काठमाडौं– काठमाडौं महानगरपालिकाका मेयर बालेन शाहले नुवाकोटको सिसडोल क्षेत्रलाई एक हप्ताभित्रै दुर्गन्धमुक्त हुने बताएका छन्।
उपमेयर सुनिता डंगोलसहित शुक्रबार सिसडोल पुगेका शाहले स्थानीयबासीलाई विशेष रसायनिक पदार्थको सहायतामा दुर्गन्ध हटाउने आश्वासन दिएका हुन्।
उक्त तरिकाका विषयमा विज्ञसँग कुरा गर्नुका साथै प्रयोगसमेत गरिरहेको बताए। उनले भने, ‘हाम्रो एकजना वैज्ञानिकले पहिलेदेखि नै स्टडी गर्नुभएको रहेछ। उहाँले महानगर र सहरी विकास मन्त्रालयलाई पहिले पनि भनिसकक्नुभएको रहेछ। उक्त केमिकल फोहरमा राख्दा २० मिनेटमै काम सुरु गर्दो रहेछ। केही ठाउँ प्रयोग गर्यौं। अब बधशालामा ट्राइ गर्दैछौं। त्यहाँ पनि गन्ध नआउने भयो भने यहाँ नआउने बनाउन सकिन्छ।’
उनले फोहोरको व्यवस्थित विसर्जनका लागि भने तीन महिना जति लाग्ने बताए। उनले भने, ‘यो फोहोरको बाइप्रडक्टका रूपमा ग्यास र मल निकाल्न सकिन्छ। त्यसबारे छलफल भइरहेको छ। तीनचार महिना लाग्न सक्छ।’
उनले फोहोर छुट्याएर व्यवस्थापन गर्ने प्रणाली चाँडोभन्दा चाँडो लागू गर्ने बताए। काठमाडौंबाहेक अन्य २३ वटा पालिकाको फोहोर सिसडोलमा आउने बताउँदै सबैलाई कुहिने र नकुहिने फोहोर छुट्याउन महानगरले प्रेरित गर्ने बताए।
घर–घरमा त्यसका लागि जनचेतना फैलाउने उल्लेख गरे। उनले आफू व्यवस्थित बनाउँदै लैजाने तर अहिलेलाई भने फोहोर व्यवस्थापन गर्ने कुरामा सघाउन अनुरोध गरेका छन्।
बञ्चरे डाँडाको विकल्पमासमेत आफूले अध्ययन गरिरहेको बताउँदै केही समय लागे पनि आफूले काम गरिछाड्ने प्रतिबद्धता व्यक्त गरे। सिसडोलका स्थानीयबासीले भने विगतमा गरिएका प्रतिवद्धता समेत कार्यान्वयन नभएको भन्दै फोहोर व्यवस्थापनमा अवरोध गरिरहेका छन्।
मेयर शाह आफ्नो कार्यकालको सुरुवात फोहोर व्यवस्थापनको समस्या समाधान गर्ने लक्ष्यसहित अघि बढेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
