म्याग्दी – म्याग्दीको बेनी नगरपालिकाले तीन वटा वडाको कार्यालय भवन निर्माण गरेको छ। बेनीमा वडा नम्बर ७ र ८ तथा पात्लेखेतमा १० नम्बर वडाको कार्यालय भवन निर्माण गरिएको हो। नगरपालिकाको १, २, ३, ४, ५ र ९ नम्बर वडाको यसअघि नै भवन थिए।
पात्लेखेत र वाखेत गाउँको सिमानामा रु २० लाख खर्चेर हालै १० नम्बर वडाको तीन कोठे एक तले भवन निर्माण भएको थियो। बेनीको सामुदायिक चोकमा गत वर्ष वडा नम्बर ७ को भवन बनेको थियो।
सात नम्बर वडाको भवनमा तला थप गर्न चालु आर्थिक वर्षमा विनियोजन भएको रु आठ लाख बजेट कार्यान्वयनका लागि ठेक्का सम्झौता भएको नगर प्रमुख हरिकुमार श्रेष्ठले जानकारी दिए।
नगरपालिकाले क्याम्पसचोकको भलबाढी ब्यवस्थापनका लागि अधिग्रहण गरेको जग्गामा रहेको घरलाई पुनर्निर्माण गरेर यसै महिनादेखि ८ नम्बर वडाको कार्यालय सञ्चालन गरिएको वडा अध्यक्ष रामकृष्ण बराइलीले जानकारी दिए।
नगरपालिकाले गत वर्ष क्याम्पसचोकको भलबाढी ब्यवस्थापन गर्न रु एक करोड २१ लाखमा चार आना जग्गा र त्यहाँ रहेको घर अधिग्रहण गरेको थियो। क्याम्पसचोकका वासिन्दाले रु २१ लाख सङ्कलन गरेर नगरपालिकालाई उपलब्ध गराएका थिए।
अधिग्रहण भएको घरको भुइतलामुनि भूमिगत नाला बनाएर बाढी ब्यवस्थापन गर्ने बनाइएको छ। भुइतलाको सटरसहित तीन वटा कोठा भाडामा लगाउन मासिक न्युनतम रु ३० हजार भाडा कायम गरेर प्रस्ताव आव्हान गरेको छ।
पहिलो तलाको तीन वटा कोठामा वडा कार्यालय स्थापना गरिएको हो। भवन पुनर्निर्माण गरेर कार्यालय स्थापना गर्न रु दश लाख खर्च भएको वडा अध्यक्ष बराइलीले बताए। नयाँ भवन निर्माण भएपछि सेवा प्रवाह, कार्यालय सञ्चालन, भेला, बैठक आयोजना गर्न सहज भएको छ।
आर्थिक वर्ष २०७६/७७ मा अर्थुङ्गेमा सुरु भएको वडा नम्बर ६ को भवन निर्माण कार्यलाई पूर्णता दिन चालु आर्थिक वर्षमा बिनियोजन भएको रु बीस लाख बजेटको काम गर्न ठेक्का लागेको इञ्जिनियर विमलरञ्जन कार्कीले बताए। गत वर्ष नगरपालिकाको भवन परिसरमा विषयगत शाखा कार्यालयहरुका लागि नयाँ प्रशासकीय भवन निर्माण भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1773729220.png)
-1773728847.png)
-1764146706.png)
-1773643707.png)
