शोषण, अपराध, अत्याचार, यौन हिंसा हरेक क्षेत्रमा छ। तर, चलचित्र क्षेत्रमा भएका गतिविधि चर्चाको विषय बन्छन्। किनभने ‘सेलिब्रेटी’ जोडिन्छन्। सेलिब्रेटीमाथि आमजन र सञ्चार क्षेत्रको चासो हुन्छ।
सबैको चासोको विषय हुने चलचित्र क्षेत्र अनि ‘पब्लिक फिगर’ भनेर चिनिने कलाकारहरुका निजी जीवनका कुरा निजी रहँदैनन्। उसै त ‘ग्ल्यामर’, ‘रंगिन’ दुनियाँ भनेर चिनिने यो क्षेत्र आजभोलि झन्–झन् बदनाम हुँदै गएको। एक चलचित्र पत्रकार हुनुको नाताले एउटा क्षेत्रमाथि नै संशय सिर्जना गर्ने यस्ता घटनाले मन अमिलो बनाउने रहेछ।
मनोरञ्जन उद्योगले मनोरञ्जन दिने हो। समाजको वास्तविकतालाई पर्दामा प्रस्तुत गर्ने हो। कला र संस्कृति पनि जोडिने भएकाले सामाजिक उत्तरदायित्वबाट भाग्न मिल्दैन। मनोरञ्जन भनेको यौन होइन। तर, कहिलेकाहिँ मनोरञ्जन र यौन पर्याय जसरी जोडिएर आउँछ।
भित्र–भित्रै यो क्षेत्रमा ‘कास्टिङ काउच’, ‘ह्यारेसमेन्ट’ र ‘म्यानिपुलेट’ले घर बनाउनुमा कसको गल्ति छ? कलाकारिताको पर्यायवाची जस्तो किन बनिरहेको छ?
आजभोलि विभिन्न रियालिटी शो, कार्यक्रम र प्लेटफर्ममार्फत् प्रतिभावान बालबालिकाहरु कलाकारितामा आइरहेका छन्। सानै उमेरमा छलाङ मार्दैछन्। सेलिब्रेटी बन्दैछन्। नाम र दाममा प्रगति गरेका छन्। उनीहरुको चिचिलो मगजलाई कसैले बिगार्छ कि ? उनीहरुको शोषण हुँदैछ कि? भन्नेमा कोही सतर्क छ? (धेरैका आमाबाबु त बच्चाको प्रगतिले दङ्ग हुन्छन्। कतिलाई यो क्षेत्रमा केसम्म हुन सक्छ भन्ने हेक्का पनि छैन विचरा!)
यहाँ त परिपक्व भनिएकाहरुले आफ्नो स्वार्थ पूरा गर्न उनीहरुमध्ये कतिपयलाई प्रयोग गर्दैछन्। वास्तवमा उनीहरुको अभिभावक र मेन्टरको भूमिकामा हुनुपर्ने हो। जब वास्तविकता बाहिर आउन–आउन खोज्छ, तब अनेक तवरले घटनालाई भित्रभित्रै दबाउन कोसिस हुन्छ।
पीडितलाई डर, धम्की वा लोभ देखाएर चुप लाग्न बाध्य पारिन्छ। किनभने समाजले पीडकहरुको विर्यमा अहमता भरिदिएको छ अनि नारीको इज्जत भने ‘कसिलो यौनीमा’ जोखिदिएको छ। (चर्चामा आएकी नाबालिग गायिकाको केसमा पनि यही हो।)
सामाजिक सञ्जाल हेर्यो, हेरिसाध्य छैन। अझ विशेषगरी कमेन्टमा पोखिएका विचारहरु! हामी यौनका विषयमा कुरा गर्न लाज मान्छौं। बालबालिकालाई यौन दुर्व्यवहार र उमेर पुगेपछिको शारीरिक सम्पर्कको बारेमा अब पनि राम्रो शिक्षा दिन सकेनौं भने यस्ता घटना अझै कति आउँछन् कति!
१३–१९ उमेर नै अलि अव्यवस्थित हुन्छ। शारीरिक र मानसिक रुपमा एकप्रकारको उथलपुथलको उमेर। यो समयमा किशोर किशोरी जोगाउनु अत्यन्तै गाह्रो कुरा हो। यतिबेला उनीहरुलाई ‘स्पर्श’, ‘अट्याचमेन्ट’ र ‘प्रेम’को भेद छुट्टाउन नसक्ने अवस्थाबाट सक्नेतर्फ लैजानु परिवार र अन्य वयश्कको कर्तव्य हो। (यी नाबालिग गायिका प्रेमका नाममा जसरी बहकिइन्।)
गलत प्रवृतिको बिरोध गर्न डराउने, आफूलाई पर्दा रोइकराइ गर्ने अनि अरुलाई पर्दा सस्ता र भद्दा टिप्पणी गर्ने तपाईं हाम्रा स्वभाव पनि कम्ति दोषपूर्ण छैन। (सम्बन्धित केसमा सत्यतथ्य बाहिर ल्याउनु पत्रकारको कर्तव्य हो। उल्टै ढाकछोप गर्न मतियार बनेका केही पत्रकार साथीहरु देखेर उदेक लागेर आयो।)
महिलाले भोग्ने यस्तै विषयमा बोल्यो भने खुब जान्ने भकी ‘महिलावादी’ भन्ने ट्याग लाग्छ। ए बाबा, कसैको हितका लागि बोल्नु महिलावादी हुनु हो ? हामी हाम्रो शरीरमा बेरिएको साङ्लो काट्न चाहन्छौं, पुरुषको घाँटी होइन। हामीले कल्पना गरेको सुन्दर समाजलाई यथार्थमा परिणत गर्न अनि यस्ता विकृति अन्त्य गर्न तपाईंहरुसँगै हुन चाहन्छौं।
पल शाह र ती नाबालिगको विषयमा सत्यतथ्य बाहिर आउन जरुरी छ। प्रहरीमा जाहेरी नै परेपछि अनुसन्धानले सत्यतथ्य उजागर गर्ने नै छ। हालका आरोपी पल कसूरदार ठहरिए हदैसम्मको कारबाही हुनुपर्छ। डर, इज्जत वा अन्य कारणले बोली फेरिरहे पनि अन्त्यमा जाहेरी दिएकोमा ती गायिका र उनको परिवारलाई सलाम छ। (फेरबदल भैरहेको उनको अभिव्यक्तिले पनि धेरैलाई अलमलमा चाहिँ अझै पारेकै छ।)
सामाजिक सञ्जालमा उनको हितमा आफ्ना विचार स्पष्ट राख्ने व्यक्तिहरुलाई हार्दिक धन्यवाद। आउनुहोस् अबको दिनमा उनी र उनी जस्तैलाई पश्चातापभन्दा पनि उच्च मनोबलका साथ स्वतन्त्रपूर्वक जीवन अघि बढाउने वातावरण सिर्जना गरौं।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1766648928.png)
