काठमाडौं- जैन धर्मालम्बिहरुको आस्थाका प्रतिक भगवान महावीरको २६२१ औ जन्म कल्याणक राजधानी काठमाडौंमा भव्यताका साथ सम्पन्न भएको छ।
शुक्रबार जैन भवनबाट प्रभातफेरी आयोजना गरिएको थियो भने त्यसपछि अर्चना सभा आयोजना गरिएको थियो।
नेपाल जैन परिषद्को आयोजनामा सम्पन्न उक्त कार्यक्रममा देश तथा बिदेश बाट बिशिष्ट व्यक्तिहरुको उपस्थिति रहेको थियो।
भगवान महावीर जन्मकल्याणक समारोहका मुख्य अतिथिको रुपमा पूर्व उपप्रधानमन्त्रि एवं नेकपा एमालेका वरिष्ठ उपाध्यक्ष ईश्वर पोखरेल रहेका थिए। उक्त समारोहमा दक्षिण भारतका स्वस्ती लक्ष्मीसेन भट्टारक स्वामीको पनि उपस्थिती रहेको परिषद्ले जानकारी दिएको छ।
महावीरले यस धर्तीमा जन्म लिएपछि सुखको अनुभूति भएको लक्ष्मीसेन भट्टारकले बताए। नेपालको काठमार्डाैंमा एक मात्र जैन परिषद् हुनु सुखद् पक्ष भएको उनले जनाए। उनले काठमाडौंमा रहेको एकमात्रै जैन परिषद्ले पनि देशको विकासमा टेवा दिने दाबी गरे। जैन परिवार जहाँ बस्छन् त्यहाँ सुख र शान्तिको महसुस हुने भन्दै उनले महावीर भगवानको सिद्धान्त अपनाउँदै शासन गरे देशमा समृद्धि हुने दाबी गरे।
यसैबीच सानिध्य समणी निर्देशिका मधुर प्रज्ञाले रिस,राग, डाह, जातिगत विभेद, हत्यालगायतका घटना हुन नदिन महावीरको सिद्धान्तलाई अनुसरण गर्नुपर्ने जनाइन्।
महावीरको सन्देशलाई व्यवहारमा लागु गरे राष्ट्रिय तथा अन्तर्राष्ट्रिय जगतकै कल्याण हुने विद्वानहरूको भनाइ छ।
जैन परम्पराले औतारवादलाई नमान्ने बताउँदै मधुर प्रज्ञाले महावीर विचारको पुनर्जन्मको आवश्यकता भएको जनाइन्।
विद्वानहरूका अनुसार महावीरले समस्याबाट नआतिकन संयमता अपनाउन सन्देश दिएका छन्। विरोधी धारको मार्ग नअँगालिकन संयमता अपनाउँदै समस्या समाधानको माध्यम खोजे समाज तथा परिवारमा शान्ति र समृद्धिको बाटो खुल्ने मधुर प्रज्ञाको विश्वास छ। ज्ञान, बुद्धि, अनुशासन,शक्ति,तेज, पवित्रताबाटै मानिस सम्पन्न भएको ठहरिने माहावीरको सन्देश भएको प्रज्ञाले जनाइन्।
समारोहमा पूर्व राज्यमन्त्री एवं सांसद मोति दुगडले महावीरको संयमता र अहिंसाको पाटोको स्मरण गरे। नेकपा एमालेका उपाध्यक्ष एवं पूर्व उपप्रधानमन्त्री ईश्वर पोखरेलले मानिसका सवै कामहरू देखावटी मात्रै नभई व्यवहारिक महत्व दिने खालका हुनु पर्नेमा जोड दिए। महावीरका विचारहरू व्यवहारमा उतार्न आवश्यक भएको बताउँदै उनले अनुयायीहरूले हिंसा, अन्याय अत्याचार, हत्यालगायत सामाजिक विकृतिको विरुद्धमा बोल्नु पर्नेमा जोड दिए।
यस्तै दिन–दुःखीलगायतको पक्षमा बोल्दै महावीरको सन्देशलाई बृहत् रूपमा प्रचारप्रसार गरिनु पर्नेमा उपाध्यक्ष पोखरेलले जोड दिएका छन्। उपाध्यक्ष पोखरेलले नेपालमा कम्युनिष्टका नाममा केही पाखण्डी रहेको जनाए। उनले एमालेले सिद्धान्तअनुसार आमनागरिकको आस्थामा चोट नपुर्याउने दाबी गरे।
जैन परिषदका अध्यक्ष महेन्द्र कुमार जैनको अध्यक्षता भएको कार्यक्रममा पूर्व राज्यमन्त्री रामवीर मानन्धर , परिषद्का निवर्तमान अध्यक्ष फूल कुमार लालवानी , पूर्व अध्यक्ष दिनेश कुमार नौलखा लगायतले बोलेका थिए।
जैन धर्मले देखाएको बाटोले सधै सकारात्मक पथमा अगाडि बढाउने कार्यक्रममा सहभागीले बताए। भगवान महावीरको जम्मकल्याणक सफल भएको र सफल बनाउने सबैलाइ कार्यक्रम संयोजक सुमित जैनले आग्रह गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
