फाइल तस्बिर: एमाले डडेल्धुरा अध्यक्ष प्रकाश साउँद र कांग्रेस डडेलधुराका पूर्व जिल्ला सभापति कर्ण मल्ल
डडेलधुरा– नेपाली कांग्रेसका सभापति एवम् प्रधानमन्त्री शेरबहादुर देउवाको गृहजिल्ला डडेलधुरामा कांग्रेसकै एक (विद्रोही) पक्ष र नेकपा एमालेबीच चुनावी तालमेलको सहमति भएको छ।
कांग्रेसका पूर्व जिल्ला सभापति कर्ण मल्ल पक्षधर कार्यकर्ता रहेको वीपी कांग्रेसले एमालेसँग चुनावी तालमेलको सहमति गरेको हो। स्रोतका अनुसार दुवै पक्षबीच ७ वटै स्थानीय तहमा भागबण्डा समेत भइसकेको छ।
एमालेसँग तालमेलको सहमति गरेर वीपी कांग्रेसले जिल्ला सदरमुकाम रहेको अमरगढी नगरपालिकामा हरिप्रसाद भट्टलाई मेयरको उम्मेदवार उठाउने भएको छ। उपमेयरमा नेकपा एमालेका यज्ञराज अवस्थी उम्मेदवार हुने भएका छन्।
२०७४ सालको चुनावमा मेयर र उपमेयर दुवै पद जितेको अमरगढी छाडेर एमालेले परशुराम नगरपालिका लिएको छ। परशुराम नगरपालिकाको मेयरमा एमालेका केशव बोहरा र उपप्रमुखमा पनि एमालेकै उम्मेदवार उठाउने सहमित भएको स्रोतले जानकारी दिएको छ।
अजयमेरु गाउँपालिकाको अध्यक्षमा एमालेबाट पदम पाल र उपाध्यक्षमा वीपी कांग्रेसबाट राजेन्द्र ऐरले उम्मेदवारी दिने भएका छन्। नवदूर्गा गाउँपालिकाको अध्यक्षमा वीपी कांग्रेसबाट गोकुल शाही र तारा खाती उपाध्यक्षको उम्मेदवार हुने भएका छन्।
भागेश्वर गाउँपालिका एमाले नै लिएको छ। यद्यपि अध्यक्ष र उपाध्यक्षका उम्मेदवारबारे टुंगोमा पुग्न नसकिएको एमाले नेताहरुले जनाएका छन्।
प्रधानमन्त्री देउवाको गृहपालिका गन्यापधुरा गाउँपालिकामा भने वीपी कांग्रेसबाट सुरेन्द्र माली अध्यक्षका उम्मेदवार हुने तय भएको छ। उपाध्यक्षमा एमालेबाट इन्द्रबहादुर महरा उम्मेदवार उठ्ने तय भएको वीपी कांग्रेसका एक नेताले नेपाल लाइभलाई जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
