काठमाडौं–अर्थमन्त्री जनार्दन शर्माले पदभार ग्रहण गर्दै प्रधानमन्त्री शेरबहादुर देउवा र सत्ता गठबन्धनका नेताहरुलाई धन्यवाद दिएका छन्।
संसदीय विशेष छानबिन समितिको छानबिनपछि २५ दिनपछि मन्त्रालयमा फर्किएका उनले अबको प्राथमिकता बजेट कार्यान्वयन हुने बताए। नेपालको अर्थतन्त्रलाई सुदृढ गर्दै बजेट कार्यान्वयनमा आफ्नो प्राथमिकता हुने उनको भनाइ थियो।
उनले प्रधानमन्त्री शेरबहादुर देउवा,माओवादी केन्द्रका अध्यक्ष पुष्पकमल दाहालसहित गठबन्धनका नेताहरुलाई धन्यवाद दिए। बजेट कार्यान्वयनको अवसर पाएको भन्दै उनले यसका लागि सत्ता गठबन्धनलाई धन्यवाद दिने बताए। शर्माले कहाँ– कहाँ कमिकमजोरी भए त्यसको उचित समीक्षा गर्दै बजेट कार्यान्वयन प्रभावकारी रुपमा लैजाने बताए। उनले तीन मुलभूत सिद्धान्तमा आधारित भएर बजेट निर्माण गरेको बताए।
यसअघि असार २२ गते उनले प्रतिनिधि सभालाई सम्वोधन गर्दै पदबाट राजीनामा दिएका थिए। राजीनामा दिएको २५ दिनपछि उनी पुनः मन्त्रालय फर्किएका हुन्।
बजेट निर्माणमा अनधिकृत व्यक्तिको प्रवेश सम्बन्धमा प्रतिनिधि सभाले उनीमाथि छानबिन गर्न ११ सदस्यीय संसदीय विशेष समिति निर्माण गरेको थियो। उक्त समितिले १७ दिनसम्म अध्ययन गर्दै प्रतिवेदन दिएको थियो। उक्त प्रतिवेदनमा प्रमुख प्रतिपक्षी नेकपा एमालेले भने फरक मत राखेको थियो।
बहुमतले शर्माले बजेट निर्माणका क्रममा अनधिकृत व्यक्ति प्रवेश गराएको पुष्टि हुन नसकेको भनेको थियो। उक्त प्रतिवेदन प्रतिनिधि सभामा पेश भएपछि प्रधानमन्त्री शेरबहादुर देउवाले आइतबार शर्मालाई सोही जिम्मेवारीमा फर्काएका हुन्। उनले राष्ट्रपति विद्यादेवी भण्डारीसँग सपथ लिँदै मन्त्रालयमा पदभार ग्रहण गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
