काठमाडौं–धर्म, संस्कृति एवं ज्योतिष क्षेत्रमा हुने गरेको शास्त्रविरुद्धका काम रोक्न चाल्नुपर्ने कदमका विषयमा बहस सुरु भएको छ। नेपाल पञ्चांग निर्णायक विकास समितिले बिहीबार आयोजना गरेको ‘ज्योतिष तथा धर्मशास्त्र सम्बद्ध समसामयिक व्यावहारिक विषयक अन्तर्क्रिया’ कार्यक्रमका सहभागीले बेलुकाको लग्न दिएका बेला बिहान र बिहानको लग्न दिएका बेला बेलुका विवाहलगायत कर्म हुँदा नकारात्मक फल प्राप्त हुने गरेकाले समस्या आउने गरेको बताएका थिए।
यस किसिमका शास्त्रीय मान्यताविपरीतका काम रोक्न कार्यक्रम आयोजना गरिएको त्यसअवसरमा जानकारी गराइएको थियो। दिइएको साइतमा विवाह नहुँदा सम्बन्ध विच्छेदका घटना बढेको समितिका अध्यक्ष प्रा श्रीकृष्ण अधिकारीले सुनाए। सामूहिक व्रतबन्ध, जन्मोत्सवमा केक काट्ने, विवाह र स्वयंवरमा समेत केक काट्ने गरेका घटना धर्म, संस्कृतिमा आएको विकृतिका रूपमा रहेको उनको भनाइ थियो।
संस्कृति, पर्यटन तथा नागरिक उड्डयन मन्त्रालयका सहसचिव होमप्रसाद लुइँटेलले समितिले प्रकाशन गरेको राष्ट्रिय पञ्चाङ्गले धर्म, संस्कृतिलाई व्यवस्थित गर्न सहयोग पुग्ने विश्वास व्यक्त गरे।
समितिका सदस्य एवं वाल्मीकि विद्यापीठ धर्मशास्त्र विभागका प्रमुख प्रा डा देवमणि भट्टराईले धर्म संस्कृतिका क्षेत्रमा घरघरमा विकृति फैलिएकाले त्यसको अन्त्यका लागि अभियान चलाउनुपर्नेमा जोड दिए। नीति अनुसन्धान प्रतिष्ठानका प्रबन्धक लक्ष्मण भट्टराईले कर्मकाण्डका क्षेत्रमा विकृति बढेकाले त्यसलाई रोक्न आचारसंहिता बनाइनुपर्ने बताए। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775812183.jpg)
-1764146706.png)
