माओवादी महाधिवेशनमा पुगेर शंकर पोखरेलले भने– नेकपा एकता जोगाउन नसकेकोमा पछुतो छ

महाधिवेशन विशेष

नेपाल लाइभ आइतबार, पुस ११, २०७८ १७:३०

काठमाडौं– नेकपा एमालेका महासचिव शंकर पोखरेलले एमाले–माओवादी केन्द्रबीचको एकता जोगाउन नसकेकोमा पछुतो रहेको बताएका छन्। माओवादी केन्द्रको आठौं महाधिवेशनमा आइतबार शुभकामना दिन पुगेका पोखरेलले एकताका लागि गरिएको प्रयास भने इमान्दार रहेको बताए।

उनले भने, ‘एमाले र माओवादी केन्द्रबीच एकता गरेर बनाइएको नेकपा जोगाउन नसकेकोमा पछुतो छ। एकताका लागि गरेको प्रयास इमान्दार प्रयास थियो। ’

उनले बलियो वामपन्थी शक्ति निर्माण गर्ने लक्ष्यसहित एउटै घोषणापत्रमा चुनाव लडेको उल्लेख गरे। एउटै पार्टी निर्माण गर्ने अभियानको नेतृत्व गरेर अघि बढेपनि पूरा हुन नसकेको उनको भनाइ थियो।

उनले अन्य कुरामा फरक मान्यता भएपनि उत्पादन, आर्थिक–सामाजिक रुपान्तरण र राष्ट्रियताका मामलामा एकै ठाउँ उभिन जरुरी भएको बताए।

आफूले भर्खरै एउटा कूटनीतिज्ञको किताबमा ‘नेपालमा नियन्त्रित अस्थिरता’ सिर्जना गर्ने नीति रहेको उल्लेख भएको पढेको बताए। उनले भने, ‘मैले एउटा किताबमा नेपालमा नियन्त्रित अस्थिरता सिर्जना गर्ने नीति रहेको उल्लेख भएको पाएँ। हामीले सोच्नुपर्छ– हामी त्यसका शिकार भइरहेका त छैनौं?’

उनले समाजलाई बदल्ने हो भने विकास र समृद्धिको प्रश्नमा सवै दल एक ठाउँ उभिनुपर्नेमा जोड दिए। उनले नेपालमा एउटै पुस्ताले तीनवटै पुस्ताको नेतृत्व गरिरहेको बताए। उनले युगलाई बदल्न नसकेको उल्लेख गरे। क्रान्ति मात्र नभएर निर्माणको नायक हुनुपर्ने पोखरेलको भनाइ छ।

‘यहाँ अलिअलि व्यंग पनि चल्यो। अहिले हामी प्रतिपक्षमा छौं। यहाँ भएको सवालको जवाफ दिन म चाहान्नँ’, उनले भने, ‘यो महाधिवेशनको कार्यक्रम भएकाले जवाफ दिन चाहान्नँ।’

पोखरेलले 'जनयुद्ध'को क्रममा भएका घटनामा आफूले हिंसा होइन शान्तिको माध्यमबाट गर्नुपर्ने आवाज उठाएको दाबी गरे। पोखरेलले राज्यपुर्नसंरचनामा पनि आफू अघि सरेर बहसमा आएको बताए। उनले वाम आन्दोलन सही बाटोमा नहिँडेसम्म नेपाली समाजको रुपान्तरण नहुने दाबी गरे।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

पञ्चायतसँग गणतन्त्रलाई तुलना गरेर अस्थिरता मच्चाउने अपराधी हुन् : शंकर पोखरेल

पूर्व राजालक्षित गगनको टिप्पणी– अबको दशक मिल्काइसकेको पात्रको बारेमा छलफल गर्ने समय होइन

भारतमा मुस्लिम सम्पत्ति व्यवस्थापनसम्बन्धी विवादास्पद विधेयक पारित