शंकर पोखरेलसँग प्रचण्डको सहमति- पार्टी एकता गरेर गल्ती गरेका थिएनौं

महाधिवेशन विशेष

नेपाल लाइभ आइतबार, पुस ११, २०७८ १९:१८

काठमाडौं- नेकपा (माओवादी केन्द्र)का अध्यक्ष पुष्पकमल दाहाल 'प्रचण्ड'ले नेकपा (एमाले)सँग पार्टी एकता गरेर गल्ती नगरेको बताएका छन्। एमाले महासचिव शंकर पोखरेलको भनाइसँग आफू सहमत रहेको बताउँदै एकताको उद्देश्य सही रहेको बताए।

आज पार्टीको आठौँ राष्ट्रिय महाधिवेशनको उद्‍घाटन समारोहलाई सम्बोधन गर्दै उनले भने, 'म शंकर पोखरेलजीको कुरामा सहमत छु। हामीले पार्टी एकता गरेर गल्ती गरेका थिएनौं।'

उनले फेरि एकपटक आत्मसमीक्षा गर्न जरुरी भएको बताए। 'त्यत्रो सपना आफैंले भत्कायौं। हाम्रो उद्देश्य गलत थिएन। देशलाई स्थायित्व र समाजवादतर्फ लैजाने कुरा थियो,' उनले भने।

पोखरेलले जुन स्पिरिटमा कुरा राखे, त्यो आफूहरुले पनि चिन्तन मनन गर्नुपर्ने प्रचण्डको भनाइ थियो। एमालेमा पनि त्यसरी आत्मसमीक्षा हुने उनको अपेक्षा छ।

यसअघि शुभकामना मन्तव्य राख्दै एमाले महासचिव पोखरेलले एमाले-माओवादी केन्द्रको एकता जोगाउन नसकेकोमा पछुतो रहेको बताएका थिए। उनले एकताका लागि गरिएको प्रयास भने इमान्दार रहेको बताए।

‘एमाले र माओवादी केन्द्रबीच एकता गरेर बनाइएको नेकपा जोगाउन नसकेकोमा पछुतो छ। एकताका लागि गरेको प्रयास इमान्दार प्रयास थियो,’ पोखरेलको भनाइ थियो। उनले बलियो वामपन्थी शक्ति निर्माण गर्ने लक्ष्यसहित एउटै घोषणापत्रमा चुनाव लडेको उल्लेख गरेका थिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

कलाकार ऐरको निधन

आईपीएलमा पञ्जाबमाथि राजस्थानको शानदार जित

पूर्वराजालाई विश्वप्रकाशको चुनौती : चुनावबाट मत जितेर चाहेजस्तो व्यवस्था ल्याउनुहोस्