काठमाडौं- नेपाल नागरिक उड्डयन प्राधिकरण (क्यान)ले मौसम सफा नभई आन्तरिक उडानका लागि अनुमति नदिने निर्णय गरेको छ।
आइतबार तारा एअरको विमान दुर्घटना भएसँगै हवाई दुर्घटनाको जोखिम न्यूनीकरणका लागि प्राधिकरणले इन रुट अर्थात् विमान उड्ने र पुग्ने स्थान उडान मार्गको मौसम अनुकूल नभएसम्म उडान अनुमति नदिने निर्णय गरेको हो। मौसम खराबीले तारा एयरको ट्वीनअटर विमान दुर्घटनामा परेको प्राधिकरणले प्रारम्भिक निष्कर्ष निकालेको थियो।
'जल तथा मौसम विज्ञान विभागबाट जारी भएका मौसम सम्बन्धी भविश्यवाणिले कुनै उडान क्षेत्रमा निश्चित अवधिसम्म उडानको लागि प्रतिकुल मौसमको विवरण दिएको अवस्थामा प्राधिकरणले वायुसेवा संचालक र विमानस्थलहरुलाई उडानहरुमा रोक लगाउनको लागि परिपत्र जारी गर्ने' प्राधिकरणको बैठकले निर्णय गरेको छ।
नेपाल नागरिक उड्डयन प्राधिकरणका उपमहानिर्देशक एवं प्रवक्ता देवचन्द्रलाल कर्णले इनरुटको मौसम सफा नभएको अवस्थामा उडानको अनुमति नदिने निर्णय गरिएको जानकारी दिए। उनका अनुसार यस्तो निर्णय भिएफआर (भिजुअल फ्लाइट रुल्स) बाट उडान गर्ने विमान र विमानस्थलका लागि मात्रै लागू हुनेछ।
पहिले विमान उड्ने विमानस्थल र विमान पुग्ने विमानस्थलको मौसम सफा भएमा प्राधिकरणले उडान अनुमति दिने गरेकोमा अब इनरुट मौसम पनि सफा हुनुपर्ने निर्णय गरिएको र यसले हवाई दुर्घटना कम गर्न मद्दत गर्ने विश्वास लिइएको छ ।
त्यस्तै बैठकले एक इञ्जिन भएका हेलिकप्टरको उडानको हकमा नेपाल नागरिक उड्डयन प्राधिकरणले तोके बमोजिमको अवस्थामा बाहेक दुईजना विमानचालक अनिवार्य गर्नको लागि प्रस्ताव तयार गरेर सात दिनभित्र पेस गर्नेगरी पाँच सदस्यीय प्राविधिक टोली गठन गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
