काठमाडौं– खेलाडी वर्गीकरणको विषयमा असन्तुष्टि जनाउँदै सञ्चारमाध्यममा अभिव्यक्ति दिएका कप्तान ज्ञानेन्द्र मल्लसहित चार खेलाडीले नेपाल क्रिकेट संघ (क्यान)लाई दोस्रोपटक स्पष्टीकरण बुझाएका छन्।
संघविरुद्ध वक्तव्यबाजी गरेको भन्दै क्यानले कप्तान मल्लसहित उपकप्तान दीपेन्द्रसिंह ऐरी, सोमपाल कामी र बलर कमलसिंह ऐरीलाई स्पष्टीकरण सोधेको थियो।
खेलाडीले पहिलोपटक बुझाएको स्पष्टीकरणमा क्यानलाई दोषी देखाएकाले पुनः सोधिएको कार्यवाहक सचिव प्रशान्तविक्रम मल्लले बताए। उनका अनुसार चार खेलाडीले बिहीबार दोस्रोपटक स्पष्टीकरण बुझाएका छन्। ‘यस विषयमा हामीले स्पष्टीकरण सोधेका थियौं। खेलाडीहरूले स्पष्टीकरणको जवाफमा उल्टै क्यानलाई दोषी देखाएका छन्,’ उनले नेपाल लाइभसँग भने, ‘त्यसैले दोस्रोपटक स्पष्टीकरण सोधिएको थियो। उक्त स्पष्टीकरण आज आएको छ। अब अध्ययन गर्न बाँकी छ।’
खेलाडीहरूलाई वर्गीकरणको विषयमा चित्त नबुझे क्यानसँग सिधै समन्वय गर्न सकिने व्यवस्था रहेको उनको जिकिर छ। उनले त्यो बाटो हुँदाहुँदै खेलाडीले सार्वजनिक रूपमा नै बोल्नु गलत रहेको दाबी गरेका छन्।
कार्यवाहक सचिव मल्लको संयोजकत्वमा गठित ५ पाँच सदस्यीय समितिले खेलाडीले बुझाएको स्पष्टीकरणमा अध्ययन गर्नेछन्।
समितिमा कोषाध्यक्ष रोशनकुमार सिंह, महाप्रबन्धक रौनक मल्ल र क्रिकेट म्यानेजर विनोद दास रहेका छन्।दोस्रोपटकको स्पष्टीकरणको जवाफ चित्त नबुझे आन्तरिक छलफलपछि अन्तर्राष्ट्रिय क्रिकेट परिषद् (आईसीसी)सँग समन्वय गर्दै क्यानको अधिकार प्रयोग गर्ने सचिव मल्लले बताए।
क्यानले सार्वजनिक गरेको वर्गीकरणमा खेलाडीहरूको असन्तुष्टि बाहिरै आएको थियो। नयाँ सम्झौतामा सोमपाल कामीलाई ‘बी’ ग्रेडमा राखिएको छ भने रोहितकुमार पौडेल वर्गीकरणमै परेका छैनन्। यता, गुल्सन झा पनि वर्गीकरणमा अटाएका छैनन्। उता, कमलसिंह ऐरीले आफूलाई ‘सी’ ग्रेडमा राखिएपछि असन्तुष्टि जनाएका थिए।
वर्गीकरणका क्रममा खेलाडीको श्रेणी निर्धारणमा गडबड गरेको भन्दै केही खेलाडीले सम्झौतामा हस्ताक्षर गर्नसमेत अस्वीकार गरेका थिए। क्यानले सन् २०२१ को सम्झौता वर्षको सुरूमै गर्नुपर्नेमा वर्ष सकिनलाग्दा गरेको थियो।
वर्गीकरणअनुसार ‘ए’ श्रेणीमा रहेका क्रिकेटरले मासिक ५० हजार, ‘बी’ श्रेणीका क्रिकेटरले मासिक ४० हजार र ‘सी’ श्रेणीका क्रिकेटरले मासिक ३० हजार रुपैयाँ पाउँदै आएका छन्। सुरूमा वर्गीकरणमा ढिलाइ र अहिले खेलाडीको असन्तुष्टिका कारण राष्ट्रिय क्रिकेट खेलाडीले गत मार्चपछिको मासिक तलब पाएका छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779255893.png)
-1764146706.png)
