काठमाडौं– प्रहरी अतिरिक्त महानिरीक्षक (एआईजी) बढुवा प्रकरणविरुद्ध तीन डीआईजीले सर्वोच्च अदादलतमा दायर गरेको रिटमा विगतमा पटक–पटक कारबाही भोगेकालाई बढुवा गरिएको खुलाइएको छ।
विगतमा कारबाहीस्वरुप निलम्बनमा परेकालाई समेत सरकारले एआईजीमा बढुवा गरेर एक पटक पनि स्पष्टीकरण समेत नसोधिएकाहरुलाई छुटाइएको उल्लेख गरिएको छ।
गत चैत १ गते गृहसचिव नेतृत्वको बढुवा समितिले वसन्त पन्त, धीरजप्रताप सिंह र रवीन्द्र धानुकलाई एआईजीमा बढुवा सिफारिस गरेको थियो। यसविरुद्ध उजुरी सुन्ने समितिमा उजुरी समेत परेको थियो।
उजुरी सुन्ने समितिले बढुवा सिफारिस समितिकै निर्णय सदर गरेपछि सरकारले उनीहरुलाई एआईजीमा बढुवा गर्ने निर्णय गरेको थियो। त्यसपछि उनीहरुले एआईजीको फुली लगाएर जिम्मेवारी समेत सम्हालिसकेका छन्।
यता, आफूभन्दा जुनियरलाई बढुवा गरिएको भन्दै असन्तुष्ट डीआईजीहरु घनश्याम अर्याल, प्रकाशजंग कार्की र ईश्वरबाबु कार्कीले सर्वोच्चमा रिट दायर गरेका छन्। उक्त रिटमा आफूहरुलाई बढुवा गर्नुपर्ने कारणसहित उनीहरुले मागदाबी गरेका छन्।
एआईजी पद विशिष्ट श्रेणीको नीति निर्माण गर्ने तहको दर्जा भएकोले बढुवा समितिले मूल्यांकन गर्दा आचरण, चालचलन, कारबाहीमा परे/नपरेको अवस्था समेत हेर्नु पर्नेमा त्यो नगरी बढुवा गरिएको आरोप रिटमा लगाइएको छ।
रिटमा उल्लेख गरिएको छ, ‘हाल पदोन्नतिको लागि सिफारिस भएका उम्मेदवारहरु विगतमा धेरै पटक विभागीय कारबाहीमा परेका र कारबाहीका क्रममा निलम्बनमा समेत रहेका कर्मचारी हुन्। कारबाहीमा परेकालाई बढुवा सूचीमा समावेश गर्ने तर सेवा अवधिभर एउटै स्पष्टीकरण समेत दिनु नपर्ने गरी जिम्मेवारी पूरा गर्नेलाई बढुवामा छुटाइएको छ।’
बढुवा सिफारिस भएकामध्ये धीरजप्रताप सिंह र रवीन्द्र बहादुर धानुक भन्दा ११ महिनाअघि सेवा प्रारम्भ गरेको र वरिष्ठतामा उनीहरुभन्दा माथि नै कायम रहेको, डीएसपीमा ३ वर्षको जेष्ठता, एसपीमा २ वर्षको जेष्ठता, एसएसपी र डीआईजीमा पनि वरीयताक्रममा अगाडि हुँदाहुँदै छुटाइएको रिटमा उल्लेख गरिएको छ।
बढुवाका लागि योग्य र अंकभार समेत बढी हुँदा पूर्वाग्रह राखी भेदभाव गरी अवसरबाट वञ्चित गराइएको रिटमा उल्लेख गरिएको छ।
‘बढुवा सूचीमा परेका केही उम्मेदवारहरू अधिक अंक प्राप्त गरेको। तथापि, मभन्दा कम योग्य व्यक्तिलाई बढुवा गर्दै मलाई बढुवाबाट बञ्चित गर्ने गरी सिफारिस गरिएकोले सो बदर गरी विपक्षीभन्दा योग्यतम र अधिकतम अंक प्राप्त गर्ने म निवेदकलाई बढुवा गरी पाऊँ’, रिटमा उल्लेख गरिएको छ।
बढुवा सिफारिस गरिएका केही उम्मेदवारभन्दा अधिक अंक हासिल गर्दा समेत बढुवा समितिले प्रदान गर्ने ७.५ अंक मनोगत ढंगबाट दिई बढुवा हुनबाट बञ्चित गराइएको आरोप रिटमा उल्लेख गरिएको छ। एक डीआईजीको रिटमा उल्लेख गरिएको छ, ‘स्नातकोत्तर उपाधि विशिष्ट श्रेणीमा हासिल गरेता पनि द्वितिय श्रेणी वापतको अंक दिएको, अन्य अंकहरु पनि छुटाइएको हुनसक्ने अवस्था छ।’
उजुरी सुन्ने समितिले बढुवा समितिले दिएका अंक रिटोटलिङ मात्र गर्ने हो भन्ने व्याख्या गर्न नमिल्ने उल्लेख गरिएको छ। ‘यति ठूलो ओजस्वी समितिले केवल अंक मात्र जोड्ने काम नगरी प्राप्त गर्नुपर्ने अंक प्राप्त नगरेको वा प्राप्त नगरेको अंक प्राप्त गरेको आधारमा बढुवा समितिले संशोधन गर्नु पर्ने देखिएमा सो समेत गरी बढुवा समितिसमक्ष पठाउनु पर्ने भन्ने कानुनी व्यवस्थाको पूर्ण वेवास्ता गर्न मिल्दैन’, रिटमा उल्लेख गरिएको छ।
त्यसैगरी, प्रहरीमा यसअघि भएका बढुवाविरुद्धका नजीर समेत रिटमा पेश गरिएको छ। नवराज सिलवाल, यादव अधिकारीलगायतले दायर गरेको रिटहरुको नजीर समेत पेस गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1748936216.png)
