काठमाडौं- सडक विस्तारको क्रममा खनेको खाल्डोमा परेर एक सिंगे गैँडा मरेको सन्दर्भमा चितवन राष्ट्रिय निकुञ्जले निर्माण व्यवसायीलाई पक्राउ पुर्जी जारी गरेको भन्दै नेपाल निर्माण व्यवसायी महासंघले आपत्ति जनाएको छ।
निर्माण व्यवसायी महासंघले एक विज्ञप्ति जारी गरि पक्राउ पुर्जी जारी गर्ने र पक्राउ गर्ने काम तत्काल रोक्न सरकारसँग माग गरेको छ।
सडक विस्तारको काम भइरहेको महेन्द्र राजमार्गको नारायणगढ पुल्चोकदेखि गोन्द्राङसम्मको खण्डमा आइतबार खाल्डोमा परेर एक सिंगे गैँडा मरेको थियो। सो खण्डको काम गरिरहेको इन्डो सगुन जेभीका सञ्चालक सहदेव खड्काविरुद्ध चितवन निकुञ्ज कार्यालयले बुधबार पक्राउ पुर्जी जारी गरेको थियो।
पक्राउ पुर्जी जारी भएपछि निर्माण व्यवसायी महासंघका महासचिव रोशन दाहालले विज्ञप्ति निकालेर आपत्ति जनाएका हुन्। पक्राउ पुर्जी जारी भएपनि अहिलेसम्म कसैलाई पनि पक्राउ भने गरिएको छैन।
सडक विस्तार गर्दा राष्ट्रिय निकुञ्ज तथा वन्यजन्तु संरक्षण ऐन नियमविपरीतका कुनै पनि कामकारबाही नभएको दाहालले जारी गरेको विज्ञप्तिमा उल्लेख छ। निर्माण सम्झौता बमोजिम नै निर्माण कम्पनीले सम्पूर्ण सुरक्षाका मापदण्ड अपनाइएको महासंघको दाबी छ।
निर्माणस्थलमा कंक्रिटको नाली बनाइसकेपछि पूर्णरूपमा सेट हुनका लागि प्राविधिक रूपमा केही दिन खुल्लै राख्नुपर्ने प्रावधान रहेकोले नाली नपुरिएको र सम्झौताबमोजिम कम्पनीले साइट सुरक्षाका मापदण्ड र उपायहरू पालना गरेको महासंघले दाबी गरेको छ।
गैँडाको निधनको विषयलाई लिएर निर्माण व्यवसायीलाई समेत आरोपित गरी गैर कानुनी रूपमा सम्बन्धित निकायबाट कारबाही अगाडी बढाइएको भन्दै महासंघले आपत्ति जनाएको हो।
महासचिव दाहालले जारी गरेको विज्ञप्तिमा भनिएको छ, 'गैँडाको निधन भएको पाइएको विषयलाई लिएर निर्माण व्यवसायीको तर्फबाट राष्ट्रिय निकुञ्ज तथा वन्यजन्तु संरक्षण ऐन नियम विपरीत हुने कुनै पनि कामकारबाही नभएको र निर्माण सम्झौता बमोजिम निर्माण कम्पनीले अनुसरण गर्नुपर्ने सम्पूर्ण सुरक्षाका मापदण्ड, उपायहरू सूचना र जानकारी समेतको प्रबन्ध र अनुसरण गरी आयोजनाको नियमित सुपरिवेक्षण र निर्देशनमा निर्माण कार्य भइरहेकोमा उक्त गैँडाको निधनको विषयलाई लिएर निर्माण व्यवसायीलाई समेत आरोपित गरी गैर कानुनी रूपमा सम्बन्धित निकायबाट कारबाही अगाडी बढाइरहको प्रति यस महासंघको गम्भीर ध्यानाकर्षण भएको छ।'
निर्माण व्यवसायीलाई नियोजित रूपमा सो घटनामा आरोपित गरी झुटा लाञ्छना लगाई व्यवसायीहरूलाई मुछेर मानमर्दन गरिएको कार्य प्रति महासंघको गम्भीर आपत्ति रहेको जनाइएको छ। घटनाको बिना कुनै पूर्वाग्रह सत्य-तथ्य सार्वजनिक गर्न महासंघले माग गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787910498.jpg)
-1786602170.png)
-1786513116.png)
