तस्बिर: गेट्टी इमेज
काठमाडौं–सरकारले विश्वको सर्वोच्च शिखर सगरमाथाको आधार शिविर परिवर्तन गर्ने तयारी गरेको छ। त्यसका लागि सरोकारवाला पक्षसँग सरकारले परामर्श सुरु गरेको छ। पर्यटन विभागकाअनुसार सरकारले अहिले भएको आधारशिविरभन्दा केही तल आधारशिविर बनाउने तयारी थालेको छ।
हाल खुम्बु हिमनदी नजिकै रहेको आधारशिविर नदी तीव्र गतिमा पग्लिरहेको कारण असुरक्षित मानिएको छ। पर्वतारोहण गर्ने समयमा १५ सय जना भेला हुने यो ठाउँमा तापमान र मानवीय गतिविधि पनि अत्याधिक भएकाले असुरक्षा बढेको भन्दै आधारशिविर परिवर्तन गर्ने तयारी थालिएको छ।
पर्यटन विभागका महानिर्देशक तारानाथ अधिकारीले आधारशिविर परिवर्तन गर्ने विषयमा सबै पक्षसँग परामर्श गर्ने तयारीमा रहेको बताए। आवश्यक अध्ययनहरु गरेर आधारशिविर कहाँ राख्ने भन्ने विषयमा परामर्श गरि निर्णय गरिने उनले बताए।
अधिकारीले भने, ‘आधारशिविरमा मौसम र बढ्दो तापमानका कारण परिवर्तन भइरहेको छ। त्यसैलाई मध्यनजर गर्दै आधारशिविर परिवर्तन गर्ने भन्ने विषयमा परामर्श गरेर तयारीमा जानेछौं।’
जलवायु परिवर्तनको असर
केही साता अघि मात्रै एभरेस्ट बेस क्याम्प पुग्न सफल भूतपूर्व ब्रिटिश गोर्खा सैनिक हरि बुढा मगरले एभरेस्ट बेस क्याम्प सार्ने नेपाल सरकारको निर्णय सही भएको बताए।
नेपाल लाइभसंग कुरा गर्दै एभरेस्ट बेस क्याम्प पुग्ने पहिलो 'डबल एम्पुटी' को रेकर्ड राख्न सफल बुढा मगरले जलवायु परिवर्तन बाहेक सगरमाथा क्षेत्रमा जथाभावी फोहरमैला फ्याँकिनु र पर्वतारोहणसम्बन्धी नेपाल सरकारको नीतिले पनि समस्या निम्त्याएको बताए।
आगामी वर्ष (सन् २०२३) मा सगरमाथा आरोहण गरेर अर्को रेकर्ड बनाउने तयारी गरिरहेका बुढा मगरले आफूले हिमाली क्षेत्रमा जलवायु परिवर्तनको असरका बारे विश्व जनमत बनाउन प्रयास गर्ने पनि जनाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
