काठमाडौं– पूजा सिंहलाई मधेसी महिलाबाट पहिलो पटक प्रहरी नायब महानिरीक्षक (डीआईजी) मा बढुवा गरेर प्रशंसनीय काम गरेको डाक्टरहरूले बताएका छन्।
बुधबार गृहमन्त्री बालकृष्ण खाणलाई मन्त्रालयमा भेटेर डाक्टरहरूको प्रतिनिधि मण्डलले मधेसको महिलाबाट सिंहलाई डीआईजी बनाउनु गृहमन्त्रीको प्रशंसनीय काम भएको भन्दै धन्यवाद दिएका हुन्।
पाटन स्वाथ्य विज्ञान प्रतिष्ठानका पूर्वउपकुलपति डा. भरत यादव, डा. अरुणकुमार सिंह, डा. अनुज सिंह, डा. शिव बस्नेत, सुधिरकुमार सिंह, दीपककुमार साह, निरजदेव जोशी, सञ्जीवकुमार मिश्रसहितको टोलीले गृहमन्त्री खाणलाई भेटेर सिंहलाई डीआईजीमा बढुवा गरेर सरकारले मधेसी महिलाको सम्मान गरेको र क्षमताको कदर गरेको बताएका हुन्।
‘सरकारले सिंहलाई डीआईजीपीमा बढुवा गरेर मधेसी महिलाको सम्मान गरेको छ। सिंहको क्षमताको कदर गरेको छ,’ गृहमन्त्रीसँगको भेटमा पूर्वउपकुलपति डा. यादवले भने।
यसअघि मंगलबार सप्तरी नेपाली कांग्रेसका केन्द्रीय सदस्य दिनेश यादवको नेतृत्वमा आएको टोलीले पनि सिंहलाई बढुवा गरेर गृहमन्त्रीले प्रशंसनीय काम गरेको भन्दै धन्यावाद दिएको थियो।
बुधबारै डाक्टरहरूको टोलीले भेट्नु अगाडि नेपाली कांग्रेस सिरहाका सभापति रामचन्द्र यादव नेतृतवको टोलीले पनि गृहमन्त्री खाणलाई भेटेर सिंहलाई डीआईजीपीमा बढुवा गरी मधेसको सम्मान गरेको बताएको थियो। सिंहले प्रहरी निरीक्षकबाट सेवा प्रवेश गरेकी थिइन्।
उनी प्रजातन्त्र सेनानी केदारप्रसाद सिंहकी आफन्तसमेत हुन्। सिंह एसएसपीमा पनि सिनियर थिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
