काठमाडौं- आमनिर्वाचनमा नेपाली कांग्रेसले पराजय बेहोरेपछि ७ जना युवा नेताले २०७४ पुस १५ गते एउटा संयुक्त विज्ञप्ति जारी गरे।
विज्ञप्तिमा भनिएको थियो- ‘हामी विश्वास दिलाउन चाहन्छौं, हामी बदलिने छौं, कांग्रेसलाई बदल्नेछौं। राष्ट्रिय राजनीतिमा प्रमुख भूमिकाका साथ पार्टीलाई नयाँ उचाइमा पुर्याउनेछौं।’
ती नेताहरू थिए- गगन थापा, धनराज गुरुङ, विश्वप्रकाश शर्मा, चन्द्र भण्डारी, गुरुराज घिमिरे, प्रदीप पौडेल र बद्री पाण्डे। सातमध्ये गुरुङले उपसभापतिमा जितेका छन् भने थापा र शर्माले महामन्त्रीमा।
यसरी हेर्दा नेपाली कांग्रेसमा 'कांग्रेस बदल्ने' संकल्प लिएका नयाँ पुस्ताका नेताहरू पदाधिकारीमा प्रवेश पाएका छन्। प्रकाशमान सिंह र विमलेन्द्र निधिको वैशाखीमा सभापतिको कुर्सीमा शेरबहादुर देउवा उक्लेपनि बहुसंख्यक कांग्रेसजन परिवर्तनको पक्षमा देखिएको प्रमाण उनीहरुको प्रवेश हो।
यही समूहमा सुरुदेखि नै रहेका बद्री पाण्डे सहमहामन्त्रीका उम्मेदवार छन्। त्यसैगरी पछि जोडिएका रामकृष्ण यादव, जीवन परियार र कमला पन्त पनि विभिन्न कलस्टरमा सहमहामन्त्रीका प्रत्यासी हुन्। उनीहरु सबै विजय भएमा कांग्रेस पदाधिकारीमा यही समूहको दबदबा देखिनेछ।
त्यसो हुँदा गएको कार्यकाल मनमौजी चलाएका देउवाका आगामी चार वर्ष सकसपूर्ण बन्नेछन्। बदलिएका देउवा बन्न बाध्य हुनेछन्।
छुटेका सहयात्री
दुई जनाको कोटामा कुनैबेला यही समूहका रहेका महामन्त्रीका तेस्रो प्रत्यासी थिए प्रदीप पौडेल। कृष्णप्रसाद सिटौलाको राजनीतिक 'तिकडम'का शिकार बने, उनी।
१३औं महाधिवेशनमा सिटौलाको गुटबाट महामन्त्री लडेका गगन थापाले चुनावलगत्तै सिटौला छाडे। सिटौलाले सभापतिका लागि देउवा र रामचन्द्र पौडेलबीच भएको दोस्रो चरणको निर्वाचनमा देउवालाई समर्थन गरेपछि थापा रुष्ट बने। सिटौलासँग अलग्गिएर छुट्टै बसे। गत भदौदेखि पौडेल समूहमा औपचारिक रुपमा प्रवेश गरे। आफूलाई छाडेकोमा थापासँग सिटौलाको 'इगो' बढ्यो।
अर्का महामन्त्री विजेता विश्वप्रकाश शर्मासँग सिटौलाको सुरुदेखि नै राम्रो सम्बन्ध छैन। झापा एउटै गृहजिल्ला भएका उनीहरुको त्यहाँ फरक गुटको अभ्यास समेत छ। यसअघि शर्मा जिल्ला सभापतिमा सिटौलाले नै असहयोग गरेर हारेका थिए भने प्रतिनिधि सभाको निर्वाचनमा समेत सिटौलाले सहयोग नगरेको चर्चा कांग्रेसजनमा हुनेगर्छ।
यी दुई महामन्त्रीका उम्मेदवारप्रति रुष्ट सिटौलाले देखाइदिन यही समूह र विचारका प्रदीप पौडेललाई अघि सारे। देउवा गुटसँग मिलेर महामन्त्री उठाइदिए। बलियो गुट पाएका पौडेललाई महामन्त्री बन्ने लालसाले डोर्यायो। उनी हार्न पुगे। अहिलेलाई थापा, शर्मालगायतका नयाँ पुस्ताका नेताहरुसँगको सहयात्रा छुटेको छ। पराजयपछि भने उनले थापा र शर्मालाई सघाउने प्रतिक्रिया दिएका छन्। उनले भने, 'मतदाताले उहाँहरुलाई रोज्नुभयो। उहाँहरु चुनिनुभयो। अब म पार्टीमा उहाँहरुलाई सघाउँछु।'
यसैगरी, उपसभापतिमा पराजित भएर यही समूहका चन्द्र भण्डारी छुटेका छन्। गुरु घिमिरे प्रदेश १ को सभापतिमा पराजित भए। जिम्मेवारीबाट छुटेपनि बदल्ने समूहका सदस्यका रुपमा उनीहरु आगामी दिनमा पनि देखिनेछन्।
विश्वप्रकाश फर्किएलान्?
महामन्त्रीमै विजेता शर्माको आगामी भूमिका पनि उत्तिकै प्रतीक्षारत छ। कुनै समय 'एज होइन, अजेन्डा महत्त्वपूर्ण' भन्दै यो समूहबाट छुट्टिएर देउवाकहाँ पुगेका उनी महामन्त्रीको चुनावताका फर्किएका थिए।
संस्थापनइतरबाट सभापतिको दाबी गरेका प्रकाशमान सिंहको प्यानलमा उनी महामन्त्री बने। भोट माग्दा समेत उनले एउटा गगन थापा र अर्को आफूलाई भनेर यतैतिर पुगेको झल्को दिए। तर, सभापतिको दोस्रो चरणको निर्वाचनमा 'जता सिंह, उतै म' भनेर उतै फर्किएको संकेत दिएका छन्। आगामी दिनमा उनको प्रस्तुतिले कित्ता क्लिएर गर्नेछ।
शर्माले आफ्नो जित बदलिएको र बलियो कांग्रेस बनाउने आकांक्षाको जित रहेको बताएका छन्। यसबाट उनी परिवर्तनका पक्षमा उभिने संकेत भने गर्छ। उनले आफूले अझै मिहिनेत गर्नुपर्ने र संयम हुनुपर्ने जिम्मेवारी समेत जितले दिलाएको बताएका छन्।
मत दिनेहरुको मतको कदरका साथै नदिनेहरुको मनसमेत जित्नुपर्ने प्रयास आफूले गर्ने प्रतिबद्धता जनाएका छन्। उनले भने, 'जसको मत मैले जितें। त्यसको मतको कदर गर्नेछु। जसले मभन्दा फरक मत राख्नुभयो, उहाँहरुको मन जित्ने प्रयास गर्नेछु।'
२०७४ सालदेखि कहिले ७, कहिले ९ र कहिले १२ जना बनाएर देउवालाई दबाब सिर्जना गरिरहेका गगन थापा यो समूहको नेतृत्व लिनुपर्ने अवस्थामा आइपुगेका छन्। महामन्त्रीका रुपमा यो समूहको आवाज उनले अब पार्टी कमिटीभित्र बोल्नुपर्नेछ।
उनलाई हेक्का छ- मत धेरै पाउनु भनेको जिम्मेवारी पनि धेरै पाउनु हो। यसैगरी उनलाई भोट नदिएका १६०० जना महाधिवेशन प्रतिनिधिहरुको विश्वास समेत जित्नुपर्नेछ। साथै कांग्रेसलाई देखिने, सुनिने र भरोसा गर्न सकिने पार्टी बनाउने प्रतिबद्धता कायम राख्नुपर्नेछ।
मुख्य नेतृत्वका रुपमा देउवा दोहोरिएका छन्। यति भने ढुक्क भएको छ- विगतको कार्यशैली दोहोर्याउन भने देउवालाई यो समूहले दिनेछैन। हेर्न रुचिकर हुनेछ- पार्टी 'बदल्ने समूह' उनीहरु देउवालाई कसरी बदल्लान्?
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764170040.png)
-1764146706.png)
-1763721444.png)
-1763559424.jpg)
-1764080971.png)
