२०७४ फागुन २८ मा अवतरणका क्रममा त्रिभुवन अन्तर्राष्ट्रिय विमानस्थलमा दुर्घटना भएको युएस बंगला एयरलाइन्सको विमान।
काठमाडौं- आइतबार बिहान पोखरादेखि जोमसोमका लागि उडेको तारा एअरको विमान दुर्घटना हुँदा २२ जनाको मृत्यु भएको छ। विमानमा रहेका १९ यात्रु र तीन चालक दलका सदस्य सबैको मृत्यु भएको हो। पछिल्लो १२ वर्षमा नेपालमा भएको यो आठौं विमान दुर्घटना हो।
तारा एयरको उक्त विमानबाहेक सन् २०१० यता नेपालमा सात वटा विमान दुर्घटना भएका थिए। ती दुर्घटनामा १६६ यात्रुको मृत्यु भएको छ।
हिमालको देश भनेर चिनिने नेपालमा विमान दुर्घटनाका घटना बारम्बार हुने गरेको छ। खराब मौसम र पहाड हुँदै जाने अप्ठ्यारो हवाइ मार्ग तथा खोँचका कारण बारम्बार विमान दुर्घटना हुने गरेको हो।
यूएस बंगला दुर्घटना
सन् २०१८ मार्च १२ तारिखमा काठमाडौंको त्रिभुवन अन्तर्राष्ट्रिय विमानस्थलमा यूएस बंगला एअरलाइन्सको विमान दुर्घटना भएको थियो।
यो विमान ढाकाबाट उडेर काठमाडौंमा अवतरण गर्दै थियो। त्रिभुवन अन्तर्राष्ट्रिय विमानस्थलमा अवतरण गर्ने क्रममा दुर्घटना हुँदा ५१ जनाको मृत्यु भएको थियो। विमानमा ७१ जना सवार थिए।
तारा एयरको अर्को विमान दुर्घटना
यो विमान २४ फेब्रुअरी २०१६ मा दुर्घटना भएको थियो। पोखराबाट जोमसोमका लागि उडेको विमान ८ मिनेटपछि बेपत्ता भएको थियो। यसपछि विमानको भग्नावशेष नजिकैको गाउँमा भेटिएको थियो। विमानमा २३ जना सवार थिए। उनीहरु सबैको मृत्यु भएको थियो।
सीता एअरको विमान दुर्घटना
सन् २०१२ मा भएको यो विमान दुर्घटनामा १९ जनाको मृत्यु भएको थियो। विमान काठमाडौंबाट उडेको थियो।
तर, प्राविधिक समस्याका कारण आकस्मिक अवतरण गरिएको थियो। यही क्रममा विमान दुर्घटना भएको थियो र सबै यात्रुको मृत्यु भएको थियो।
अग्नि एअरको विमान दुर्घटना
सन् २०१२ मै अग्नि एयरको डोर्नियर २२८ विमान दुर्घटना भएको थियो। पोखराबाट जोमसोमको लागि उडेको विमान जोमसोम विमानस्थलमा पुग्नेवित्तिकै दुर्घटना भएको थियो। उक्त विमानमा २१ जना सवार थिए। दुर्घटनामा पाइलटसहित १५ यात्रुको मृत्यु भएको थियो।
बुद्ध एअरको विमान दुर्घटना
२५ सेप्टेम्बर २०११ मा बुद्ध एअरको विमान दुर्घटना भएको थियो। विमानमा सवार सबै २२ जनाको ज्यान गएको थियो। जसमा १० भारतीय नागरिक थिए।
तारा एअरको अर्को दुर्घटना
१५ डिसेम्बर २०१० मा तारा एअरको विमान उडान भरेको केही समयपछि दुर्घटना भएको थियो। चालक दलका तीन सदस्यहरूसहित विमानमा सवार सबै २२ जनाको मृत्यु भएको थियो।
अग्नि एअर दुर्घटना
२०१० मै अग्नि एयरको फ्लाइट १०१ को विमान सम्पर्कविहीन भएको थियो। सम्पर्कविहीन विमान दुर्घटनाग्रस्त अवस्थामा फेला परेको थियो। काठमाडौंबाट उडेको विमान २२ मिनेटपछि दुर्घटना भएको थियो। जहाजमा सवार सबै १४ जनाको मृत्यु भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
