काठमाडौं– पोखराको मणिपाल अस्पतालमा साझेदारी मिलाइदिने भन्दै डाक्टरबाटै ५० लाख रुपैयाँ ठगी गर्ने भारतीय नागरिक शिवम् विरुमुथु पुर्पक्षका लागि जेल चलान भएका छन् ।
काठमाडौं जिल्ला अदालतको आदेशपछि उनलाई डिल्लीबजार कारागार चलान गरिएको महानगरीय प्रहरी परिसर काठमाडौंका एसपी तथा प्रवक्ता दिनेशराज मैनालीले बताए । विरुमुथुले रेडक्रसको अन्तर्राष्ट्रिय कमिटी (आईसीआरसी)को निर्देशक भएको मणिपाल अस्तालमा साझेदारी मिलाइदिने भन्दै एक डाक्टरबाट मात्रै ५० लाख रुपैयाँ ठगी गरेका थिए।
त्यसैगरी अर्का एक व्यक्तिलाई मलेसियन कम्पनी योङ लियानको डाइरेक्टर बनाइदिने भन्दै ३९ लाख रुपैयाँ ठगी गरेका थिए। भारतको चेन्नई घर भई काठमाडौंको बालुवाटार बस्दै आएका ४४ वर्षीय विरुमुथु मणिपाल अस्पताल खरिद गर्ने भारतीय सेयर होल्डरसँग कुराकानी भई सम्झौताका लागि मस्यौदा समेत तयार भइरहेको भनेर झुटा कागजात र कुराकानी तयार गरी विभिन्न व्यक्तिलाई अस्पतालमा पार्टनरसिपको प्रलोभन देखाई ठगी गरेका थिए।
विरुमुथुले व्यक्तिले विभिन्न व्यक्तिलाई प्रलोभनमा पारी उनीहरुको स्वामित्वमा रहेको जमिनको लालपुर्जासमेत आफ्नो नियन्त्रणमा लिइ ठगी गरेको समेत फेला परेको छ।
उनले एनएमबी बैंकमा मात्रै १५ प्रतिशत सेयर रहेको भनेर कागजातसमेत बनाउन लगाएका थिए । मलेसियन कम्पनी योङ लियानको एनएमबी बैंकका १५ प्रतिशत सेयरको रहेको थियो । सोही अनुसार विरुमुथुले आफू योङ लियानको डाइरेक्टर भएको र आफूलाई सम्बोधन गरेर सेयर रहेको भन्ने कागजात बैंकलाई बनाउनसमेत लगाएका थिए।
बैंकका कर्मचारी सञ्जीव महर्जनको हस्ताक्षरमा उक्त काजगात पाइएपछि उनीविरुद्ध पनि पक्राउ पूर्जी जारी भएको छ। हाल उनी फरार छन्। उनीसँगै विरुमुथुकी श्रीमती आस्मा केसीविरुद्ध पनि पक्राउ पूर्जी जारी भएको छ। विरुमुथुविरुद्ध ठगी र कीर्तेमा प्रहरीले मुद्दा चलाएको छ।
विरुमुथु यसअघि २०७२ सालमा पक्राउ परी २ वर्ष जेल बसेका थिए। २ वर्ष कैद र ३५ हजार जरिवाना तिरेर रिहा भएका उनी त्यसबेला पनि ठगी मुद्दामा पक्राउ परेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
