काठमाडौं– चितवनको भरतपुर महानगरपालिकामा निर्माण भइरहेको ‘गौतमबुद्ध अन्तर्राष्ट्रिय क्रिकेट रंगशाला’को जिम्मेवारीबाट हाँस्यकलाकार सीताराम कट्टेल (धुर्मुस) र कुञ्जना घिमिरे (सुन्तली) पछि हटेका छन्। धुर्मुस–सुन्तलीको संस्था ‘धुर्मुस सुन्तली फाउण्डेसन’ले भरतपुर महानगरपालिकालाई रंगशाला निर्माणको स्वामित्व लिन पत्र लेख्दै आफू रंगशालाको निर्माण कार्यबाट पछि हटेको बताएको छ।
फाउण्डेसनले महानगरलाई लेखेको पत्रानुसार आर्थिक संकलन हुन नसकेपछि सम्झौताअनुरुप रंगशाला निर्माणको जिम्मेवारी महानगरपालिकालाई हस्तान्तरण गर्न लागिएको हो।
फाउण्डेसनले महानगरलाई लेखेको पत्रमा कोरोना महामारीका कारण आर्थिक स्रोत जुटाउनमा समस्या भएपछि निर्माण कार्य सम्पन्न गर्न नसकेकाले महानगरलाई नै रंगशाला निर्माणको जिम्मेवारी दिइएको बताएको छ।
‘फाउण्डेशन र भरतपुर महानगरपालिकाबीच भएको सहमतिपत्रको बुँदा नम्बर ८ मा उल्लेख भएअनुसार विश्वव्यापी महामारी कोभिड– १९ का कारण विशेष परिस्थिति उत्पन्न भई आर्थिक स्रोत अभाव भएकाले तोकिएको समयमा रंगशाला निर्माण कार्य कठिनाइ भएको छ,’ फाउण्डेसनले महानगरलाई लेखेको पत्रमा भनिएको छ।
हाँस्यकलाकार धुर्मुस र सुन्तलीले २०७४ चैतमा सामाजिक सञ्जालमार्फत चितवनमा अन्तर्राष्ट्रियस्तरको रंगशाला निर्माण गर्ने घोषणा गरेका थिए। जसकालागि उनीहरुले विभिन्न माध्यमबाट आर्थिक सहयोग जुटाउने अभियान नै चालेका थिए। लामो समयसम्म देशविदेशबाट रंगशाला निर्माणका लागि आवश्यक आर्थिक संकलन समेत भएको थियो।
एक वर्षपछि १६ माघ २०७५ मा रंगशाला निर्माणको काम सुरु भएको थियो। रंगशाला निर्माणको काम सुरु भएयता पटक पटक धुर्मुस सुन्तली र उनीहरुको फाउण्डेसनले आर्थिक अभाव भएको र निर्माण सामग्री खरिददेखि निर्माण कार्यमै करोडौं ऋण लागेको बताउँदै आएका थिए।
गत भदौमा पनि उनीहरुले १६ करोड रुपैयाँ ऋण लागेको बताउँदै अब काम गर्न नसक्ने अवस्था आएको उल्लेख गरेका थिए। भदौबाटै रंगशाला निर्माणको काम ३५ प्रतिशत पूरा भएको दाबी गर्दै धुर्मुस सुन्तलीले हाललाई औपचारिक रुपमा निर्माण रोकेको समेत बताएका थिए। चौतर्फी ऋण भएको र निर्माण कार्यलाई अगाडि बढाउन पनि आय नभएको बताउँदै उनीहरुले रंगशाला निर्माणको कामलाई रोकेका थिए।
अहिले भने उनीहरुले औपचारिक रुपमै रंगशाला निर्माणको कामबाट हात झिकेका छन्। महानगरलाई पत्र लेख्दै उनीहरुले रंगशाला निर्माणको कामबाट पछि हटेका हुन्। भरतपुर महानगरपालिकासँग रंगशाला निर्माणको विषयमा भएको सम्झौताअनुसार अब रंगशाला महानगरको जिम्मामा हुनेछ। सम्झौताअनुसार विशेष परिस्थिति आएमा निर्माणकै क्रममा पनि स्वामित्व हस्तान्तरण गर्न सकिने उल्लेख थियो।
भरतपुर महानगरपालिका प्रमुख रेणु दाहालले कोरोना महामारीका कारण निर्माण सम्मन्न गर्न असहज परिस्तिथि सिर्जना भएकाले रंगशाला निर्माणको काम महानगरलाई हस्तान्तरणका लागि अनुरोध गरेकी थिइन्। महानगरको कार्यपालिकाको बैठकले निर्णय गरि आवश्यक प्रक्रिया अगाडि बढाएको उनले बताइन्।
विगत पाँच महिनादेखि रोकिएको कामलाई कि अघि बढाउन कि सम्झौताअनुसार महानगरलाई जिम्मेवारी सुम्पिन भनेपछि रंगशाला निर्माणको कामबाट धुर्मुस–सुन्तली पछि हटेका हुन्।
अब भने फाउण्डेसनले महानगरलाई बुझाएको विवरणको सरकारीस्तरबाट जाँचबुझ गरि मन्त्रालयमार्फत मन्त्रिपरिषद्मा पठाएर थप प्रक्रिया अघि बढाइने दाहालले बाएकी छिन्। रंगशाला निर्माणका लागि बाँकी काम बहुवर्षीय आयोजना अन्तर्गत रहेर बोलपत्र आह्वान गरी अघि बढाउनका लागि महानगरले संघीय सरकारलाई अनुरोध गरेको उनले उल्लेख गरिन्।
उनले भनिन्, ‘मन्त्रिपरिषद्ले जे निर्णय गर्छ सोही अनुसार काम गर्न हामी तयार छौं।' भरतपुर महानगरपालिकाको महत्त्वपूर्ण आयोजना भएकाले यसलाई निरन्तरता दिएर सम्पन्न गर्न आफू लागिपरेको दाहालको भनाइ छ।
महानगरपालिकाले नै त्रिभुवन र कृषि तथा वन विज्ञान विश्वविद्यालयसँग समन्वय गरेर सो जग्गा रंगशालाका लागि उपलब्ध गराएको हो। फाउण्डेशनले नेतृत्व गरेको भए पनि अधिकांश आर्थिक सहयोग जुटाउन महानगरपालिकाको प्रत्यक्ष भूमिका रहेको छ। महानगरले फाउण्डेसनलाई लेखेको पत्रमा भने निर्माण कार्यमा खर्च भएको १७ करोडभन्दा बढी ऋण तिर्न बाँकी रहेको समेत उल्लेख गरेको छ।
आर्थिक अभावका कारण विगत पाँच महिनादेखि रंगशाला निर्माणको काम हुनसकेको छैन। उधारो आर्थिक व्ययभार बढ्दै गएको र आर्थिक संकलन हुन नसकेको भन्दै काम रोकिएको हो। रंगशालाको भौतिक पूर्वाधारको ३५ प्रतिशत काम सकिएको फाउण्डेशनले दाबी गरेको छ।
रंगशालामा अहिलेसम्म ५४ करोड ६२ लाख २१ हजार रुपैयाँ खर्च भइसकेको यसअघि नै फाउण्डेशनले दाबी गरेको थियो। रंगशाला सम्पन्न गर्न तीन अर्ब रुपैयाँ हाराहारी खर्च हुने अनुमान गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768395492.png)
-1768391713.png)
-1764146706.png)
