काठमाडौं- बिरोध गर्न पाउने मौलिक मानवअधिकारलाई क्षयीकरण गर्ने राज्यहरूका व्यापक र तीव्र प्रयासहरूको सामना गर्न एम्नेस्टी इन्टरनेसनलले विश्वव्यापी अभियान सुरु गरेको छ। बिरोध गर्न पाउने अधिकारमाथि विश्वका सबै क्षेत्रहरूमा अभूतपूर्व र बढ्दो खतरा आएको उसको भनाइ छ।
रूस, श्रीलंका, फ्रान्स, सेनेगल, इरान र निकारागुवा लगायतका राज्यका अधिकारीहरूले संगठित असहमतिहरूलाई दबाउनका लागि फराकिलो दायराका विविध उपायहरू कार्यान्वयन गरिरहेको एमनेस्टीको भनाइ छ।
संसारभरका बिरोधकर्ताहरूले बिरोध गर्न पाउने अधिकारलाई सीमित गर्नका लागि ल्याइएका बढ्दो संख्याका कानुन र अन्य उपायहरूको प्रयोग, बलको दुरुपयोग, गैरकानुनी तवरमा गरिने सामूहिक र लक्षित निगरानीको विस्तार, इन्टरनेट सेवामा बन्देज र अनलाइन स्पेसमा नियन्त्रण तथा दुर्व्यवहार र लाञ्छना लगायतका कठोर, पश्चगामी र नकरात्मक दबाबको सामना पछिल्लो समय गर्नु परिरहेको एम्नेस्टीले जनाएको छ। यसैबीच सीमान्तकृत र विभेदमा पारिएका समूहहरूमाथि अझ थप प्रतिरोधहरू लादिएको उसको दाबी छ।
एम्नेस्टी इन्टरनेसनलको 'प्रोटेक्ट द प्रोटेस्ट' अर्थात् 'विरोधको संरक्षण गरौँ' अभियानले शान्तिपूर्ण बिरोधहरूमाथि हुने आक्रमणहरूलाई चुनौती दिने र राज्य संयन्त्रले दुर्व्यवहार र दमनका लागि लक्षित गरिएकाहरूसँगै उभिएर मानवअधिकारको अवस्थामा परिवर्तन ल्याउनका लागि भएका सामाजिक आन्दोलनहरूको उद्देश्यहरूलाई सहयोग गर्ने जनाएको छ। 'पछिल्ला वर्षहरूमा हामीले यो दशककै सबैभन्दा ठूला विरोध परिचालनहरू देखेका छौँ। ब्ल्याक लाइभ्ज् म्याटर,मिटु र जलवायु परिवर्तनसम्बन्धी आन्दोलनहरूले जातीय र जलवायु न्याय, समता र जीविकोपार्जन तथा लैंगिक हिंसा र विभेदको अन्त्यको माग गर्दै संसारका लाखौ मानिसहरूलाई सडक र अनलाइनमा विरोध गर्नका लागि अभिप्रेरित गर्यो। अन्यत्र प्रहरी हिंसा र हत्या, राज्यको दमन र उत्पीडनका विरुद्ध हजारौँको सङ्ख्यामा मनिसहरू एकजुट भएर जागेका छन्' एमनेस्टी इन्टरनेसनलकी महासचिव आग्नेस कालामारले भनेकी छन्।
जनविरोधको यो लहरलाई राज्य अधिकारीहरूले प्राय कुनै अपवाद बिना अवरोधजनक, दमनकारी र अक्सर हिंसात्मक तवरमा प्रतिकार गरेका थिए। विरोधको अधिकारलाई सहज बनाउनुको साटो सरकारहरू यसलाई अझ बढी बन्द गर्ने बाटो तर्फ लागेको देखिएको एम्नेस्टीले जनाएको।संसारको सबैभन्दा ठूलो मानवअधिकार संस्था भएको नाताले यही समयमा यस अभियानलाई सुरू गर्न लागिएको एम्नेस्टीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
