेको आरोपमा लक्ष्मणविरुद्ध मुद्दा चलेको थियो।
त्यतिबेला उनी तीन वर्ष जेल बसेर छुटेको पाइएको छ। त्यतिबेला लक्ष्मणको समूहले पाण्डे र गिरीलाई फोन गर्दै आफू डन रहेको र मागेजति रकम नदिए अपहरण गर्ने भन्दै धम्की दिँदै फिरौती असुल गरेको पाइएपछि प्रहरीले उनलाई पक्राउ गरेको थियो। उक्त घटनामा उनी तीन वर्ष जेलसमेत बसेर छुटेको पाइएको छ।
उनै लक्ष्मणले पाँच वर्षपछि फेरि चिनियाँको अपहरण गरेको खुलेको छ। अपहरण घटनामा जेल बसेर छुट्दै फेरि अपहरण आरोपमा पक्राउ परेका लक्ष्मणको उपनाम मात्रै ६ वटा रहेको पनि खुलेको छ। लक्ष्मण आफ्नो परिचय गराउँदा भने अन्य विभिन्न नामबाट गराउने गर्थे। उमेश गुरुङ, सोनी गुरुङ, सुजन गोर्खे, सुदन गोर्खे, सुजन लामा र जोनी जस्ता उपनामले उनी चिनिने गरेको परिसरका एसपी तथा प्रवक्ता दिनेशराज मैनालीले बताए।
चिनियाँ विरुद्धको अपरेशनपछि मालामाल बन्ने पीएसओको दाउले पुर्यायो हिरासत
अनुसन्धानमा संलग्न प्रहरी अधिकारीका अनुसार अहिले अपहरणमा परेका चिनियाँ नागरिक याङले पनि नेपालमा कल सेन्टरको धन्दा चलाएको खुलेको छ। लाजिम्पाट, रानीबारी क्षेत्रमा अफिस खडा गरेर धन्दा चलाएका चिनियाँ नागरिक याङको बारेमा धेरै सूचना पीएसओ कर्णबहादुर गुरुङसँग थियो। रानीबारी मै बस्ने भएकाले अपहरणमा परेका चिनियाँ नागरिक याङको गतिविधिबारे कर्णबहादुर जानकार थिए।
तीनकुने र ठमेलमा चिनियाँ नागरिकले सञ्चालन गरेका कल सेन्टरमा प्रहरीले छापा हानेपछि याङले पनि सुरक्षित ठाउँ खोज्दै सामानहरु सारेको पीएसओ कर्णबहादुरले देखेको अनुसन्धानबाट खुलेको छ।
‘चिनियाँविरुद्ध प्रहरीले अपरेशन चलाएरपछि अवैध काम गरेका याङले पनि आफ्नो अफिस छाडेर अन्यत्र सामान सारेको पीएसओले देखेका रहेछन्। यही मौकामा प्रहरी हौं नत्र पक्राउ गर्छौ भन्दै धम्क्याइयो भने राम्रै दाम आउने लोभमा अपहरण गरेको देखियो’ एक अनुसन्धान अधिकारीले नेपाल लाइभलाई भने।
सोही अनुसार पीएसओ कर्णबहादुरले आफ्ना साथी तथा बालाजु वृत्तका घुमुवा शिव सुनारलाई योजना सुनाएको खुलेको छ। त्यसपछि शिवमार्फत् नै यसअघि समेत अपहरण घटनामा जेल बसिसकेका लक्ष्मणसहित ४ जना चिनियाँ अपहरण घटनामा जोडिएको खुलेको छ।
यो ६ जनाको समूहले सुरुमा चिनियाँ दोभाषे सूर्यबहादुर राईलाई नियन्त्रणमा लिएर कार्यालय सारेको ठाउँ देखाउन लगाएका थिए। सूर्यलाई नै लिएर चिनियाँको कोठामा पुगेका उनीहरुले घुमुवा शिवले ल्याएको हत्कडी लगाउँदै चिनियाँ नागरिक याङलाई अपहरण गरेको अनुसन्धानबाट खुलेको छ।
अपहरण गरेर काठमाडौं मित्रनगरस्थित न्यू स्वर्गद्वारी प्यूठान होटल एन्ड लजको कोठा नम्बर १०३ र १०४ मा चिनियाँलाई राखिएको थियो। त्यसपछि उनका साथीलाई फोन गरेर १ करोड फिरौती माग गरेपछि चिनियाँका साथीले प्रहरी वृत्त महाराजगञ्जमा उजुरी दिएपछि प्रहरीले अपरेशन गरेर ६ जनालाई पक्राउ गरेको थियो। उनीहरुमाथि जिल्ला प्रहरी परिसर काठमाडौंले अनुसन्धान गरिरहेको छ।
सम्बन्धित समाचार
चिनियाँ नागरिक अपहरण घटना : दुई प्रहरीसहित ६ जनालाई ५ दिन हिरासतमा राखेर अनुसन्धान गर्न अनुमति
लैनचौरबाट एक चिनियाँको अपहरण गरी एक करोड फिरौती माग, ६ नेपाली पक्राउ
चिनियाँ नागरिक अपहरण घटना : न्यायाधीशकै पीएसओको संलग्नताप्रहरीकै पेस्तोल ताक्दै काठमाडौंमा चिनियाँ नागरिकको अपहरण, घुमुवा र पिएसओसहित ६ जना सार्वजनिक
प्रहरीकै पेस्तोल ताक्दै काठमाडौंमा चिनियाँ नागरिकको अपहरण, घुमुवा र पिएसओसहित ६ जना सार्वजनिक
दोभाषेलाई नियन्त्रणमा लिएर अपहरण, ५० लाख लिन जाँदा ६ अपहरणकारीको हातमा लाग्यो हत्कडी
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
