काठमाडौं– प्रहरी उपरीक्षक (एसपी)बाट प्रहरी वरिष्ठ उपरीक्षक (एसएसपी) बढुवामा बिहीबार रातिसम्म बैठक बस्दा पनि टुंगो लाग्न सकेन।
राष्ट्रिय अनुसन्धान विभाग (राअवि) बाट स्थानान्तरण भएर प्रहरीमा आएकाहरु र प्रहरी निरीक्षकमा भर्ना भएका दुई ब्याचका टोलीबीच ‘पावर एक्सरसाइज’ हुँदा बढुवा पेचिलो बनेको छ।
२०५३ सालमा राअविमा भर्ना भएर प्रहरीमा स्थानान्तरण भएको टोली र २०५४ र २०५६ मा प्रहरी निरीक्षकमा भर्ना भएको टोलीबीच कडा प्रतिस्पर्धा हुँदा बढुवा समितिले बढुवाको टुंगो लगाउन सकेको छैन।
एसएसपी बढुवाका लागि गृहमन्त्रालयका सचिव अध्यक्ष रहेको समिति हुन्छ। समितिमा गृहसचिवसँगै प्रहरी महानिरीक्षक (आईजी) र आईजीले तोकेको एक जना एआईजी सदस्य सचिव रहने व्यवस्था छ।
तीन सदस्य सम्मिलित समितिको बैठक बिहीबार राति ११ बजेसम्म बसे पनि बढुवाको विषय टुंगो लाग्न सकेन। स्रोतका अनुसार २०५६ मा प्रहरी निरीक्षकमा भर्ना भएकाहरुलाई बढुवा गर्ने कि नगर्ने भन्नेबारे कुरो नमिल्दा पुनः बस्ने गरी बैठक सकिएको थियो।
२०५६ मा प्रहरी निरीक्षकमा भर्ना भएकाहरुले जसरी पनि अहिले नै एसएसपी हुनुपर्ने लविइङमा लागेका छन्। उनीहरुले विभिन्न शक्तिकेन्द्रमार्फत तिव्र दबाब दिएकाले बढुवा पेचिलो बनेको छ। अघिल्लो टोलीका कारबाहीमा परेकाहरुलाई बढुवा नगरेर २०५६ मा इन्सपेक्टर भएकाहरुलाई बढुवा गर्नुपर्ने दबाब छ।
विभिन्न शक्तिकेन्द्रमार्फ २०५६ को टोलीका केही अधिकृतहरुले अहिले नै बढुवा हुनुपर्ने भन्दै लविइङ गरेका छन्। उनीहरुको लविइङलाई सजिलै वाइपास गरेर जान नसक्ने देखेपछि बिहीबार बसेको बढुवा समितिले कुनै निर्णय गर्न सकेन। बढुवा समितिको बैठक आज (शुक्रबार) पुनः बस्ने र बढुवाको टुंगो लगाउने तयारी समितिले गरेको छ।
नयाँ आर्थिक वर्षको कार्यसम्पादन मूल्यांकन (कासमु) साउन ७ गतेबाट सुरु हुन्छ। त्यसपछि साउन ७ गतेदेखि असोज २१ सम्म प्रहरीको बढुवा बन्द हुन्छ। जसकारण जतिसक्दा छिटो बढुवाको टुंगो लगाउनुपर्ने चटारो बढुवा समितिलाई छ। एसएसपी बढुवापछि डीएसपीबाट एसपी र इन्सपेक्टरबाट डीएसपीसमेत बढुवा गर्नुपर्ने भएकाले जतिसक्दो चाँडो बढुवा टुंगो लगाउनुपर्ने छ।
अहिले नेपाल प्रहरीमा एसएसपीका ३२ पद रिक्त छन्। ३२ पदका लागि करिब पाँच दर्जन एसपी प्रतिस्पर्धामा छन्।राअविबाबाट आएको टोलीदेखि २०५४ र २०५६ मा प्रहरी निरीक्षकमा भर्ना भएको टोली बढुवाको प्रतिस्पर्धामा छ।
राअविमा २०५३ सालमा भर्ना भएर प्रहरीमा आएको टोली, २०५४ मा इन्सपेक्टर भएर २०७४ मा एसपी भएकाहरु र २०५६ मा इन्सपेक्टर भर्ना भएर २०७५ जेठमा एसपी भएकाहरु बढुवाका लागि लागिपरेका छन्।
राअविबाट स्थानान्तरण भएर प्रहरीमा आएको समूह र २०५४ मै प्रहरी निरीक्षकमा भर्ना भएको समूह गरी अहिले ३४ जना एसपीबाट एसएसपी हुने लाइनमा छन्। तर उनीहरुसँगै २०५६ को टोली पनि बढुवामा छिर्न खाजेपछि समस्या आएको छ।
बढुवाको प्रतिस्पर्धामा रहेकाहरु पहिलो नम्बरदेखि १० नम्बरसम्मका राअविकै टोली छ। उनीहरु डीएसपीबाट एसपी बढुवा हुँदा १० नम्बरसम्म राअविकै टोली बढुवा भएको थियो।
पहिलोदेखि १०औं नम्बरसम्म क्रमशः सिद्धिविक्रम शाह, सुशीलसिंह राठौर, माधवप्रसाद श्रेष्ठ, डम्बरबहादुर विक, गणेश चन्द, उमाप्रसाद चतुरवेदी, ओमबहादुर राना, सुरेन्द्रबहादुर गुरुङ, हिमालयकुमार श्रेष्ठ, विमल बस्नेत बढुवा भएका थिए।
२०५४ सालको टोलीका अधिकृतहरूको ११औं नम्बरबाट मात्रै बढुवा भएको थियो। ११ औं नम्बरमा राजन अधिकारी छन्। उनी २०५४ सालमा प्रहरी निरीक्षकमा भर्ना भएकामध्ये पहिलो नम्बरमा छन्।
त्यसैगरी क्रमश ईश्वर कार्की, मनोजकुमार केसी, रेवती ढकाल, दानबहादुर कार्की, दिनेशकुमार आचार्य, अरुण पौडेल, राजेन्द्रप्रसाद भट्ट, मनोजकुमार यादव, किसनसिंह थापा, गोविन्द थपलिया, सुदर्शनप्रसाद कोइराला, विनोद घिमिरे, जीवनकुमार श्रेष्ठ, दीपक रेग्मी, दीपककुमार बस्नेत, जयराज सापकोटा, शारदाप्रसाद चौधरी, लोकेन्द्र श्रेष्ठ, दीपेन्द्र घर्ती क्षेत्री, रामेश्वरप्रसाद यादव, दिलीपसिंह देउवा, सञ्जिव शर्मा दास बढुवाको प्रतिस्पर्धामा छन्।
उनीहरूमध्ये मनोजकुमार यादव, विनोद घिमिरे, जयराम सापकोटा, शारदाप्रसाद चौधरी, लोकेन्द्र श्रेष्ठ, रामेश्वर यादव, दिलीपसिंह देउवा र सञ्जिव शर्मा दास पनि राअविबाटै आएका हुन्। अघिल्लो टोली भए पनि बढुवामा छुटेका दिल्लीराज विष्ट र गणेश चन्द पनि बढुवाको लाइनमा छन्।
२०५६ सालमा प्रहरी निरीक्षकमा भर्ना भएकाहरू पनि यसपटकको बढुवामा पर्न जोडतोडले लागेका छन्।
२०५६ सालमा प्रहरी निरीक्षकमा भर्ना भएर २०७५ जेठमा एसपी भएकाहरुमा विश्व अधिकारी, सानुराम भट्टराई, ओमप्रकाश अधिकारी, विश्वमणि पोखरेल, शेखर खनाल, अभिनारायण काफ्ले, सोमेन्द्रसिंह राठौर, मुकुन्द मरासिनी, सविन प्रधान, दिनेशराज मैनाली, कृष्णबहादुर पल्ली मगर, भुपेन्द्रबहादुर खत्री, गंगा पन्त, गोपालचन्द्र भट्टराई, रविकुमार पौडेल, बेलबहादुर पाण्डे, दिप शमशेर जबरा, नवीनराज राई, तारादेवी थापा, आभुषण तिम्सिना, प्रविण पोखरेल, प्रज्वल महर्जन, बसन्त रजौरे, वीरबहादुर ओली र चन्द्रदेव राई छन्।
उनीहरुमध्ये केही भने अहिले नै आफूहरु बढुवा हुनुपर्ने लविङमा लागेपछि बढुवा पेचिलो बनेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
