दाङ– गाउँमै योजनाको काम आएपछि लमही नगरपालिका–४ सेमरहजाकी कृष्णा चौधरीले केही रकम आउने आशले काम गरिन्। काम सम्पन्न भएपछि रम बुझ्नेबेला भने ठेकेदार भने फरार भए। अहिले उनी आफ्नो ४५ दिनको पारिश्रमिक माग गर्दै नगरपालिका कार्यालयमा धाउन बाध्य छिन्।
‘खेतमा बर्खे बाली लगाउनेबेला भएको छ। मल, बीउ किन्न छ। काम गरेको रकम आउला र किनौंला भन्ने सोचेकी थिए’, चौधरीले भनिन्, ‘काम सकिएपछि रकम दिनेबेला ठेकेदार नै भागे। त्यहि भएर रकम दिलाउन माग गर्दै नगरपालिका आएकी हुँ।’
यस्तै सोही वडाको घुम्नाकी पवित्रा चौधरीले पनि पक्की नाला निर्माण योजनाको काममा ठेकेदारलाई आफ्नो ट्रयाक्टर दिइन्। उनको ट्रयाक्टरले काम गरेको एक लाख ७५ हजार रुपैयाँ लिनुछ। तर, अहिले काम लगाउने ठेकेदार नै सम्पर्कविहीन छन्। सोही कारण कृष्णसँगै पवित्रा पनि आफ्नो रकम माग गर्दै नगरपालिका कार्यालयमा धर्ना दिन पुगिन्।
सेमरहवाकै विष्णु चौधरीको पनि १६ दिन काम गरेको रकम लिनुछ। काम सकेपछि अब त पारिश्रमिक पाइएला भन्ने आशमा रहेकी विष्णु ठेकेदार सम्पर्कविहीन भएपछि अन्यायमा परिन्। नगरपालिकाको योजना भएका कारण आफूहरुको पारिश्रमिक नगरपालिकाले नै दिलाइदिनुपर्ने उनको माग छ।
उनीहरुमात्रै होइन, यहाँका दर्जनौं महिलाले उक्त योजनामा काम गरेको पारिश्रमिक पाएका छैनन्। महिलाहरु काम गरेको पारिश्रमिक नपाएको उजुरी लिएर नगरपालिका पुगेपछि थाहा भयो, काम गराउने व्यक्ति पहिलो ठेकेदार रहेनछन्। उनी तेस्रो रहेछन्। मुख्य ठेकेदारले कामको जिम्मा लिएर पेटी ठेकेदारलाई दिएका थिए। दोस्रो ठेकेदारले पनि अर्को तेस्रो व्यक्तिलाई दिएर काम गर्न लगाएका रहेछन्।
वडा नम्बर ४ को सेमरहवामा पक्की नाला निर्माणका लागि आर्थिक वर्ष २०७७/०७८ का लागि लमही नगरपालिकाले ५५ लाख रुपैयाँ विनियोजन गरेको थियो। उक्त नाला निर्माणका लागि रामकृष्ण निर्माण सेवा कम्पनीले ठेक्का पायो।
सम्झौताअनुसार कम्पनीले एक हजार ५ सय मिटर पक्की नाला निर्माण गर्नुपर्ने थियो। समयमै काम सम्पन्न भएपछि नगरपालिकाले भुक्तान पनि गरिसकेको छ। तर, अहिले काम लगाउने व्यक्ति नै फरार भएपछि उक्त नाला निर्माणमा काम गरेका सबै ज्यामीले पारिश्रमिक पाएका छैनन्।
ठेक्का पाएको रामकृष्ण निर्माण सेवा कम्पनीले उक्त काम दाङको दूधरासका सोभाराम कँवरलाई दियो। कँवरले पनि उक्त काम नगरेर तेस्रो पेटी ठेकेदार सल्यानका नवीन थापालाई दिए। थापाले पनि आधा काम गरेर छाडे। त्यसपछि सभोराम आफैंले उक्त काम पूरा गराए।
अहिले रकम दिनेबेला भने थापा र कँवर दुवै जना सम्पर्कविहीन बनेका छन्। सोही कारण महिलाहरु आफ्नो पारिश्रमिक माग गर्दै नगरपालिकाको कार्यालयमा धर्ना दिन पुगेका हुन्।
नगरपालिकाका इन्जिनियर सौगात ओलीका अनुसार कम्पनीले काम सम्पन्न गरेको सबै प्रमाण पेस गरेका कारण नगरपालिकाले सबै भुक्तानी दिइसकेको बताए। उक्त कामका लागि ५० जना महिला लगाइएको थियो। तर, त्यसैमा पनि फरक–फरक ज्याला तोकिएको पीडित महिलाहरुको गुनासो छ। कसैलाई केही रकम दिइएको छ भने कसैलाई अहिलेसम्म काम गरेको एक रुपैयाँ पनि दिइएको छैन।
यता कम्पनीका प्रतिनिधि गिरिराज न्यौपानेका अनुसार कम्पनीले मौखिक सहमति गरेर सोभाराम कुँवरलाई उक्त काम दिइएको थियो। यता सभोरामले काम सम्पन्न भएपछि कम्पनीसँग सबै रकम लिइसकेका छन्।
कामदारले रकम नपाएको भन्ने गुसोना गरेको भन्दै न्यौपानेले आफूहरुले सोभारामलाई सबै भुक्तान गरिसकेकाले कामदारको रकम पनि उनले नै दिनुपर्ने बताए। सोभारामले कामको जिम्मा दिएका पेटी ठेकेदार नवीन थापा काम बीचमै छाडेर भागेका थिए। त्यसपछि भने सोभाराम आफैंले नौ महिना लगाएर काम सम्पन्न गराएका थिए।
गत बिहीबार रकम माग्दै नगरपालिका पुगेका महिलाहरुलाई कम्पनीका प्रतिनिधि गिरिराज न्यौपानेले सोभारामलाई उपस्थित गराएर पारिश्रमिक दिलाउने आश्वासन दिएका छन्। तर, महिलाहरुले भने नगरपालिकासँग मुख्य ठेकेदारबाटै भए पनि आफ्नो पारिश्रमिक उठाइदिन माग गरेका छन्।
यता लमही नगरपालिकाका न्यायिक समिति सदस्य केशवकुमार अधिकारीका अनुसार रामकृष्ण निर्माण कम्पनीका मुख्य ठेकेदार नगरपालिकाको सम्पर्कमै रहेका छन्। मुख्य ठेकेदार र अन्य दुवै पेटी ठेकेदारलाई बोलाएर छलफल गर्ने र समस्या समाधान गर्ने अधिकारीले बताएका छन्।
यस विषयमा सोभाराम कँवरलाई सम्पर्क गर्न खोज्दा उनीसँग सम्पर्क हुनसकेन। अहिले मुख्य ठेकेदारले आफूबाट पनि सोभारामले रकम लगिसकेको र उनैले दिने भनेपछि महिलाहरु कोसँग पारिश्रमिक माग्ने भन्ने विषयमा अन्योलमा छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791984972.png)
-1786602170.png)
