फुटपाथ हो कि धराप? [फोटोफिचर]

फिचर

मनिष अर्याल शुक्रबार, असार ३१, २०७९ १४:४४

काठमाडौं– सडकमा हिँड्दा गाडीले ठक्कर देला भन्ने डर! फुटपाथमा हिँड्ने ठाउँ छैन। फुटपाथ नाम मात्रका छन्।

पैदल यात्रीले हिँड्ने फुटपाथ बिजुलीका पोल, पसलका सामान र विभिन्न संरचनाले भरिएका छन्।

सडक छेउमा निर्माण हुने संरचनाका लागि पनि फुटपाथमै गिट्टी, डुङ्गा र डन्डी राखिन्छ। कतिपय ठाउँमा फुटपाथलाई पार्किङ बनाइएको हुन्छ।

सरकारले नै निर्माण गरिरहेका संरचनाका कारण फुटपाथ भत्किएको वर्षौं भइसकेको हुन्छ, तर बनाउन कसैको ध्यान जाँदैन।

संघीय राजधानी भएपनि काठमाडौं उपत्यकाका सडक छेउका फुटपाथ मान्छे हिँड्न लायक छैनन्। फुटपाथ बनाउन भनेर करोडौं खर्छ पनि हुन्छ। तर, बनेको २ महिना पनि नपुग्दै भत्किहाल्छन्।

काठमाडौंको माइतीघरदेखि देशको प्रमुख प्रशासकीय केन्द्र सिंहरबारतिर लाग्दा देखिने फुटपाथको दृश्यले नै राज्यलाई गिज्याइरहेको हुन्छ। सरकारी संरचना निर्माणका लागि फुटपाथ भत्काइएको छ।

नेपाल विद्युत् प्राधिकरणले बिजुलीका तार भूमिगत गर्ने भनेर धेरै ठाउँमा फुटपाथ खनेको छ। तर, ती फुटपाथ पूर्ववत् अवस्थामा फर्केनन्। कतिपय ठाउँमा विद्युत् प्राधिकरणले फुटपाथ नै कब्जा गरेर आफ्ना संरचना राखेको छ।

बिजुलीका पोल पनि फुटपाथमै छन्। ढल्ने अवस्थामा रहेका पोलबाट लत्रिने तारले पनि पैदल यात्रीलाई समस्या पारिरहेको हुन्छ।