जेलबाट छुटेर ‘हिमाल सुरक्षा परिषद्’ खडा गरी आतंक मच्चाउने ९ जना पक्राउ

सुरक्षा/अपराध

जेलबाट छुटेर ‘हिमाल सुरक्षा परिषद्’ खडा गरी आतंक मच्चाउने ९ जना पक्राउ बम राख्न पुजारीदेखि ट्युबेल गाड्ने मजदुरसम्मको प्रयोग

नारायण अधिकारी बिहीबार, फागुन ५, २०७८ २१:२२

काठमाडौं– चन्दा असुलीको नाममा गैरकानुनी क्रियाकलाप गर्दै आएको एक समूह पक्राउ परेको छ। चन्दा असुलीका लागि बम जस्तो देखिने शंकास्पद वस्तु (होक्स) राख्दै आतंक सिर्जना गर्ने समूहलाई प्रदेश १ को प्रहरी टोली, जिल्ला प्रहरी कार्यालय झापा र इलाका प्रहरी कार्यालय अनारमणिको टोलीले पक्राउ गरेको छ।

पक्राउ पर्नेहरुमा झापाको गौरादह नगरपालिका–२ का ३८ वर्षीय सुमन कुमार कार्की, झापाकै कन्काई नगरपालिका–३ का ४१ वर्षीय भीष्म थापा, दमक नगरपालिका–९ का ५० वर्षीय देवी बाँस्कोटा (गुरागाईं), कन्काई नगरपालिका–३ का ५८ वर्षीय कुमार भनिने यमदत्त सिटौला, शिवसताक्षी नगरपालिका–१ का ३२ वर्षीय सरुण लिम्बू भनिने दिलकुमार सामेखाम, संखुवासभाको खाँदबारी नगरपालिका–१० का २९ वर्षीय मनमोहन दाहाल, गौरीगञ्ज नगरपालिका–३ का ३२ वर्षीय आनन्द भनिने अनन्त प्रसाद गिरी, गौरादह नगरपालिका–५ का ३३ वर्षीय प्रदीप थापा र गौरीगञ्ज–३ का ४५ वर्षीय विजयकुमार दास हलुवाई छन्।

पक्राउ परेकाहरुविरुद्ध मुलुकी अपराध संहिता २०७४ को परिच्छेद ७ को विष्फोटक पदार्थ सम्बन्धी कसूर अन्तर्गत झापा जिल्ला अदालतबाट म्याद लिई थप अनुसन्धान भइरहेको प्रहरीले जनाएको छ।

उनीहरुबाट मोबाइल, हिमाल सुरक्षा परिषद नेपाल, इन्चार्ज केन्द्रीय कमिटी, इन्चार्ज कोशी अञ्चल कमिटी, अध्यक्ष कोशी अञ्चल कमिटी, अध्यक्ष मेची अञ्चल कमिटी, ईन्चार्ज मेची अञ्चल कमिटीका हस्ताक्षर मात्र भएका छापहरु १० थान बरामद भएका छन्।

नेपाल ईन्भेष्टमेन्ट बैंक लिमिटेडको चेकबुक १ थान, नेपाल बैंक लिमिटेडको चेकबुक १ थान, खोप कार्ड १ थान, एनसेल सिम १, एनटीसी सिम १थान, हिमाल सुरक्षा परिषद् नेपाल लेखिएको पर्चालगायतका कागजात बरामद भएको छ।

‘हिमाल सुरक्षा परिषद्’ संगठित रुपमा आपराधिक गतिविधि गर्नका लागि खडा गरिएको अनुसन्धानबाट खुलेको छ। विगतको ‘गोरखा जनमुक्ति पार्टी’को नामबाट आपराधिक गतिविधि गर्ने समूहले नै कारागारबाट छुटेपछि नाम परिवर्तन गरी ‘हिमाल सुरक्षा परिषद्’ राखेर चन्दा आतंक सिर्जना गरेको अनुसन्धानबाट पुष्टि भएको एक उच्च प्रहरी अधिकारीले बताए।

बम राख्न पुजारीदेखि ट्युबबेल गाड्ने मजदुरसम्मको प्रयोग
पक्राउ परेकामध्ये कार्की मुख्य योजनाकार रहेको पाइएको छ। ठेक्कापट्टा गर्दै आएका उनी वैदेशिक रोजगारी सम्बन्धी ठगी मुद्दामा २०७५ वैशाखदेखि २०७७ फागुनसम्म २२ महिना झापा जिल्ला कारागारमा बसी छुटेको व्यक्ति हुन्।

गत असार १९ गते इलाका प्रहरी कार्यालय दमकबाट खटिएको टोलीले गौरादह नगरपालिका–२ स्थित उनकैै घरबाट ३० ग्राम लागू औषध ब्राउन सुगर बरामद गरेको थियो। उनी भने फरार भएका थिए। लागू औषध मुद्दामा कार्कीविरुद्ध झापा जिल्ला अदालतबाट पक्राउ पूर्जी समेत जारी भइसकेको छ।

कार्कीले बम आतंक देखाएर पैसा चन्दा उठाउने योजना बनाउने तथा भारतमा बसी आर्थिक संकलन गरी आपराधिक गतिविधिमा प्रयोग गर्ने गरेको खुलेको छ। उनको साथबाट हिमाल सुरक्षा परिषद्को पर्चा, पम्प्लेट, स्ट्याम्प, चन्दा माग्न प्रयोग भएको सिमकार्डहरु र आर्थिक सहयोग गरिदिने बारेको पत्र समेत बरामद भएको झापाका डीएसपी वसन्त पाठकले बताए। उनलाई फागुन २ गते गौरीगञ्ज गाउँपालिका–५ स्थित नेपाल–भारत सिमानाको दश गजा क्षेत्रबाट पक्राउ गरिएको हो।

भीष्म थापा भने ट्युबेल गाड्ने काम गर्ने व्यक्ति हुन्। गत माघ ९ गते बिहान ४ बजेतिर बिर्तामोड नगरपालिका–४ स्थित पश्चिम बस स्टेण्डमा उनैले प्रेसर कुकर बम राखेको पाइएको डीएसपी पाठकले बताए। योजनाकारहरुले थापालाई मोटरसाइकल किनिदिने प्रलोभन देखाई शंकास्पद वस्तु प्रेसर कुकर बिर्तामोड पश्चिम बस स्टेण्डमा राख्न अह्राएको उनको भनाइ छ।

बम राख्ने दिन बिहान ३ बजेतिर सुरुङ्गाको चाराली चोकबाट साइकलमा उक्त शंकास्पद वस्तु प्रेसर कुकर र हिमाल सुरक्षा परिषद्को पर्चा पम्प्लेटहरु लिई बिर्तामोडको पश्चिम बसस्टेण्डमा राखेको अनुसन्धानबाट खुल्न आएको छ। उनलाई माघ २८ गते कन्काई नगरपालिका–३ बाट पक्राउ गरिएको हो।

देवी बाँस्कोटा भने दमक नगरपालिका–३ मा चिया पसल सञ्चालन गर्दै आएकी महिला हुन्। उनी हिमाल सुरक्षा परिषदसँग आवद्ध रही शंकास्पद वस्तु प्रेसर कुकर राख्ने योजनामा संलग्न रहेको प्रहरीले जनाएको छ। माघ ८ गते देवीले नै केर्खा चोकमा रहेको १ पसलबाट ४ वटा प्रेसर कुकर खरिद गरी मुख्य गिरोहलाई उपलब्ध गराई विष्फोटन गतिविधिमा सहयोग गरेको झापाका एसपी विश्वमणि पोखरेलले बताए।

उनको दमक ९ चिया दोकानस्थित घरबाट घटनामा प्रयोग भएको प्रेसर कुकरको कार्टुन, चन्दा माग गर्न प्रयोग भएको मोबाइल तथा समूहको गतिविधिमा शंकास्पद देखिएको चेकहरु समेत बरामद भएको छ। देवीलाई माघ २९ गते उनकै चिया पसलबाट पक्राउ गरिएको हो।

यता, कुमार भनिने यमदत्त कन्काई नगरपालिका–४ कोटीहोममा पुजारी काम गर्ने व्यक्ति हुन्। ग्रेटर नेपालको माग राखी शंकास्पद बस्तु प्रेसर कुकर राखेको अभियोगमा कारागार बसी छुटेका एक व्यक्तिसँग कुमारको नजिकको सम्बन्ध छ। उनीसँग मिली कुमारले हिन्दू राज्य र राजतन्त्र पुनःस्थापनाको माग राखी कोटीहोमस्थित आफ्नो कुटीमा पटक पटक बैठक बसी आफ्नो छिमेकी हाल पक्राउ परेका भीष्म थापालाई बम राख्ने कार्य गर्नका लागि मोटरसाइकल किनिदिने प्रलोभन देखाई बम राख्न लगाएका थिए। उनलाई कोटीहोमबाटै पक्राउ गरिएको हो।

सरुण लिम्बु भन्ने दिलकुमार सामेखाम विगतमा लागू औषध मुद्दामा ५ बर्ष कैद सजाय पाई कारागारबाट छुटेको रहेको अनुसन्धानबाट खुलेको छ। हिमाल सुरक्षा परिषद् नामक समूहको गतिविधिको लागि झापा र मोरङ जिल्लाका विभिन्न स्थानबाट चन्दा उठाउने काममा उनी संलग्न रहेको खुलेको छ। मनमोहन दाहालबाट रकम लिई भारत बिहार राज्यको अररिया जिल्लास्थित कलियागञ्जसम्म पुगेर पार्टीको गतिविधि सञ्चालन गर्न रकम उपलब्ध गराई सहयोग पुर्‍याउँदै आएको खुलेको छ। विर्तामोड र दमकमा शंकास्पद प्रेसर कुकर राख्ने कार्यमा उनको संलग्नता देखिएको छ। फागुन १ गते उनलाई कन्काई–३ बाट पक्राउ गरिएको हो।

मनमोहन दाहालले भने हिन्दू राज्य नेपाल र राजतन्त्र पुनःर्स्थापनाको माग राखी झापाको विर्तामोड पश्चिम बस स्टेण्डमा गत माघ ९ गते र दमकमा माघ १३ गते प्रेसर कुकर बम राख्ने योजना बनाई संग्लग्न गिरोहलाई रकम समेत उपलब्ध गराएको अनुसन्धानबाट खुलेको छ।

उक्त कार्य गर्नका लागि दाहालले ग्रेटर नेपालको माग राखी २०७६ वैशाख २८ गते झापाको माइधारस्थित कन्काई पुलमा बम जस्तो देखिने शंकास्पद वस्तु प्रेसर कुकर राखेको अभियोगमा कारागार बसी छुटेको एक व्यक्तिलाई परिचालन गरेको खुलेको छ। उनलाई फागुन २ गते सुन्दरहरैचा नगरपालिका–६ बाट पक्राउ गरिएको हो।

प्रदीप थापा र आनन्द भन्ने अनन्त प्रसाद गिरीले हिमाल सुरक्षा परिषद्को नामबाट विष्फोटक पदार्थ जस्तो देखिने शंकास्पद प्रेसर कुकर राख्न योजना बनाउने, चन्दा माग गर्ने गिरोह भारत बिहार राज्यको अररिया जिल्लाको कलियागंज बस्ने गरेकोमा निजले सीमा नाकामा बसी सो गतिविधिमा संग्लग्न व्यक्तिहरुलाई उनको भूमिकामा रही सहयोग पुर्‍याउँदै आएको खुलेको छ। थापा र गिरीलाई फागुन २ गते गौरीगञ्ज गाउपालिका–५ स्थित नेपाल–भारत सिमानाको दश गजा क्षेत्रबाट पक्राउ गरिएको हो।

विजय कुमार दास हलुवाईले हिमाल सुरक्षा परिषद्को नाममा अन्य सकृय सदस्यले संकलन गरेको पैसा आइएमईबाट प्राप्त गरी भारतको बिहार राज्यको कलियागन्ज बस्दै आएका योजनाकारहरुसम्म पैसा पुर्‍याउने काम गरेको खुलेको छ। उनलाई फागुन ३ गते गौरीगञ्ज नगरपालिका–३ बाट पक्राउ गरिएको हो।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।