चुनावको दिन संसद् भवन अगाडि सिलिण्डर विस्फोट गराएको आरोपमा ४ जना पक्राउ

सुरक्षा/अपराध

नेपाल लाइभ बुधबार, जेठ ४, २०७९ ११:२८

काठमाडौं– स्थानीय चुनावको दिन (वैशाख ३० गते) काठमाडौं नयाँबानेश्वरस्थित संघीय संसद् भवन अगाडि ग्यास सिलिण्डर विस्फोट गराउने काममा संलग्न भएको आशंकामा चार जनालाई पक्राउ गरिएको प्रहरीले जनाएको छ।

पक्राउ पर्नेहरुमा गोरखाको लखन गाउँपालिका–५ घर भएका २९ वर्षीय हरिकृष्ण थापा, काभ्रेको तेमाल गाउँपालिका–९ घर भएका २८ वर्षीय करण श्रेष्ठ, भोजपुरको रामप्रसाद राई गाउँपालिका–६ घर भएका २८ वर्षीय युवराज थापा र खोटाङको कोटेहाङ गाउँपालिका–८ का ३६ वर्षीय बिके सिंह भनिने भरतकुमार राई छन्।

वैशाख ३० गते यो समूहले संसद भवन अगाडि सिलिण्डर राखी आगो लगाएर भागेको थियो। तत्कालै प्रहरी वृत्त नयाँबानेश्वरबाट डीएसपीसहितको टोली खटिएर आगो निभाउँदा विस्फोटबाट हुने सम्भावित क्षति रोकिएको थियो।

विस्फोटबाट बिके कम्प्लेक्समा रहेको दृष्टि आँखा केन्द्र लेखिएको भवन तथा साइन ग्लोबल एजुकेशन कन्सल्टेन्सीको शिशा फुटेको थियो।

यो समूहले संसद भवन अघि विस्फोट गराइ चुनावको पूर्वसन्ध्यामा आतंक फैलाउन खाजेको थियो। उक्त सूचना पाएको प्रहरीले यो समूहको खोजी तीव्र पारेको थियो। उपत्यकामा प्रहरीको विशेष टोली परिचालन गरी ‘अपरेशन इको सेरा’ नाम दिइ अनुसन्धान अघि बढाइएको थियो। अपरेसन इको सेराको टोलीले नै उनीहरुलाई पक्राउ गर्न सफल भएको हो।

पक्राउ परेकामध्ये भरतकुमार यसअघि पनि विभिन्न मितिमा हातहतियार तथा खरखजना, बैंकिङ कसुर तथा कर्तव्य ज्यान मुद्दामा पक्राउ परी कारबाही भएका व्यक्ति भएको खुलेको छ।

कम्युनिस्ट पार्टी अफ नेपाल सियान नामक फेसकुब आइडी समेत यो समूहले प्रयोग गर्दै आएको खुलेको छ। पछिल्लो समय भरतकुमार भूमिगत गिरोह सञ्चालन गर्दै आएको र चन्दा आतंक समेत गर्दै आएको जिल्ला प्रहरी परिसर काठमाडौंका प्रवक्ता तथा एसपी दिनेशराज मैनालीले जानकारी दिए।

उनीहरुको साथबाट प्रहरीले नेपाल कम्युनिष्ट पार्टी (सीवादी) लेखिएको पर्चा, पम्प्लेट, सिलिण्डर विस्फोट गराउन प्रयोग हुने विभिन्न सामानहरु बरामद गरेको छ। त्यसैगरी ८ थान मोबाइल, युवराज थापाको डेराबाट सिवादीको पर्चा, पम्प्लेट बरामद भएका छन्। भरतकुमारको साथबाट बा २२ प २४१९ नम्बरको स्कुटर, कम्युटर, कम्ब्याट ज्याकेट, कम्ब्याट टेपी, झोला बरामद भएको छ।

काठमाडौं उपत्यकाको नक्सा, प्रेस लेखिएको ज्याकेट, कम्युनिस्ट पार्टीको झण्डा, प्लास्टिकको नक्कली पेस्तोल, विभिन्न किसिमका रबर स्ट्याम्पस, मिडियासँग सम्बन्धित कागजातहरुरु बरामद भएका छन्। पक्राउ परेका चारै जनाविरुद्ध विस्फोटक पदार्थसम्बन्धी कसुरमा ७ दिनको म्याद लिएर अनुसन्धान सुरु गरिएको एसपी मैनालीले बताए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

सामसङ नेपालले सार्वजनिक गर्यो ग्यालेक्सी एस२५ सिरिज, प्रि–अर्डर अफर सुरु

सुनको मूल्य २ हजार ३ सयले बढ्यो, कतिमा हुँदैछ कारोवार ?

संसदमा आज: प्रधानमन्त्रीसहित शीर्ष नेताले सम्बोधन गर्ने, विपक्षी दलहरुले अध्यादेशको विरोध गर्ने तयारी