फाइल तस्बिर
काठमाडौं- राष्ट्रिय खेलकुद परिषद् (राखेप)का बोर्ड सदस्यहरूले बैठक तत्काल बोलाउन माग गरेको ज्ञापनपत्र लिन युवा तथा खेलकुदमन्त्री महेश्वरजंग गहतराजले अस्वीकार गरेका छन्।
बिहीवार राखेप बोर्ड सदस्य तत्काल बोर्डको बैठक बोलाउन माग गर्दै ज्ञापनपत्र लिएर मन्त्रालय पुगेका थिए। तर, उक्त पत्र लिन मन्त्री गहरतराजले अस्वीकार गरेको राखेपका कार्यकारी बोर्ड सदस्य एकेन्द्रबहादुर कुँवरले जानकारी दिए। '
राष्ट्रिय खेलकुद परिषद्मा भइरहेको अन्योलताको निकासका लागि तत्काल बैठक बोलाउन माग गर्दै खेलकुद मन्त्रीलाई ज्ञापनपत्र बुझाउन खोजेका थियौं। तर, उहाँले बुझ्न अस्वीकार गर्नुभएपछि मन्त्रालयको सचिवालयमा ज्ञापनपत्र दर्ता गराएका छौं,’ उनले नेपाल लाइभसँग भने।
उनका अनुसार ज्ञापनपत्रमा राष्ट्रिय खेलकुद परिषद्मा भइरहेको अन्योलताको निकासका लागि तत्काल बैठक बोलाउन माग गरिएको छ।
'बैठक नबसेको लगभग डेढ वर्ष हुन लागेको छ। त्यस कारणले गर्दा यो बोर्डको बैठक छिटोभन्दा छिटो बोलाइयोस् भनेर अनुरोध गरेका छौं। सदस्य सचिव नभएको खण्डमा ऐनअनुसार उपाध्यक्षले पनि बोर्डको बैठक राख्न सकिन्छ,’ उनले भने।
सत्ता समीकरण फेरिएपछि प्रधानमन्त्री शेरवहादुर देउवा सरकारले राष्ट्रिय खेलकुद विकास ऐन, २०७७ अनुसार पूर्व प्रधानमन्त्री केपी शर्मा ओली सरकारले नियुक्त गरेको निवर्तमान सदस्य सचिव रमेशकुमार सिलवाललाई गत कार्तिक १ गते बर्खास्त गरेको थियो।
त्यसपछि नयाँ खेलकुद विकास ऐन अनुसार प्रक्रियागत तरिकाले २०७८ मंसिर १३ गते मन्त्रिपरिषद्को निर्णयले नेकपा (माओवादी केन्द्र) नजिक रहेका टंकलाल घिसिङ्गलाई सदस्य सचिवमा नियुक्त गरेको थियो।
सिलवालले आफू नयाँ खेलकुद विकास ऐन २०७७ अनुरुप खुला प्रतिस्पर्धाबाट राखेप सदस्य सचिव पदमा आएको र वर्तमान सरकारले बिना कारण नै पदबाट बर्खास्त गरेको भन्दै नयाँ सदस्य सचिवको नियुक्ति रोक्न भन्दै सर्वोच्च अदालतमा मुद्दा दर्ता गराएका थिए।
सिलवालले दर्ता गराएको मुद्दाको ५ पटक पेशी तोकिएपनि कुनै निर्णय आउन सकेको छैन। सदस्स्यसथिव सम्बन्धिको मुद्दा अदालतमा विचाराधिन रहिरहँदा अहिले नेपाली खेलकुद गतिविधि प्राय: शून्य बनेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1767959997-1767968077.jpg)
-1764146706.png)
