काठमाडौं– असार १३ गते राति करिब ८ बजेतिर कोटेश्वरमा सडक पेटीमा हिँड्दै गरेका ५२ वर्षीय देवकुमार सेनलाई गाडीले ठक्कर दियो।
प्रदेश २–००६ख ०२९५ नम्बरको ट्रक र बा२ख १२३१ नम्बर माइक्रोबस ठोक्किएर दुर्घटना हुँदा सेनलाई गाडीले ठक्कर दिएको थियो। गाडीको ठक्करबाट उनी गम्भीर घाइते भए। उपचारका लागि ललितपुरस्थित बी एण्ड सी अस्पताल पुर्याइएका सेनको मृत्यु भयो।
२०७६ मंसिर २८ गते बिहानीपख २१ वर्षीय पृथ्वी मल्लले चलाएको बा १४ च ६१२३ नम्बरको कारको ठक्करबाट फुटपाथमा हिँड्दै गरेकी लीला देवकोटाको ज्यान गयो। साथीहरुसँग मदिरा पिएर रातभर ठमेलका क्लबहरुमा रमाइलो गरेपछि मल्ल कार लिएर बूढानीलकण्ठस्थित ग्रिनभ्याली रिसोर्टमा पुगेका थिए।
मदिराले लठ्ठ भएका मल्लले चलाएको कारको ठक्करबाट पैदलयात्री देवकोटाको मृत्यु भएको थियो। प्रहरीमा मल्लले रातभरको अनिद्राले झ्याप्प निदाएपछि आफूले चलाएको कार अनियन्त्रित भई सडकको पल्लो छेउमा हिँडिरहेकी बटुवालाई ठक्कर दिन पुगेको बयान दिएका थिए।
उनीसँग नेपालको ड्राइभिङ लाइसेन्स समेत थिएन। तर, प्रहरीमा गरेको भन्दा उनले अदालतमा उल्टो बयान गरे। कारको गति धेरै भएको र स्टार्ट बन्द नहुँदा भवितव्यका रुपमा दुर्घटना भएको दाबी गरे।
१० वर्ष कैद माग दाबी गर्दै दायर भएको मुद्दामा ६ महिना मात्रै कैदको फैसला सुनाइएको थियो। उक्त अवधि पनि जेलमा नबसी अस्पताल बसेरै मल्ल छुटेका थिए। मल्लको गम्भीर गल्तीका कारण पैदलयात्री देवकोटाले भने अनाहकमै ज्यान गुमाउनु परेको थियो।
काठमाडौं उपत्यकामा पैदलयात्री कति असुरक्षित छन् भन्ने प्रतिनिधि घटना मात्रै हुन्, यी। सडकपेटीमा हिँडेका बटुवाको ज्यान जाने घटना भने रोकिनुको साटो बढ्ने क्रममा रहेको तथ्यांकले देखाएको छ। यतिमात्रै होइन पैदलयात्रीका लागि सडक पार गर्न बनाइएका जेब्रा क्रसिङबाटै पार गर्दासमेत असुरक्षित हुनुपर्ने अवस्था काठमाडौं उपत्यकामा छ।
अनलाइन न्यूज पोर्टल नेपालखबर डटकमका तत्कालीन सम्पादक कृष्ण ढुंगाना जेब्राक्रसिङबाटै बाटो काटिरहँदा सवारीले ठक्कर दिँदा गम्भीर घाइते भएका थिए। २०७६ असोज २३ गते नेपालखबरको कार्यालय थापाथलीको ब्लुबर्ड कम्प्लेक्सबाट घर फर्कने क्रममा बाटो पार गर्ने क्रममा उनलाई मोटरसाइकलले ठक्कर दिएको थियो। जेब्रा क्रसिङबाटै सडक पार गर्नेक क्रममा थापाथलीमा बा ३३प २३७ नम्बरको मोटरसाइकलले सम्पादक ढुंगानालाई ठक्कर दिएको थियो। उनको टाउकोमा गम्भीर चोट लाग्दा लामो समयको उपचारपछि उनी डिस्चार्ज भएका थिए।
जेब्राक्रसिङ बटुवाकै लागि बनाइएको भए पनि त्यहीँबाटै बाटो पार गर्दासमेत असुरक्षित हुने घटनाको उदाहरण सम्पादक ढुंगाना हुन्। भएका जेब्राक्रसिङ पनि खुइलिएर नदेखिने हुनु र तिव्रगति तथा लापरबाही गरेर चलाउँदा जेब्राक्रसिङमै गाडीको ठक्करबाट पैदलयात्रुको ज्यान जाने तथा घाइते हुने घटना काठमाडौं उपत्यकामा ब्याप्त छ।
त्यस्तै, काठमाडौंमा ठक्कर दिएर भाग्ने (हिट एण्ड रन) घटना समेत पछिल्लो समय निकै देखिन थालेको र प्रहरीले हिट एण्ड रन घटनालाई गम्भीर रुपमा लिएर कारबाही प्रक्रिया अघि बढाएको जिल्ला प्रहरी परिसर काठमाडौंका एसपी तथा प्रवक्ता दिनेशराज मैनाली बताउँछन्।
उनका अनुसार गत जेठ ३० गते मात्रै डिल्लीबजारमा काभ्रेको भुम्लुका ३६ वर्षीय अशोक पहारीलाई ठक्कर दिएर एउटा मोटरसाइकल भागेको थियो। हिट एण्ड रन उक्त घटनाको अनुसन्धानको क्रममा सीसीटीभी फुटेजमार्फत् ठक्कर दिने मोटरसाइकलको पहिचान गरेर पक्राउ गर्न प्रहरी वृत्त मालिगाउँ सफल भएको थियो। ठक्कर दिने मोटरसाइकल नम्बर बा ६१ प ६०७० र त्यसका चालक थानकोट नागदहका १९ वर्षीय रोहन नगरकोटीलाई पक्राउ गरिएको थियो।
दुर्घटनामा पर्नेमध्ये ३५ प्रतिशत पैदल यात्री
काठमाडौं उपत्यका ट्राफिक प्रहरी कार्यालयका प्रवक्ता तथा एसपी विनोद शर्मा दासका अनुसार काठमाडौं उपत्यकामा भएका दुर्घटनामा मृत्यु हुनेमध्ये करिब ३५ प्रतिशत पैदलयात्री छन्। ट्राफिकको यो तथ्यांकले पनि उपत्यकामा पैदलयात्री उच्च जोखिममा रहेको देखाउँछ।
उपत्यका ट्राफिक कार्यालयले उपलब्ध गराएको तथ्यांकअनुसार आर्थिक वर्ष २०७६/७७ मा मात्रै ५० जना पैदलयात्रुको गाडीको ठक्करबाट मृत्यु भएको थियो। यो आर्थिक वर्षमा मोटरसाइकल/स्कटुरमा सवार ८१ जना, ट्रकमा सवार ५, साइकलयात्री ५, बसमा सवार ६ र कार/जीपमा ६ जना गरी १५३ जनाको ज्यान भएको थियो।
आर्थिक वर्ष २०७७/७८ मा गाडीको ठक्करबाट मृत्यु हुने पैदल यात्रीको संख्या भने ५१ पुगेको ट्राफिकको तथ्यांक छ। आर्थिक वर्ष २०७८/७९ को वैशाखसम्म भने ३० जना पैदलयात्रीले ज्यान गुमाएका छन्।
पैदयात्रीहरूलाई ठक्कर दिएर हुने मृत्युका घटना प्राय: बिहानीपख भएको देखिन्छ। एसपी दासका अनुसार बिहानीपख मर्निङवाक लगायतमा निस्कँदा जाडोयाममा लाग्ने हुस्सु, तिव्र गति र बिग्रिएको सडकका कारण दुर्घटना भएको देखिन्छ।
कतिपय दुर्घटना भने पैदलयात्रीका कारण समेत निम्तिन्छ। हतारमा जथाभावी बाटो काट्दा, फुटपाथ छाडेर मूल सडकबाटै हिँड्दासमेत दुर्घटना भएको देखिन्छ। जसकारण पैदलयात्री आफू समेत सचेत हुनुपर्ने एसपी दासको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
