रुकुम पूर्वमा एमाले कार्यकर्ताको हत्या, परिवारको किटानी जाहेरीपछि माओवादी कार्यकर्ता पक्राउ

समाचार

नेपाल लाइभ बुधबार, वैशाख २८, २०७९ १०:५०

काठमाडौं– रुकुम पूर्वमा चुनावी प्रचारप्रसारमा खटिएकी नेकपा एमालेकी एक महिला कार्यकर्ताको हत्या भएको अवस्थामा शव भेटिएको छ। पुथाउत्तरगंगा गाउँपालिका–११ तल्लोसेराकी ३८ वर्षीया ठुँटी बुढा मगर भनिने जुनुमायाको हत्या गरिएको अवस्थामा शव भेटिएको हो।

बैशाख १९ गते उक्त क्षेत्रमा नेकपा एमाले र नेकपा माओवादी केन्द्रका कार्यकर्ताबीच झडप भएको थियो। झडपपछि ती महिला सम्पर्कविहीन भएकी थिइन्। खोजतलास गर्ने क्रममा सोमबार ती महिलाको शव तीन किलोमिटर टाढा जंगलमा भेटिएको थियो। जिल्ला प्रहरी कार्यालय रुकुम पूर्वका प्रमुख प्रहरी नायव उपरीक्षक (डीएसपी) प्रकाश डाँगीले हराइरहेकी महिलाको शव भेटिएको पुष्टि गरे।

‘चुनाव प्रचार प्रसारको क्रममा दुईपक्षबीच सामान्य झडप भएको थियो। घाइतेहरुलाई उपचारमा पठाएर अर्कोदिन सहमतिका लागि आउनुभएको थियो,’डीएसपी डाँगीले भने,‘त्यहाँ दुवै पक्षले आफूहरुका ५ जना कार्यकर्ता हराइरहेको भनेर जानकारी गराउनुभयो।’

उनका अनुसार हराइरहेका भनिएकालाई सम्पर्क गर्ने क्रममा ४ जना आफैं सम्पर्कमा आए पनि महिला भने सम्पर्कमा आएकी थिइनन्। खोजतलास गर्ने क्रममा उनको शव भेटिएको हो।

‘शव भेटिएपछि हामीले पोस्टमार्टम र फरेन्सिक जाँचका लागि बुटवल पठाएका छौं,’डीएसपी डाँगीले भने,‘पोस्टमार्टम रिपोर्टपछि कारण थाहा होला। बाँकी अनुसन्धान भइरहेको छ।’

जुनमायाको शव भेटिएपछि जिल्ला प्रहरी कार्यालय रुकुमपूर्व प्रहरीले घटनाको अनुसन्धानका लागि पुथाउत्तरगंगा गाउँपालिका वडा नम्बर ११ का निवर्तमान वडाध्यक्ष जयकुमार बुढा, उनका भाइ अर्जुन बुढा र माओवादीबाट वडाध्यक्ष उम्मेदवार कुमार सिंह बुढालाई पक्राउ गरेको छ।

डीएसपी डाँगीले मृतक महिलाका परिवारको जाहेरीपछि उनीहरुलाई पक्राउ गरिएको जानकारी दिए। पीडित पक्षले जाहेरीमा अन्य मानिसहरुको नामसमेत किटानी गरेको छ। उनीहरुको खोजी कार्य जारी रहेको प्रहरीले जानकारी दिएको छ।

रूकुम पूर्व जिल्ला अदालतले पक्राउ परेकाहरुमाथि कर्तव्य जानको कसुरमा अनुसन्धानका लागि १० दिनको म्याद थप गरेको छ।

नेकपा एमालेले घटनाको भर्त्सना गर्दै दोषीलाई तत्काल पक्राउ गरी कारबाही गर्न माग गरेको छ। एमाले महासचिव शंकर पोखरेलले विज्ञप्ति जारी गर्दै अपहरण गरेर एकहप्ता बन्धक बनाइ शारीरिक र मानसिक यातना दिइ क्रुरतापूर्वक हत्या गरेको भन्दै घटनाको छानबिन गर्न माग गरेका छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

सामसङ नेपालले सार्वजनिक गर्यो ग्यालेक्सी एस२५ सिरिज, प्रि–अर्डर अफर सुरु

सुनको मूल्य २ हजार ३ सयले बढ्यो, कतिमा हुँदैछ कारोवार ?

संसदमा आज: प्रधानमन्त्रीसहित शीर्ष नेताले सम्बोधन गर्ने, विपक्षी दलहरुले अध्यादेशको विरोध गर्ने तयारी