काठमाडौं– नेपाल बार एशोसिएसनका पूर्वमहासचिव सुनिल पोखरेलले संविधान र कानुनमा स्थानीय तहको निर्वाचन गर्ने विषयमा प्रष्ट व्यवस्था भएको बताएका छन्।
नेकपा एमालेको विद्यार्थी संगठन अनेरास्ववियुले समयमा नै स्थानीय तहको निर्वाचन हुनुपर्ने भन्दै आयोजना गरेको सडक बहस कार्यक्रममा उनले यस्तो बताएका हुन्।
‘जेठ ५ गतेभित्र निर्वाचन भएन भने ६ गतेपछि अहिलेका जनप्रतिनिधि बहाल रहँदैनन्। जस्तो; प्रधानमन्त्रीको पद गयो भने अर्काे नआउन्जेल काम चलाऊका रुपमा काम गर्न पाउँछन्,’ उनले भने, ‘स्थानीय तहको विषयमा हामीले त्यस्तो कुनै व्यवस्था नै गरेका छैनौं। समयमा निर्वाचन गर्नुको विकल्प छैन।’
जेठ ६ पछि स्थानीय तह खाली हुने र त्यसपछिको अवस्था सहज नहुने उनको भनाइ छ। ‘हिजोको जस्तो सर्वदलीय संयन्त्रका रुपमा काम गर्ने भन्ने हुँदैन। निर्वाचन भएन, नयाँ पदाधिकारी आएनन् भने स्थानीय तहले गर्ने काम सबै अवरुद्ध हुन्छ,’ उनले भने, ‘स्थानीय तहलाई निक्कमा बनाउने हो भने चुनाव नगरे भयो। नत्र समयमा नै निर्वाचन गर्नु आवश्यक हुन्छ।’
उनले संविधान र कानुनले नै प्रष्ट रुपमा जेठ ६ मा नयाँ पदाधिकारी आउनु पर्ने उल्लेख गरेको भन्दै अन्योल कायम गर्नुपर्ने कुनै आवश्यकता नरहेको बताए।
अनेरास्ववियुले समयमा नै स्थानीय तहको निर्वाचन गर्न माग राख्दै चरणबद्ध आन्दोलन गरिरहेको छ। प्रदर्शनीमार्गमा बुधबार अनेरास्ववियुले सडक बहस गरिरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
