दाङ–‘एनालग अन्तरिक्षयात्री’ को प्रशिक्षण पूरा गरेकी दाङकी ज्योति केसी अब अन्तरिक्षमा उड्ने सपना साकार पार्ने लक्ष्यमा अघि बढेकी छन्। अन्तरिक्षको जस्तै वातावरणमा गरिने यो प्रशिक्षण पूरा गर्ने उनी सम्भवतः पहिलो नेपाली पनि हुन्।
डीभी भिसामार्फत् सन् २०१७ मा अमेरिका पुगेकी उनी तीन वर्षअघि अमेरिकी वायुसेनामा भर्ती हुन सफल भएकी थिइन्। हाल टेक्सास एयर नेशनल गार्डमा एयरोस्पेस टेक्निसियन (मेडिकल टेक्निसियन) का रुपमा कार्यरत ज्योतिले भर्खरै एनालग अन्तरिक्षको प्रशिक्षण पूरा गरेकी हुन्।
हाल नेपालमा रहेकी उनले भनिन्, ‘मैले भर्खरै एनालग अन्तरिक्ष यात्री प्रशिक्षण पूरा गरेको छु र आधिकारिक रूपमा एनालग अन्तरिक्षयात्रीको रूपमा प्रमाणित भएर २० दिनको बिदामा नेपाल आएकी छु।’
यसका लागि उनी एकै पटकमा सफल भने भएकी होइनन्। ५० केजी तौल हुनुपर्नेमा ३५ केजीमात्र तौल हुँदा पहिलो चरणमा उनी सफल हुन सकिनन्। उनी भन्छिन्, ‘मेरो लक्ष्य अन्तरिक्षयात्री बन्नु थियो। त्यसैले तीन महिनासम्म अथक प्रयास पछि मेरो ५० केजी तौल पुग्यो र दोस्रो पटकमा सफल हुन पाएँ।’
प्रशिक्षणमा उनीसहित मेक्सिको र पोल्याण्डका सहभागी पनि थिए। ज्योति भन्छिन्, ‘यो हामी सबैका लागि एक अविश्वसनीय सिक्ने अनुभव थियो। तालिम पोल्याण्डमा दुई हप्तासम्म चलेको थियो र म पहिलो नेपाली–अमेरिकीको रुपमा सहभागी थिएँ।’ उनी अमेरिकाको लुनारेस रिसर्च स्टेशनका तर्फबाट सहभागी थिइन्।
प्रशिक्षणका क्रममा उनीहरुलाई नयाँ प्रविधिहरू रोबोटिक उपकरण, सवारीसाधन, बासस्थान, सञ्चार, ऊर्जा उत्पादन, डिजाइन, गतिशीलता, एयरो र हाइड्रो प्लान्टेशनलगायतका भूमिकाहरूमा परीक्षण र अनुसन्धान गरिएको थियो। यस्तै, थकान र अन्य व्यवहार पनि अवलोकन गरिएको थियो। उनी सम्झन्छिन्, ‘मलाई जीवनमा एकपटक अवसर दिइएको थियो, मेरा लागि यो बिल्कुलै नयाँ अनि चुनौतीपूर्ण अभ्यास थियो, मैले पुरा गरेँ र म मेरा आमाबुवा, दाजुभाइ, आफन्त, साथीहरू र संयुक्त राज्य वायु सेनाप्रति आभार व्यक्त गर्न चाहन्छु।’
ज्योति अब नासासँगको सहकार्यमा अनुसन्धानका लागि अन्तरिक्षमा उड्ने योजनामा छिन्। ‘अब मेरो लक्ष्य भनेको अन्तरिक्षमा पुग्ने हो,’ उनले भनिन्, ‘यो मेरो जीवनको लक्ष्य हो, त्यहाँ पुग्न १०र१५ वर्ष नै किन नलागोस् ।’
ज्योतिका बुवा नरबहादुर केसीले आफ्नो सन्तानले यति धेरै प्रगति गर्दा गौरवान्वित भएको बताए। ‘मेरी छोरीले मात्र होइन समाजले नै यसरी प्रगति गर्नुपर्छ,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
