काठमाडौं– नेकपा माओवादी केन्द्रको महाधिवेशनमा प्रदेशका उपसभामुखसमेत सहभागी भएका छन्। तटस्थ बस्नुपर्ने उपसभामुख पार्टीको आठौं महाधिवेशनमा प्रतिनिधि भएर काठमाडौं आएका हुन्।
बाग्मती प्रदेश उपसभामुख राधिका तामाङ, कर्णाली प्रदेश उपसभामुख पुष्पा घर्ती र र सुदूरपश्चिम प्रदेश उपसभामुख निर्मला बडाल जोशी महाधिवेशनमा सहभागी भएको एक माओवादी नेताले बताए। कुनै दलमा आबद्ध नभई स्वतन्त्र बस्नुपर्ने उपसभामुख प्रतिनिधि बनेपछि पार्टीका अन्य नेताहरुले विरोध जनाएका छन्।
‘सभामुख/उपसभामुख हुँदा दल त्याग गरेर त्यो पदमा जानुपर्ने हुन्छ,’ माओवादीबाट प्रतिनिधि भई सहभागी एक नेताले भने, ‘तर, उपसभामुख भइसकेका व्यक्ति पार्टीको समेत प्रतिनिधि भएर आउनु भएको छ।’ उपसभामुखले आफ्नो पदको गरिमासमेत भुलेको ती प्रतिनिधिले गुनासो गरे।
बाग्मती प्रदेशकी उपसभामुख राधिका तामाङ भने आफूहरुलाई प्रतिनिधि बनाएर भोटसमेत हाल्ने व्यवस्था मिलाउनुपर्ने बताउँछिन्। ‘हामी दलबाट सभामुख/उपभामुखको जिम्मेवारीमा पुगेका हौं,’ नेपाललाइभसँग कुरा गर्दै तामाङले भनिन्, ‘त्यसो हुँदा हामीलाई प्रतिनिधि बनाएर महाधिवेशनमा बस्ने व्यवस्था गर्नुपर्छ।’
माओवादी कोटाबाट उपसभामुख भएकी प्रदेश १ की सरस्वती पोखरेल भने अनुपस्थित छिन्। आफू महाधिवेशनमा सहभागी नभएर विराटनगरमै रहेको पोखरेलले बताइन्।
माओवादीबाट सभामुख भएका लुम्बिनी प्रदेशका पूर्ण घर्ती, गण्डकीका सभामुख नेत्र अधिकारी भने अनुपस्थित छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
