काठमाडौं- नेकपा (माओवादी केन्द्र)का अध्यक्ष पुष्पकमल दाहाल 'प्रचण्ड'ले आफ्नो पार्टीको प्रथम राष्ट्रिय सम्मेलन नेतृत्व चयनमा मात्र सीमित नहुने बताएका छन्।
शनिबार विभिन्न सञ्चारमाध्यमका सम्पादकहरुसँगको छलफलमा उनले उक्त कुरा बताएका हुन्। नेकपा (एमाले)तर्फ लक्षित गर्दै उनले केही-केहीले गरेजस्तो नेतृत्व चयन गरेर सम्मेलन सकिने नहुने बताए। सम्मेलनमा विचार, राजनीति, जनजीविकादेखि जलवायु परिवर्तनको असरसम्मका कुरामा बहस हुने उनले दाबी गरे।
'केही केहीले गरेजस्तो नेतृत्व चयन गरेर महाधिवेशन वा सम्मेलन सकिने हाम्रो हुने छैन। विचारका कुरामा, राजनीतिका कुरामा, जनजीविकादेखि जलवायु परिवर्तनसम्मका असर र प्रभावमा हामी बहस गर्नेछौं,' प्रचण्डले भने।
अध्यक्ष प्रचण्डले पार्टीको राष्ट्रिय सम्मेलनको पूर्वसन्ध्यामा सम्पादकहरुलाई बोलाएर छलफल गरेका हुन्।
छलफलमा माओवादी नेताहरु नारायणकाजी श्रेष्ठ, कृष्णबहादुर महरा, पम्फा भुसाललगायत सहभागी छन्।
माओवादी केन्द्रको प्रथम राष्ट्रिय सम्मेलन भोलि (पुस ११) बाट सुरु हुँदै छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।