काठमाडौं–काठमाडौंको शिवपुरी जंगल छेउको तारेभीरमा लागेको आगो नियन्त्रणमा नआएपछि बस्तीमा पस्ने खतरा बढेको छ। मंगलबार दिउँसोभर नियन्त्रणको प्रयास गरिए पनि साँझ फेरि आगो बढेको हो।
जिल्ला प्रहरी परिसर काठमाडौंका प्रमुख प्रहरी वरिष्ठ उपरीक्षक (एसएसपी) सुदिप गिरीले सोमबारदेखि नै आगलागी सुरु भएकोमा मंगलबार दिउँसो नियन्त्रण प्रयास गरिएको बताए।
आगो नियन्त्रणमा लिन गृह मन्त्रालयसँगको समन्वयमा हेलिकोप्टरको प्रयोगबाट पानीसमेत खन्याइएको एसएसपी गिरीले जानकारी दिए। दिउँसो नियन्त्रणकाे स्थितिमा आइसकेको आगो साँझ हावा चलेपछि पुन: फैलिएको उनको भनाइ छ।
'नेपाल प्रहरीसहित नेपाली सेना, सशस्त्र प्रहरीको सहभागितामा आगो निभाउने प्रयास भइरहेको छ। आज (मंगलबार) दिउँसो हेलिकोप्टरबाट पानी पनि खन्याइयो। आगो नियन्त्रणको स्थितिमा आइसकेको थियो, साँझ हावा चलेपछि फेरि फैलियो,' एसएसपी गिरीले नेपाल लाइभसँग भने।
जंगलमा आगो बढे पनि बस्तीमा नपसोस् भनेर आवश्यक सावधानीसहित पूर्वतयारी गरिएको गिरीको भनाइ छ। आगो फैलिन नदिन 'फायर लाइन' कोरिएको र सुरक्षा निकायलाई हाइ अलर्टमा राखिएको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
