काठमाडौं–राष्ट्रिय ध्वजाबाहक नेपाल वायुसेवा निगम (नेपाल एयरलाइन्स) ले प्रतिस्पर्धी हवाई बजारमा दरिलो उपस्थिति प्रदर्शन गर्न सक्रिय ढंगले लागिपरेको जनाएको छ।
निगमका महाप्रबन्धक वरिष्ठ क्याप्टेन दिपुराज ज्वारचनले आर्थिक सुशासन र बजारमा आफ्नो दरिलो उपस्थिति प्रदर्शन गर्न निगम सक्रिय रहने उल्लेख गरे। निगम स्थापनाको ६४औँ वार्षिकोत्सवका अवसरमा शुक्रबार नयाँ सडकस्थित निगमको केन्द्रीय कार्यालयमा आयोजित कार्यक्रममा उनले निगमका अगाडि प्रशस्त चुनौती रहे पनि सामूहिक प्रयासका माध्यमले सफलतातिर लैजान सकिने विश्वास व्यक्त गरे।
‘संस्थामा आन्तरिक सुधार गर्दै अन्तर्राष्ट्रिय जगत्मा प्रतिष्ठा बढाउनेतर्फ निगमको प्रयास रहनेछ तर त्यसमा एक्लो व्यक्तिको प्रयासमात्र पर्याप्त नहुने भएकाले निगमका समस्त कर्मचारीको सहयोगको अपेक्षा गरेको छु। निगमको बजार हिस्सा बढाउन प्रयास गरौँ', महाप्रबन्धक ज्वारचनले भने।
उनले नयाँ काम थाल्नेतिरभन्दा पहिलो चरणमा पुराना योजना पूरा गर्नेतिर निगमले प्रयास थालेको बताए। भविष्यमा निगमका हितमा हुने कार्यनीति र कार्यक्रम थालिने उनको भनाइ छ। ज्वारचनले निगममा आर्थिक सुशासन र बजारमा आफ्नो दरिलो उपस्थिति प्रदर्शन गर्न निगम सक्रिय रहने उल्लेख गरे।
निगमको नयाँ वेबसाइट सुरु
वायुसेवा निगमले वार्षिकोत्सवका उपलक्षमा नयाँ वेबसाइट सुरु गरेको छ। सूचना सञ्चार तथा प्रविधिमा संसारले मारेको फड्को मारेको सन्दर्भमा निगमलाई आधुनिक प्रविधियुक्त बनाउन भन्दै निगमले वेबसाइट प्रारम्भ गरेको हो।
उक्त वेबसाइटको संस्कृति, पर्यटन तथा नागरिक उड्डयनमन्त्री जीवनराम श्रेष्ठले शुभारम्भ गरे। बेवसाइटमार्फत निगमको अनलाइन टिकट बुकिङ गर्न सजिलो हुनेछ। अनलाइन बुकिङको प्लेटफर्म मैत्री सिष्टमले एक महिनाभित्र नै यात्रुले घरमै बसी टिकट काट्ने सुविधा प्राप्त गर्ने निगमले विज्ञप्तिमार्फत जनाएको छ।
निगमको नयाँ वेबसाइटमा च्याटबक्सको पनि सुविधा छ जसले गर्दा यात्रुको आफ्नो जिज्ञासा, गुनासोको पृष्ठपोषण हुनेछ । वेबसाइटमा रहेको उडान तालिकाबाट यात्रु तथा सरोकारवालाले विविध उडान सूचना, गन्तव्य तथा अन्य जानकारी प्राप्त गर्न सक्नेछन्। साथै आगामी दिनमा निगमले अन्तर्राष्ट्रिय उडानको बुकिङसहितको मोबाइल एप लोयल्टी म्यानेजमेन्ट सिस्टमको सुविधा पनि थप गर्ने भएको छ। यो वेबसाइटमार्फत निगमको फेसबुक, ट्वीटर, युट्युब र इन्स्टाग्राममा जोडिन सक्ने सुविधा रहेको छ।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
