काठमाडौं– ११ सिनियर खेलाडीलाई कारबाही, नयाँ कप्तान र अधिकांश युवा खेलाडी। बुधबारदेखि कुवेत सिटीमा सुरू हुने एएफसी एसियन कप २०२३ को तेस्रो चरणको छनोटका खेलहरूमा नेपाली राष्ट्रिय टोलीमा देखिने परिदृश्य हुन् यी।
समूहमा ‘ए’ मा आयोजक कुवेतसँगै जोर्डन र इन्डोनेसियाविरूद्ध नेपाली राष्ट्रिय टोली उत्रिँदा यही दृश्य मैदानभित्र र बाहिर देखिनेछ। तर, नेपाली राष्ट्रिय टोलीका मुख्य प्रशिक्षक अब्दुल्लाह अल्मुताइरी यी दृश्यबाट विचलित हुने छैनन्।
बुधबार जोर्डनविरूद्ध मैदान उत्रिनुअघि पत्रकार सम्मेलनमा प्रशिक्षक अल्मुताइरीले यही संकेत गरे। नवनियुक्त कप्तान नवयुग श्रेष्ठसँग उपस्थित भएका प्रशिक्षक अल्मुताइरीले यस प्रतियोगितालाई कुनै दबाब नलिएको बताए।
‘हाम्रो समूह पोर्ट ४ को राष्ट्र हो। त्यसकारण हामीमा कुनै दबाब छैन,’ उनले भने। नेपाली टोली यो समूहको कमोजर टोलीमध्येको एक हो। नेपाल फिफा वरीयतामा १६८औं स्थानमा छ। जोर्डन ९१औं, कुवेत १४६औं र इन्डोनेसिया १५९औं स्थानमा छन्।
यस समूहमा नेपाल मात्र अहिलेसम्म एसिया कप नखेलेको टोली हो। इन्डोनेसियाले ४ पटक एसिया कप खेलिसकेको छ। १० पटक एसिया कप खेलिसकेको कुवेत सन् १९८० को एसियन च्याम्पियन हो। सन् २०११ देखि लगातार एसिया कप खेलेको जोर्डनले ४ पटक एसिया कपमा सहभागिता जनाएको छ।
नेपालले अहिलेसम्म एसिया कप नखेलेपनि यसअघि नै यी तीनै राष्ट्रहरूको नाडी भने छामिसकेको छ। यसअघि नेपालले दोस्रो चरणको छनोटमा पनि कुवेत र जोर्डनसँग खेलेको थियो। दुवै टोलीसँग २/२ पटक खेल्दा नेपालले हार बेहोरेको थियो। दुवै टोलीविरूद्ध नेपालले गोल समेत गर्न सकेको थिएन।
त्यसैले पनि नेपाललाई यसपटक पनि यी बलिया राष्ट्रविरूद्ध जित निकाल्न त्यति सहज भने हुने छैन। अर्कोतर्फ नेपाली टोलीमा युवा खेलाडीको बाहुल्यता छ। एएफसी एसियन कप छनोटको तयारीमा रहेका बेला नेपाली राष्ट्रिय टोलीका मिडफिल्डर रोहित चन्दलाई प्रशिक्षक अल्मुताइरीले पटक–पटक क्याम्प छोड्न निर्देशन दिएको भन्दै विशाल राई, अनन्त तामाङ, विशाल श्रेष्ठ, अञ्जन विष्ट, सुजल श्रेष्ठ र विमल घर्तीमगरलगायतका १० खेलाडीले वैशाख १३ गते ‘विद्रोह’ गरेका थिए।
उनीहरूलाई माल्दिभ्समा व्यावसायिक फुटबल खेलिरहेका कप्तान किरण चेम्जोङले पनि सामाजिक सञ्जालबाट साथ दिएका थिए। प्रशिक्षक अल्मुताइरीले वैशाख १८ गते अखिल नेपाल फुटबल संघ (एन्फा)का महासचिव इन्द्रमान तुलाधरलाई एक पत्र लेख्दै असन्तुष्ट खेलाडीलाई राष्ट्रिय टोलीमा नराख्ने बताएका थिए।
किरणसहित १० सिनियर खेलाडी टोलीबाहिर रहँदा यसपटक ४ नयाँ अनुहारले राष्ट्रिय टोलीमा स्थान बनाएका छन्। रक्षक विकास तामाङ र शिव गुरूङसँगै मिडफिल्डर निरकुमार राई र रोशन रानामगरले पहिलोपटक राष्ट्रिय टोलीमा स्थान बनाएका हुन्। यी नयाँ अनुहार पहिलोपटक विदेशी भूमिमा खेल्दैछन्।
त्यसैले पनि जोर्डनविरूद्धको पहिलो खेल नेपालका लागि महत्त्वपूर्ण हुने प्रशिक्षक अल्मुताइरी बताउँछन्। ‘एक टोलीको रूपमा हामी केही गर्न चाहन्छौं। यो खेल नेपाली राष्ट्रिय टोलीका लागि महत्त्वपूर्ण छ। जोर्डनविरूद्धको खेलमा उत्कृष्ट नतिजाका लागि हामीले केही गर्न आवश्यक छ। हामीले जोर्डनलाई रोक्न सक्यौं भने त्यसपछि कुवेत र इन्डोनेसियासँग पनि राम्रो नतिजालाई लक्षित गर्नेछौं,’ उनले भने।
यसअघि नै प्रशिक्षक अल्मुताइरीले नेपालको एसिया कपमा छनोट हुने कुनै सम्भावना नरहेको बताएका थिए। प्रतियोगिताअघि नै नेपालले आफू छनोट नहुने मनस्थिति बनाएको अवस्थामा नेपालको लक्ष्य भने राम्रो खेल्दै २०२६ को विश्वकप र एसिया कप छनोटतर्फ लक्षित हुने छ। मंगलबारको पत्रकार सम्मेलनमा पनि उनले यही कुरा दोहोर्याए।
‘हामी २०२६ को विश्वकप छनोटको तयारी गरिरहेका छौं। हामीसँग ११ जना नयाँ खेलाडी छन्। र, उनीहरूको औसत उमेर २१ वर्ष छ। हामी जोर्डन, कुवेत र इन्डोनेसियासँग राम्रो नजिताका लागि प्रतिस्पर्धा गर्नेछौं। हामी पनि छनोटमा कठिन टोली बन्न चाहन्छौं,’ उनले भने।
नेपालले आफ्नो पहिलो खेल आज बुधबार जोर्डनसँग खेल्ने छ। यस्तै, नेपालले २८ जेठमा कुवेत र ३१ जेठमा इन्डोनेसियासँग प्रतिस्पर्धा गर्नेछ। सन् २०२३ मा चीनमा हुने एसिया कपमा छनोट हुन समूहमा शीर्ष स्थानमा रहनु पर्नेछ। दोस्रो हुने टोलीको पनि छनोट हुने सम्भावना हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1786184812.png)
