काठमाडौं– बलात्कार मुद्दा कमजोर बनाउन नमानेको भन्दै सरकारी वलिकको सरुवा गरिएको छ। एक नाबालिगमाथि भएको जबरजस्ती करणी (बलात्कार) मुद्दा कमजोर बनाउन भन्दै पटकपटक दबाब दिँदा पनि नमानेपछि जिल्ला सरकारी वकिल कार्यालय ललितपुरका सहन्यायाधिवक्ता संगीता थोकरको सरुवा गरिएको हो।
महान्यायाधिवक्ता कार्यालयबाटै मुद्दा कमजोर बनाउन भन्दै पटक–पटक दबाब आएको, तर आफूले नमानेपछि हिजो बिहीबार मात्रै सरुवा गरिएको थोकरले नेपाल लाइभलाई बताइन्। महान्यायाधिवक्ता कार्यालयबाट फोन गर्दै जसरी भए पनि थोकरले हेर्दै गरेको एक नाबालिगको बलात्कार मुद्दा कमजोर बनाउन दबाब आएको थियो।
एक नाबालिगलाई बलात्कार गरेको आरोपमा कन्चनपुरको भीमदत्त नगरपालिका–४ स्थायी ठेगाना भइ ललितपुर इमाडोलस्थित ग्रिनहिल सिटी बस्ने ३६ वर्षीय सुशील चटौतविरुद्ध मुद्दा चलेको थियो। चटौत ट्रान्सपोर्ट, होटल व्यवसाय गर्दै आएका व्यक्ति हुन्। उनै चटौतले आफ्नै घरमा उनकै संरक्षणमा रहेकी १३ वर्षीया बालिकालाई बलात्कार गरेको भन्दै पीडित पक्षले मुद्दा दायर गरेको थियो।
उक्त मुद्दाको अनुसन्धान सकेर प्रहरी वृत्त सातदोबाटोले जिल्ला सरकारी वकिल कार्यालयमा अनुसन्धान प्रतिवेदन बुझाएको थियो। सोही मुद्दा कमजोर बनाउन भन्दै महान्यायाधिवक्ता कार्यालयलगायत विभिन्न शक्तिकेन्द्रबाट दबाब आएकोमा आफूले नमान्दा सरुवा भएको थोकरले बताइन्।
निर्देशन (मुद्दा कमजोर बनाउने दबाब) नमानेको भन्दै महान्यायाधिवक्ता कार्यालयको निर्देशनमा थोकरको सरुवा भएको छ। थोकरलाई हेटौंडास्थित बगमती प्रदेश सरकारका मुख्य न्यायाधिवक्ताको कार्यालयमा सरुवा गरिएको छ।
सरकारी वकिल थोकरबाट मुद्दा कमजोर पार्न नसकिएपछि पीडित बालिकालाई प्रतिवादी पक्षले होस्टायल बनाएर बयान समेत फेर्न लगाएको थियो। पीडित बालिकालाई चटौतकै गाडीमा राखेर बयानका लागि भन्दै अदालतसम्म पुर्याइएको पाइएको छ। प्रतिवादी पक्षले बालिकालाई फकाएर बयान समेत फेर्न लगाएको छ।
घटनाको सुरुवात गत चैत १० गतेबाट सुरु भएको थियो। चैत १० गते चटौतको घरमा बस्दै आएकी बालिका विद्यालय गएकी थिइन्। विद्यालय समय सकिएर घर फर्किने बेलामा भने उनी घर नै जान मानेकी थिइनन्। घर नजाने बरु आत्महत्या गर्ने बताएपछि स्कूल प्रशासनले प्रहरीलाई खबर गरेको थियो। प्रहरी र बाल मनोबिमर्शकर्ताको काउन्सिलपश्चात बालिकाले आफूलाई चटौतले बतात्कार गर्ने गरेको खुलासा गरेकी थिइन्।
चटौतीले विभिन्न डरधम्की दिँदै आफूमाथि बलात्कार गर्ने गरेको उनको भनाइ थियो। पछिल्लो समय गत माघ २४ गते दिउँसो साढे ४ बजेतिर घरमै चटौतले आफूमाथि बलात्कार गरेको उनले बताएकी थिइन्।
चटौतले घरमा भएका बच्चाहरुका लागि ठूलो आवाज (साउण्ड)मा टिभी लगाइदिएर आफूलाई ओछ्यानमा लगेर बलात्कार गरेको बालिकाले बयान दिएकी थिइन्।
संवेदनशील अंगहरुमा छुने र बलात्कार गर्ने, त्यसको दुखाइ र पीडाका कारण आफू घर नजाने भन्दै बालिकालाई प्रहरी समक्ष याचना गरेकी थिइन्।
बलात्कार गरिसकेपछि चटौतले उक्त कुरा कसैलाई भने मार्नेसम्मको धम्की दिने गरेको पनि पीडित बालिकाको भनाइ छ। त्यसपछि पीडित पक्षले चटौतविरुद्ध जबरजस्ती करणीको कसुरमा उजुरी दिएको थियो।
बलात्कारको उजुरी परेपछि प्रहरी वृत्त सातदोबाटोले चटौतलाई पक्राउ गरेर अनुसन्धान गरेको थियो। अनुसन्धानको क्रममा चटौतले बालिकालाई बलात्कार गरेको देखिको प्रहरीको भनाइ छ। चटौतले दिएको बयान, बालिकाको बयान, घटनास्थल (चटौतको घर) लगायतबाट संकलन गरिएका प्रमाणका आधारमा उनले बालिकामाथि बलात्कार गरेको पुष्टि हुने रायसहित प्रहरीले सरकारी वकिललाई अनुसन्धान प्रतिवेदन बुझाएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
