डडेलधुरा– बैतडीको सिगास गाउँपालिकाका कले, महालु र कालू लोहार बृद्धभत्ता लिनका लागि बुधबार घरबाट पैदला यात्रामा निस्किए।
दुई दिनको पैदलयात्रापछि उनीहरू बिहीबार साँझ गाउँपालिकाको वडा नम्बर २ स्थित कृषि विकास बैंकको कार्यालयमा पुगे। तर, उनीहरू पुग्नेबेलासम्म बैंक बन्द भइरहेको थियो।
सोही वडामा बास बसेका उनीहरू शुक्रबार बिहानैदेखि भत्तालाई लाइनमा बसे। दिनभर चर्को घाममा लाइन बसे पनि बैंक बन्द हुँदासम्म उनीहरूको पालो आएन।
बिहान १० बजेदेखि लाइनमा बसे पनि पाँच बजेसम्म आफूहरुको पालो नआएको कालु लुहारले बताए। बैंकमा पालो नआएपछि भत्ता बुझ्न पाएनन्।
भत्ताका लागि दुईदिन सकसपूर्ण पैदल आएका उनीहरू अन्ततः भत्ता नै नलिएर फर्किन बाध्य भए। शनिबार र आइतबार दुई दिन बैंक बन्द हुने भएपछि उनीहरू शुक्रबार बेलुका नै फर्किएका हुन्।
‘दिनभर लाइनमा लाग्यौं, भीडमा पालो नै पाइन्। शनिबार र आइतबार दुवैदिन बैंक बन्द हुने भएपछि हामी फर्कियौं’, ६० वर्षी कालु लोहारले भने।
भौगोलिक विकटता र बैंकमा लाइन लाग्नुपर्ने बाध्यताका कारण आफूहरुले त्यति टाढाबाट दुई दिन हिँडेर आउँदा पनि भत्ता नपाएको महालु लोहारले गुनासो गरे। ‘बैंकमा लाइन लाग्नेबेलासम्म तीन दिन भइसकेको थियो। दिनभर लाइनमा पर्खियौं। तर हाम्रो पालो नै आएन। फेरि दुई दिन लगातार बिदा रहेछ, त्यसैले रित्तो हात फर्कियौं। आउँदाजाँदा दुःख त छँदैछ, खर्च पनि भयो’, उनले भने।
वडामै भत्ता वितरण गरेको भए यति सास्ती खेप्नुनपर्ने उनीहरूको भनाइ छ। सिगास गाउँपालिकामा रहेको कृषि विकास बैंकमार्फत भत्ता वितरण हुने गरेको छ। बैंकको शाखा वडा नम्बर २ मा छ। भौगोलिक विकटताका कारण अन्य वडाबाट त्यहाँसम्म पुग्न दुई/तीन दिन नै लाग्छ।
भौगोलिक विकटता त छँदैछ, बैंकमा पनि कम समस्या छैन। सोलारको भरमा सञ्चालित बैंकमा छिटो काम गनै सहव छैन। सोही कारण पनि भत्ताका लागि लाइनमा बस्नुपर्ने र कैयौं फर्किन बाध्य भएको बैंकले जनाएको छ।
सेवाग्राहीले भने सम्बन्धित वडाहरूबाटै भत्ता वितरण गर्न गाउँपालिकासँग माग गरेका छन्। बैंकसँग समन्वय गरेर गाउँमै भत्ता वितरण भए दुई/तीन दिनको सास्ती कम हुने सेवाग्राहीको भनाइ छ।
यो समस्या सिगास गाउँपालिकामा मात्रै होइन, जिल्लाका प्राय सबै स्थानीय तहमा छ। तीन चार महिनाको भत्ता एकैपटक वितरण हुने भएका कारण पनि बैंकमा भत्ता वितरण गर्नेबेला भीड बढी हुन्छ।
समाजिक सुरक्षाभत्तालाई सहज बनाउनेबारे पालिकामा छलफलकै क्रममा रहेको सिगास गाउँपालिकाका पञ्जीकरण फिल्ड सहायक खगेन्द्र धामीले बताए। वडामै बैंकका कर्मचारी बोलाएरै भए पनि भत्ता वितरण प्रक्रियालाई सहज बनाउनेबारे छलफल भइरहेको उनको भनाइ छ।
लाइन र भौगोलिक विकटताकै कारण सामाजिक सुरक्षा भत्ता वितरण प्रणाली सहज बनाउन दशरथ चन्द नगरपालिकाले सम्बन्धित वडाबाटै वितरण गर्ने निर्णय गरेको छ।
वडा नम्बर २, ३, ७, ९ र ११ का नागरिकलाई सम्बन्धित वडा कार्यालयबाटै भत्ता वितरणको तयारी गरिएको नगरपालिकाले जनाएको छ। यस्तै सुर्नया गाउँपालिकको वडा नम्बर ३ ले पनि सामाजिक सुरक्षा भत्ता वडा कार्यालयबाटै वितरण गर्ने निर्णय गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
