दाङ- लमही नगरपालिका वडा नम्बर ४ भैस्कोर्मा निवासी रामलाल चौधरी तरकारी व्यापारी हुन्। उनी प्रत्येक दिन घोराही तुलसीपुरसम्म पुगेर तरकारी बिक्री गरेर घर फर्किन्छन्।
बिहान चार बजे उठेर लमही, घोराही हुँदै तुलसीपुर सम्मका तरकारी पसलेलाई तरकारी छोड्न पुग्नु पर्ने दैनिकी थियो उनको।
केहि दिन अघि मोटरसाइकलमा तरकारी बोकेर लमहीबाट घोराही जाँदै गर्दा लमही घोराही सडक खण्डमा परेको ठूलो खाडलमा परेर उनलाई गहिरो चोट लाग्यो। उनी सवार मोटरसाइकल खाडलमा परेर पल्टिँदा दाहिने खुट्टाको हड्डी फ्याक्चर भएको छ। अहिले उनी घरमा आराम गरिरहेका छन्। रामलाल जस्तै दुर्घटनामा पर्ने घाइते हुनेको संख्या धेरै छ भने कतिको ज्यानै जाने गरेको छ।
केहि वर्ष अघि नेकपा एमाले प्रदेश सभा सांसद उत्तरकुमार ओली पनि यहि सडक खण्डमा दुर्घटनामा परेर ज्यान गुमाएका थिए। ओली पछि एमाले सचेतक शान्ता चौधरी सवार रहेको सरकारी गाडी सडक किनार देखि पाँच सय मिटर तल खोलामा खसेर दुर्घटना भएको थियो तर उक्त समय गाडीमा चालक मात्र थिए।
लमही – घोराही हुँदै तुलसीपुर पुग्ने र तुलसीपुरबाट सुर्खेत निस्किने यो सडक अत्यन्तै जीर्ण अवस्थामा पुग्दा समेत निर्माण तथा मर्मत कार्यमा राज्यले ढिलाइ गरिरहेको छ। घोराही तुलसीपुर सडक खण्डमा सडक निर्माण गर्दा बनाएको खाल्डोमा परेर एक जनाले ज्यान गुमाएका थिए। यस्ता घटना जिल्लाभरि धेरै भएका छन्। राज्यले यस्ता घटनालाई सामान्य रुपले लिएको स्थानीयको गुनासो छ। उक्त सडक खण्डमा प्राय: दुर्घटनाका घटना भइरहेका हुन्छन्।
गत आर्थिक वर्ष २०७७/७८ मा मात्र लमही घोराही सडक खण्डमा एक दर्जन बढी सवारी साधन दुर्घटनामा परेका छन्। सोहि आर्थिक वर्षमा ठेकेदारले समयमा पुल निर्माण नगर्दा लमहीदेखि घोराही जाँदै गरेको कार दाङको सिस्ने खोला तर्दै गर्दा खोलाले बगाएर चार जनाको घटनास्थलमै मृत्यु भएको थियो। उक्त पुल अझै सम्म निर्माण सम्पन्न भएको छैन।
केन्द्र र प्रदेशको मन्त्री मण्डलमा दाङबाट पनि मन्त्री हुनेको कमी छैन तर सडकको अवस्था सुधारमा कसैको ध्यान पुग्न सकेको छैन। लुम्बिनी प्रदेशका मुख्यमन्त्रीले पनि लमही घोराही सडक निर्माण गर्ने आफ्नो बिशेष पहल रहने उद्घोष गरेका थिए। तर उनको आश्वासन पनि पूरा हुन सकेको छैन।
सडक जीर्ण हुँदा दुर्घटना बढ्यो – जिल्ला ट्राफिक प्रमुख परियार
बाटो साँघुरो हुनु र सडकमा ठूला-ठूला खाल्डा खुल्डी हुनु नै दुर्घटनाको मुख्य कारण भएको जिल्ला ट्राफिक प्रमुख प्रहरी निरीक्षक झविन्द्र परियारले बताए। 'दिनप्रतिदिन सवारी साधनको चाप उतिक्कै बढ्दो छ, एकले अर्कालाई उछुन्नेर अगाडी जानु परेको छ, अझ त्यसैमाथि भनौं भने सडकको दुरदशा यस्तो छ, त्यहि भएर पनि दिनहुँ जसो दुर्घटनाहरु भैरहेका छन्'
परियारले भने। दाङको कुनै पनि स्थानमा सडक सुरक्षित भएको देखिएन। अघिल्लो आर्थिक वर्षको तुलनामा यो वर्ष दुर्घटना बढेको ट्राफिक प्रहरीले दिएको तथ्यांकले देखाउँछ।
'पश्चिम दाङ तिर पनि सडक बिग्रेको छ, कतै भैंसी आहाल बस्ने जस्ता खाल्डा छन् कतै कालोपत्रे उप्किएर खाल्डो पर्ने र पानी जम्मा हुने समस्या पारेको छ' प्रमुख परियार भन्छन्।
देउखुरीको राप्ती पारि पनि सडक निर्माण भइरहेकको सडक निर्माणका लागि सडकमै राखेका सामाग्रीले पनि दुर्घटना निम्त्याएको उनले बताए । ट्राफिक प्रहरीका अनुसार दुर्घटनाको उच्च जोखिम क्षेत्र लमही– घोराही सडक हो।
६ महिनाको अवधिमा २७ प्रतिशत काम – सडक डिभिजन दाङ
लमहीदेखि तुलसीपुर सम्मको सडक निर्माण गर्ने भनेर जिम्मा पाएका निर्माण सेवा कम्पनीले काम नगरे पछि सडक निर्माणको काम ढिला भएको सडक डिभिजन कार्यालय दाङका इञ्जिनिएर अमिर सुबेदीले जानकारी दिए । 'यो रुटको बाटो पूरै ध्वस्त हुन लाग्दासमेत काम गर्ने जिम्मा पाएका निर्माण सेवा कम्पनीले तदारुकता नदेखाएपछि सडक डिभिजन आफैंले अग्रसरता देखाएको हो' सुबेदीले भने। निर्माण सेवा कम्पनीले निर्माण कार्यबाट हात झिकेपछि सडक डिभिजन कार्यालय दाङले केन्द्रमा जानकारी गराएको इन्जिनिएर सुबेदीको भनाइ छ। अहिले विभागले लमही तुलसीपुर सडक निर्माणको योजनालाई टुक्र्याएर दुईवटा बनाइ काम सुरु गरिरहेको छ।
लमहीदेखि दाङको कुइरेपानीसम्म सडक डिभिजन कार्यालय दाङ आफैंले काम गरिरहेको छ भने कुइरेपानी देखि तुलसीपुर सम्म अर्को आयोजनाले काम गरिरहेको कार्यालय जनाएको छ। कार्यालय आफैंले काम गरिरहेको क्षेत्रमा ६ महिनाको अवधिमा करिब सत्ताइ प्रतिशत काम भएको जनाएको छ। आज सम्म काम सम्पन्न भैसकेको हुनु पर्ने हो तर सुरुमा काम गर्ने जिम्मा पाएका लक्ष्मीपूजा निर्माण सेवा प्रालि र रोयल विल्डर्सले काम नगर्दा ढिला भएको कार्यालयका इञ्जिनिएर सुबेदीले स्वीकार गरे।
निर्माण व्यवसायीका कारण काममा ढिलाइ भयो – आयोजना प्रमुख
दाङको बबईदेखि तुलसीपुर बजारसम्म सडक फराकिलो र कालोपत्रे गर्ने जिम्मा पाएको भालुवांग – बाग्दुला भिमगीट्ठे –चनौटा – कृष्णनगर लमही घोराही –तुलसीपुर सडक आयोजनाले हाल सम्म बाह्र प्रतिशत मात्र काम गरेको आयोजना प्रमुख प्रमुख अर्जुन बमले जानकारी दिए। निर्माण व्यवसायीले कुनै न कुनै बहानाबाजी गरेर काममा ढिलाई गरिदिँदा समयमै काम हुन नसकेको उनले दाबी छ।
'यो योजनाको काम २०७५ सालमा सुरु भएको थियो। काम सुरु गरेको केहि समयपछि कोरोनाले काम रोकियो, कामदारले काम गर्न मानेनन्। कोरोनाले थिला थिला परेको अर्थ व्यवस्था धरासायी भएका बेला निर्माण कार्यले पनि गति पाउन सकेन' प्रमुख बमले भने। कोराना कहरले ध्वस्त बनाएको बेला फेरी महंगी, तेलको मूल्य बढ्नु यो कामको लागि अभिषाप नै बनेको आयोजनाको ठहर छ।
बिभिन्न समस्याले गर्दा तीस महिना लगाएर पनि काम सम्पन्न गर्न नसकेपछि म्याद थप गरिएको उनको भनाइ छ। आयोजनाले बबई देखि तुलसीपुर बजार सम्म २८ किलोमिटर सडक फराकिलो र कालोपत्रे गर्नु पर्ने छ। त्यस मध्ये १४ किलो मिटर दुई लेन र बाँकी फोरलेनको काम गर्नु पर्ने उनको भनाइ छ। एक अर्ब २२ करोडको यो योजना अबको चौध महिनामा सम्पन्न गर्ने गरि काम भैरहेको आयोजना प्रमुख बमले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775455666-1775459306.jpeg)
-1764146706.png)
