काठमाडौं- नेपाली कांग्रेसको नेतृत्व गरिरहेका र अर्को कार्यकालको निम्ति नेतृत्वकै आकांक्षा गरिरहेका सभापति शेरबहादुर देउवा नेपाल विद्यार्थी संघ (नेवि संघ)बाट राजनीतिमा आएका हुन्। २०२८ सालमा नेवि संघको सभापति बनेका देउवाले त्यही 'शक्ति'बाट कांग्रेसमा आफ्नो पकड बनाए।
देउवा मात्र होइन, कांग्रेसको सभापति दाबी गरिरहेका रामचन्द्र पौडेल, विमलेन्द्र निधि र कल्याण गुरुङसमेत नेवि संघबाट पार्टी राजनीतिमा उक्लिएका नेता हुन्।
सभापतिका आकांक्षी पौडेल २०२३ सालमा सरस्वती क्याम्पसका विद्यार्थी युनियन सभापति निर्वाचित भएका थिए। २०२७ सालमा नेपाल विद्यार्थी संघको स्थापनामा पौडेलको समेत महत्वपूर्ण भूमिका छ र विपिन कोइराला सभापति भएको उक्त समितिका उनी संस्थापक केन्द्रीय सदस्य हुन्।
त्यसपछि २०२८ सालमा भएको दोस्रो महाधिवेशनमा देउवा सर्वसम्मत सभापति बनेका हुन्।
कांग्रेस सभापतिका अर्का आकांक्षी विमलेन्द्र निधि २०३६ सालमा भएको तेस्रो महाधिवेशनबाट सर्वसम्मत रुपमा सभापति बने। यसैगरी अध्यक्षमै उम्मेदवारी घोषणा गरेका कल्याण गुरुङ पनि नेवि संघ पुस्ताकै नेता हुन्। उनी कांग्रेस विभाजन गरेर शेरबहादुर देउवाले नेपाली कांग्रेस (प्रजातान्त्रिक) गठन गरेपछि सो पार्टीको विद्यार्थी संगठनको सभापति बनेका थिए।
महामन्त्रीमा पनि ‘नेवि संघ पुस्ता’कै वर्चस्व
सभापतिमा मात्र होइन, कांग्रेसको अर्को महत्त्वपूर्ण पद महामन्त्रीमा दाबी गर्नेमा पनि नेवि संघबाटै नेता बनेकाहरुको वर्चस्व छ। २०४४ सालमा भएको पाँचौ महाधिवेशनबाट सर्वसम्मत नेवि संघ सभापति बनेका वर्तमान गृहमन्त्री बालकृष्ण खाणले महामन्त्री दाबी गरेका छन्।
उनीपछि २०४८ सालमा भएको महाधिवेशनबाट नेवि संघ सभापति जितेका एनपी साउद पनि सभापति देउवाको प्यानलबाट महामन्त्रीको आकांक्षा दर्शाइरहेका छन्।
२०३९ सालमा नेवि संघको तदर्थ समितिको नेतृत्व गरेका ज्ञानेन्द्रहादुर कार्की महामन्त्रीका अर्का प्रत्यासी हुन्। २०४० सालमा नेवि संघको सभापति ताकेका तर, हुन नपाएका डा प्रकाशहरण महत महामन्त्रीका अर्का दाबेदार हुन्।
देउवा प्यानलबाटै महामन्त्रीको दाबी गर्ने विश्वप्रकाश शर्मा पनि नेवि संघका निर्वाचित सभापति हुन्। २०५७ सालमा भएको आठौँ महाधिवेशनमा उनी नेवि संघ सभापति निर्वाचित भएका हुन्।
स्थापनइतरबाट गगन थापा र प्रदीप पौडेलले महामन्त्रीमा उम्मेदवारी दिने घोषणा गरेका छन्। दुवैको नेताका रुपमा जन्म नेवि संघबाटै भएको हो। महामन्त्रीका बलिया दाबेदार मानिएका थापा २०५९ साल देखि २०६१ सालसम्म नेवि संघको महामन्त्री थिए।
यसैगरी २०६४ सालमा भएको १० औं महाधिवेशनबाट नेवि संघको सभापति बनेका प्रदीप पौडेल महामन्त्रीकै दाबी गरिरहेका छन्।
यसैगरी सहमहामन्त्री घोषणा गरेका बद्री पाण्डे र रञ्जित कर्ण पनि विद्यार्थी राजनीतिबाट उदाएका नेताहरु हुन्। पाण्डेले पिछडिएको क्षेत्र र कर्णले मधेशी कोटाबाट सहमहामन्त्रीको दाबी गरिरहेका छन्।
नेवि संघबाट को-को उक्लिन खोज्दैछन् पार्टी नेतृत्वमा?
नेपाली कांग्रेसको चौधौं महाधिवेशनबाट पनि धेरै विद्यार्थी नेताहरु आफूलाई पार्टीका नेता बनाउने तयारीमा छन्। नेवि संघका विभिन्न पदमा रहेर काम गरेका र गरिरहेकाहरुले आगामी महाधिवेशनबाट पार्टी केन्द्रमा उक्लिने आकांक्षा राखेका हुन्।
नेवि संघका वर्तमान अध्यक्ष राजीव ढुंगानाले विद्यार्थी राजनीतिबाट पार्टी राजनीतितर्फ जाने घोषणा गरेका छन्। उनकै कार्यसमितिका उपाध्यक्ष तुलसा पन्त, महामन्त्रीहरु उर्मिला थपलिया र दीपक भट्टराई पनि पार्टी केन्द्रीय सदस्यमा उठ्ने बताउँछन्।
नेवि संघका पूर्वअध्यक्ष नैनसिंह महराले केही महिनाअघि नै केन्द्रीय सदस्यमा उम्मेदवारी रहने घोषणा गरेका थिए। पूर्वउपाध्यक्ष प्रमोदहरि गुरागाईं, डिल्लीराम सुवेदी, कृष्णकुमारी बस्नेतले केन्द्रीय सदस्यका लागि भोट माग्न थालेको केही महिना बितिसकेको छ।
पूर्वमहामन्त्रीहरू प्रतिमा गौतम, कुन्दन काफ्ले, मनोजमणि आचार्य पनि केन्द्रीय सदस्यका आकांक्षी छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1668178073.jpg)
