सेती नदीमा आएको बाढीले बगाएको बझाङ सदरमुकाम चैनपुर जोड्ने सडक
काठमाडौं– अल्पकालीन 'ब्रेक'पछि नेपालमा मनसुन पुन: सक्रिय भएको छ। हाल मनसुनको न्यून चापीय रेखा सरदर स्थान (नर्मल पोजिसन)भन्दा केही उत्तरतिर अवस्थित रहेको जल तथा मौसम विज्ञान विभागले जनाएको छ।
देशका केही ठाउँमा मंगलबार साँझदेखि नै वर्षा सुरु भएको थियो। आज (बुधबार) पनि देशका अधिकांश ठाउँमा वर्षा भइरहेको तथा वर्षा हुने सम्भावना रहेको विभागले जनाएको छ। लुम्बिनी प्रदेशका केही ठाउँमा त अहिले भारी वर्षा भइरहेको विभागले जनाएको छ।
मंगलबारदेखि पुन: वर्षा सुरु भएसँगै सुदूरपश्चिम प्रदेशका पहाडी जिल्लामा पहिरोको प्रकोप बढेको छ। अविरल वर्षापछि आएको बाढीपहिरोले दार्चुला, बैतडी र बझाङका मुख्य राजमार्ग अवरुद्ध भएका हुन्। यस्तै, अन्य पहाडी जिल्लाहरु डडेलधुरा, डोटी, अछाम, बाजुरा र दार्चुलामा ग्रामिण सडकहरु अवरुद्ध भएका छन्।
वर्षासँगैको पहिरोले पृथ्वीराजमार्गअन्तर्गत तनहुँको याम्पा–आँबुखैरेनी सडकखण्ड अवरुद्ध भएको छ। मङ्गलबार राति परेको वर्षाका कारण बुधबार बिहान बन्दीपुर गाउँपालिका–५ याम्पास्थित सडकमा पहिरो खस्दा उक्त खण्ड अवरुद्ध भएको हो।
सडकमाथिबाट खसेको पहिराका कारण उक्त खण्ड दुईतर्फीरूपमा अवरुद्ध भएको जिल्ला प्रहरी कार्यालयका प्रहरी नायब उपरीक्षक युवराज खड्काले जानकारी दिए।
मंगलबार साँझदेखिको वर्षासँगैको बाढी–पहिराले लमजुङको डुम्रे–बेँसीसहर सडकखण्ड अवरुद्ध भएको छ। उक्त सडकअन्तर्गत बेँसीसहर नगरपालिका–१ उदिपुरको देउरालीडाँडा पहिराले सडक अवरुद्ध भएको हो।
वर्षका कारण आएको पहिरोले गण्डकी प्रदेशको गोरखामा २६ परिवार विस्थापित भएका छन्। आरुघाट गाउँपालिका– १, मान्वुको स्याम्चेत गत बिहीबारदेखि नै पहिरो जान थालेको थियो। बुधबारसम्म स्याम्चेत गाउँका २६ घरपरिवार विस्थापित भएका छन् भने दुई घरमा पूर्ण क्षति पुगेको स्थानीय प्रशासनले जनाएको छ।
आरुघाट गाउँपालिका– १, मान्वुको स्याम्चेतमा गएको पहिरो
भारी वर्षाका कारण लुम्बिनी प्रदेशका केही नदीमा जल सतह बढेको बाढी पूर्वानुमान महाशाखाले जनाएको छ। पछिल्लो ४ घण्टाको अवधिमा बाँकेको ढकेरी तथा खजुरा, बर्दियाको राम्बापुर, रानीजरूवा नर्सरी, गुलरीया र आसापस धेरै स्थानमा भारी बर्षा मापन भएको महाशाखाले जनाएको छ।
ती ठाउँमा थप वर्षा हुने सम्भाना भएकाले त्यहाँका साना तथा ठूला नदी, खोला र खहरेमा आकस्मिक बाढी आउने खतरा रहेको भन्दै सतर्क रहन महाशाखाले आग्रह गरेको छ।
बुधबार सुदूरपश्चिमका महाकाली र सेती नदी तथा यी नदीका सहायक नदीमा पानीको वहाव सतर्कताको तहनजिक पुग्ने बाढी पूर्वानुमान महाशाखाको अनुमान छ। यस्तै, पश्चिम राप्ती र बबइ नदीको तराई भएर बहने सहायक नदीहरूमा बहाव उल्लेख्य बढ्ने र आकस्मिक आहाव भइ सतर्कता पुग्न सक्ने सम्भावना रहेको महाशाखाले जनाएको छ।
लुम्बिनी प्रदेशका बाँके तथा बर्दिया र सुदूरपश्चिम प्रदेशका कैलाली र कञ्चनपुर भएर बहने साना नदीका तटीय क्षेत्रमा डुवान हुने सम्भावना रहेको पनि महाशाखाले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768291693.png)
-1764146706.png)
