काठमाडौं– गत जेठ १७ गते साँझ अछामको पञ्चदेवल विनायक नगरपालिका रिठा टोलमा नेकपा एमाले र नेपाली कांग्रेसका कार्यकर्ताबीच झडप भयो। झडप हुँदा विनायक नगरपालिका–४ कालिकास्थानका १७ वर्षीय किशोर शाही पनि उक्त ठाउँमा पुगेका थिए।
त्यही झडपपछि शाही वेपत्ता भएको परिवारका सदस्यको दाबी छ। साँझपख रिठा टोलबाट वेपत्ता भएका शाहीको शव पाँच दिनपछि जेठ २१ गते वडा नं. ४ कालिकास्थानस्थित मध्यपहाडी लोकमार्गबाट १ किलोमिटर तल जंगलमा भेटियो।
उनको मोबाइल शवभन्दा माथि मध्यपहाडी लोकमार्गमा भेटिएको थियो। चप्पल भिरमा अड्किएका थिए। शाही वेपत्ता भएपछि प्रहरीमा निवेदन दिँदासमेत समयमै खोजीनीति नभएको परिवारको गुनासो छ।
उनी एमालेको चुनाव प्रसारमा समेत संलग्न थिए। त्यही कारण कांग्रेस कार्यकर्ताबाट हत्या भएको आरोप लगाउँदै आफन्तले शवसमेत उठ्न नदिइ आन्दोलन गरेका थिए। उनी मृत भेटिएको चार दिनपछि बल्ल सहमति भएर शव उठ्ने वातावरण बनेको छ।
अब अनुसन्धानले गति लिने प्रहरीले जनाएको छ। ‘सुरुदेखि नै हामीले घटनालाई गम्भीर रुपमा लिँदै सीआईबीदेखि एसएसपीसम्मको टोली परिचालन गरेका थियौं,’ नेपाल प्रहरीका प्रवक्ता तथा एसएसपी विष्णु केसीले भने, ‘यो घटना प्रहरी अनुसन्धानकै लेन्समा छ। कसैले केही शंका नगरी प्रहरीलाई अनुसन्धानमा सहयोग गर्न आग्रह गर्छौँ।’
तीन बुँदे सहमति
शाहीको मृत्यु भएको नौ दिनपछि बुधबार पीडित आफन्त र प्रशासनबीच तीन बुँदे सहमति भएको छ। सहमतिसँगै शव उठाउने प्रक्रियासमेत सुरु भएको छ।
शव उठाउने, पोष्टमार्टम गर्न पठाउने र अवस्था हेरेर मुद्दालाई कानूनी प्रक्रियामा लैजाने सहमति भएको प्रवक्ता केसीले जानकारी दिए। यो सहमतिसँगै अब शाही मृत्यु प्रकरणको अनुसन्धानले गति लिने उनको भनाइ छ।
उनी बेपत्ता भएदेखि नै स्थानीय र आफन्तले प्रदर्शन गर्दै आएका थिए। सहमतिसँगै आन्दोलन पनि रोकिएको छ।
‘नबुझी किटानी जाहेरी दर्ता हुँदैन’
शाहीको हत्या भएको दाबी गर्दै पीडित परिवारले किटानी जाहेरी दिए पनि प्रहरीले दर्ता गरेको छैन। बुधबार प्रतिनिधि सभामा बोल्दै अछाम २ का सांसद यज्ञ बोगटीले प्रहरीले ‘जाहेरी’ दर्ता गर्न नमानेकाले शव उठ्न नसकेको र घटनास्थलमै शव कुहिने अवस्था आएको बताएका थिए।
तर, जाहेरी नभएर किटानी जाहेरी आएको र हचुवाको भरमा बुझ्दै नबुझी किटानी जाहेरी दर्ता हुने अवस्था नरहेको अछाम प्रहरी स्रोतले नेपाल लइभलाई जानकारी दिएको छ। ‘उहाँहरुले जाहेरी लिएर आउनु भएको होइन। व्यक्ति नै किटान गरेर किटानी जाहेरी लिएर आउनु भएको हो। कर्तव्य ज्यान जस्तो कसुरमा हचुवाको भरमा कसैविरुद्ध मुद्दा दर्ता गर्नु जायज नहुने भएकाले किटानी जाहेरी नलिइएको हो,’ अछाम प्रहरी स्रोतले भन्यो, ‘जाहेरी दर्ता गरेर घटनाको अनुसन्धान गर्न भने प्रहरीलाई कुनै समस्या छैन।’
प्रहरी स्रोतका अनुसार पीडित पक्षले नगरप्रमुख अम्बिका चलाउनेसहित १८ जनाविरुद्ध किटानी जाहेरी ल्याएका थिए। तर, घटनाको यर्थाथ नबुझी कसैलाई दुखः दिने नियतले किटानी जाहेरी दर्ता गर्न नहुने भन्दै प्रहरीले फर्काइदिएको थियो।
राजनीतिक रङ दिन खोजिएको सांसदहरूको आशंका
शाही मत्यु प्रकरणको विषय सडकदेखि संसदसम्म पुगेको छ। स्थानीयले सडकमा आन्दोलन गरिरहेका छन्। सांसदले संसदमा समेत कुरा उठाएका छन्।
बधुबार प्रतिनिधिसभामा बोल्दै अछाम–२ का एमाले सांसद यज्ञ बोगटीले शाही मृत्यु प्रकरणलाई राजनीतिक रङ दिन खोजिएको आशंका गरे। ‘यो मुद्दामा राजनीतिको रङ देख्नु आवश्यक छैन। विद्यार्थी मारिँदा राजनीति गर्नु उपयुक्त हुँदैन। त्यहाँको जनताको प्रतिनिधिको हैसियतले मलाई जति पीडा छ, त्यतिकै यो सरकारका गृहमन्त्री र सरकारलाई पनि पीडा हुनुपर्छ। आफ्नो नागरिक मारिँदा पीडबोध हुनुपर्छ,’ बोगटीले भने।
बुधबारको प्रनिधिनिसभा बैठकमा सभामुख अग्नी सापकोटाले उक्त घटना छानबिन गरेर दोषीलाई कडा कारबाही गर्न सरकारलाई निर्देशन दिइसकेका छन्।
त्यसअघि, कांग्रेस महामन्त्री तथा सांसद गगन थापाले पनि मंगलबारको प्रतिनिधिसभा बोल्दै अपराधीलाई हदैसम्मको कारबाहीको माग गरेका थिए। ‘यसमा संलग्न दोषीलाई कडाभन्दा कडा कारबाही हुनुपर्छ, दोषी छुट्दै नछुटोस्, यो हाम्रो माग छ। कहीँ–कतै राजनीतिक प्रतिशोध साँध्नका लागि यस्ता घटनाहरुको प्रयोग नहोस्, माननीय गृहमन्त्रीज्यूको ध्यानाकर्षण गराउन चाहन्छु,’ थापाले भनेका थिए।
अनुसन्धान समिति गठन, सीआईबीको टोली परिचालन
शाही मृत्यु प्रकरणको अनुसन्धान गर्न प्रहरीले समिति गठन गरेको छ। सुदूरपश्चिम प्रदेश प्रहरी कार्यालयले संघीय प्रहरी इकाई कार्यालयका प्रहरी वरिष्ठ उपरीक्षक (एसएसपी) जनकराज पाण्डेको नेतृत्वको अनुसन्धान समिति गठन गरेको हो।
एसएसपी पाण्डेको टोली मंगलबार नै घटनास्थल गएर अनुसन्धान सुरु गरेको छ।
यसअघि, शव भेटिएलगत्तै केन्द्रीय अनुसन्धान ब्यूरो (सीआईबी) को टोलीलाई अनुसन्धानमा खटाइएको थियो। सीआईबीबाट डीएसपी मनोहर भट्टको कमान्डमा ६ सदस्यीय टोली अछाम पुगेर घटनाको अनुसन्धान गरिरहेको छ। त्यसैगरी, तालिम प्राप्त कुकुर प्रयोग गरेर प्रहरीले ‘स्निफिङ’ समेत गराएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
