काठमाडौं- नेपाली कांग्रेसको महाधिवेशनमा साझा उम्मेदवारका लागि दबाब दिन संस्थापनइतरका युवा नेताहरु छलफलमा जुटेका छन्।
सभापतिका आकांक्षीहरु प्रकाशमान सिंह निवासमा छलफल गरेर भोलि बिहान टुङ्ग्याउने गरी उठ्दै गर्दा युवा नेताहरु छुट्टै छलफलका लागि बत्तीसपुतली पुगेका थिए।
अनुपम फुडल्याण्डमा युवा नेताहरूको अलग्गै छलफल गरेर शीर्ष नेताहरुलाई दबाब दिने तयारी गरेका छन्। उनीहरुले उक्त छलफलमा सहभागी हुन वरिष्ठ नेता रामचन्द्र पौडेललाई पनि निम्तो दिएका छन्।
बैठकमा चन्द्र भण्डारी, दीपक गिरी, गगन थापा, जीवन परियार, बद्री पाण्डे, रामचन्द्र यादव, गुरुराज घिमिरे, रत्ना शेरचन र सरिता प्रसाईं छन्। सभापतिका लागि वरिष्ठ नेता पौडेलसहित महामन्त्री डा शशांक कोइराला, पूर्वमहामन्त्री प्रकाशमान सिंह र केन्द्रीय सदस्य शेखर कोइराला आकांक्षी छन्।
चाक्सीबारीमा भएको छलफलमा शशांकले दाबी छोडेको भनेका छन् भने प्रकाशमान र शेखरले दाबी गरिरहेका छन्। पौडेल पनि आकांक्षी भएकाले उनीहरुले साझा उम्मेदवार तय गर्न भोलि बिहान पुन: बैठक बोलाइएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।