महान्यायाधिवक्ता खाती (फाइल तस्बिर)
काठमाडौं– एउटा बालिकामाथि भएको भनिएको बलात्कार घटनाको मुद्दा कमजोर बनाउन दिएको दबाब नमान्दा आफ्नो सरुवा गरेको भन्दै सरकारी वकिलले महान्यायाधिवक्ता खम्मबहादुर खातीविरुद्ध सर्वोच्च अदालतमा रिट दायर गरेकी छन्।
जिल्ला सरकारी बकिल कार्यालय ललितपुरमा कार्यरत रहेकी संगीता थोकरले सर्वोच्चमा रिट दायर गरेकी हुन्। रिटको पहिलो पेसी बिहीबारका लागि तोकिएको छ।
जिल्ला अदालत ललितपुरमा विचाराधीन एक व्यापारी विरुद्धको ब
लात्कार मुद्दा कमजोर बनाउन महान्यायाधिवक्ता खातीले दबाब दिएको थोकरको दाबी छ। उक्त निर्णयविरुद्ध सुरुमा दिएको निवेदन सर्वोच्चका रजिष्ट्रारले दरपिठ गरेका थिए।
सर्वोच्च प्रशासनले दरपिठ गरेपछि उनले इजलासमा निवेदन दिएकी थिइन्। न्यायाधीश अनिल कुमार सिन्हाको इजलासले निवेदन दर्ता गर्न आदेश दिएको थियो। उक्त आदेशपछि वुधबार सर्वोच्चमा रिट निवेदन दर्ता भएको हो।
व्यापारी सुशील चटौतविरुद्ध दर्ता भएको जबरजस्ती करणी मुद्दामा आफू अभियोजनकर्ता भएको र पटक–पटक महान्यायाधिवक्ता कार्यालयबाट मुद्दालाई कमजोर बनाउन दबाब आएको उनले रिटमा जिकिर गरेकी छन्।
उनले महिला विरुद्धका अपराधहरु बढोत्तरी भइरहेको अवस्थामा पीडितलाई बयान फेर्नदेखि सरकारी पक्षलाई मुद्दा कमजोर पार्न दबाब आउने कार्य गलत भएकाले पीडितको संरक्षण गर्न महान्यायाधिवक्ता कार्यालयको नाममा परमादेश जारी गर्न रिटमा माग गरिएको छ।
उक्त मुद्दामा अभियोजन कमजोर नगरेको आरोपमा आफूलाई असार ३ गते मुख्य न्यायाधिवक्ताको कार्यालय बागमती प्रदेश हेटौंडामा सरुवा गरिएको उनले दायर गरेको रिटमा उल्लेख छ।
रिटमा उनले आफ्नो सरुवा समेत बदर हुनुपर्ने माग गरेकी छन्। रिटमा महान्यायाधिवक्ताको कार्यालय, महान्यायाधिवक्ता खम्मबहादुर खाती, सचिवालयलगायतलाई विपक्षी बनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
