काठमाडौं– सरकारले देशको एकमात्र गुप्तचरी निकाय राष्ट्रिय अनुसन्धान विभाग (राअवि)मा अतिरिक्त मुख्य अनुसन्धान निर्देशक (एआईजी) को दरबन्दी थप गरेको छ।
विश्वस्त स्रोतका अनुसार गत सोमबार बसेको मन्त्रिपरिषद्को बैठकले १ जना एआईजीको दरबन्दी थप गर्ने निर्णय गरेको हो। मन्त्रिपरिषद्को उक्त निर्णयसँगै गुप्तचरमा अब दुई एआईजीको दरबन्दी हुने भएको छ।
आवश्यकताभन्दा पनि सत्ता गठबन्धनका दलहरुबीच भागबण्डा मिलाउनका लागि १ एआईजीको दरबन्दी थप गर्दै करिब ३ हजार जनशक्ति रहेको गुप्तचरमा एआईजीको संख्या २ पुर्याइएको छ।
गत वैशाख १० गते एआईजी यादव रेग्मी अवकाशमा गएपछि सरकारले राअविमा ३ महिनासम्म एआईजीको बढुवा नै नगरी राखेको थियो। साउन ३ गते अनिवार्य अवकाशमा जाने कूलदीप थापालाई सरकारले असार ३१ गते एआईजीमा बढुवा गरेको थियो। थापा बढुवा भएको ३ दिनमै अवकाशमा गएका थिए। त्यसपछि गुप्तचरमा १ एआईजीको दरबन्दी खाली थियो।
उक्त १ पदमा बढुवाका लागि हुतराज थापा मुख्य दाबेदार थिए। पहिलो नम्बरका थापासहित सँगै अनुसन्धान निर्देशक (डीआईजी) भएका दोस्रो नम्बरका ओम जोशी, हरिहर पौडेल र सुनिल ढकाल मुख्य दाबेदार मानिन्छन्। २०७४ भदौ १२ गते डीआईजी भएका उनीहरु एआईजीमा बढुवा नभएको अवस्थामा आगामी भदौ १२ गते डीआईजीको ५ वर्षे पदावधिका कारण अनिवार्य अवकाशमा जान्छन्।
जसकारण एआईजी बढुवा हुँदै सेवामा कायमै रहेर आगामी भदौ २३ गते मुख्य अनुसन्धान निर्देशक (आईजी) बन्ने बाटो खुल्ला गर्न उनीहरु तीव्र लबिइङमा लागेका छन्।
रोल्पा घर भएका पहिलो नम्बरका थापालाई जसरी पनि एआईजी बनाउनुपर्ने सत्तागठबन्धनको मुख्य घटक माओवादी केन्द्रले अडान राखेपछि आफू निकटका जोशीलाई समेत एआईजी बनाउने लक्ष्यसहित बालुवाटार (प्रधानमन्त्री शेरबहादुर देउवा तथा उनको सचिवालय)कै योजनामा १ एआईजीको दरबन्दी थप गरिएको जानकार स्रोतले नेपाल लाइभलाई जानकारी दियो।
हालका गुप्तचर प्रमुख यदुलाल खरेल आउँदो भदौ २३ गते अनिवार्य अवकाशमा जाँदैछन्। खरेल अवकाशमा गएपछि थापा, जोशी, पौडेल र ढकाल मध्येबाट एआईजी बनेका २ जनामध्ये १ जनाले गुप्तचर प्रमुखको कमाण्ड सम्हाल्ने अवसर पाउनेछन्।
राजनीतिक स्वार्थको कोपभाजनमा पर्दै आएको गुप्तचरलाई यसअघि गृह मन्त्रालय मातहतबाट गुप्तचरलाई प्रधानमन्त्री तथा मन्त्रिपरिषद्को कार्यालय मातहत लैजानदेखि दरबन्दी थपघट र घटुवा गर्नेसम्मका खेल यसअघि पनि भएका थिए।
१ जना मात्रै एआईजी दरबन्दी रहेको गुप्तचरमा २०७४ सालमा प्रधानमन्त्री शेरबहादुर देउवाकै सरकारले १ पद थपेर एआजईजीको दरबन्दी २ पुर्याउने निर्णय गरेको थियो। त्यतिबेला दरबन्दी थपेर देउवा सरकारले यादव प्रसाद रेग्मीलाई एआईजी बनाएको थियो। उनको प्रदेश समन्वय महाशाखामा पदस्थापन समेत गरिएको थियो।
एआईजी पद थपेर रेग्मीलाई बढुवा गरेलगत्तै देउवा सरकारबाट हटे। एमाले अध्यक्ष केपी शर्मा ओली प्रधानमन्त्री बने। देउवाले थपेको एक एआईजीको दरबन्दीमा ओलीले कैंची चलाए। कतिसम्म भयो भने देउवाले बढुवा गरेका रेग्मीलाई घटुवा गरेर ओली सरकारले डीआईजीमै झारेको थियो।
त्यसपछि आफूलाई अन्याय भएको भन्दै रेग्मी सर्वोच्च पुगेका थिए। सर्वोच्चले उनलाई एआईजीमै राख्नुपर्ने आदेश दिएपछि रेग्मीले पुनः एआईजी भएर काम गरे।
उनी सेवामा रहुन्जेलका लागि मात्रै २ एआईजी रहने र उनी अवकाशमा गएसँगै १ मात्रै एआईजी रहने निर्णय ओली सरकारले गरेको थियो। अहिले फेरि देउवा सरकारले १ एआईजीको दरबन्दी थप गर्दै गुप्तचरमा एआईजीको संख्या २ पुर्याएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
