कप्तान मल्लसहित चार खेलाडीले क्यानलाई बुझाए स्पष्टीकरण

क्रिकेट

नेपाल लाइभ बुधबार, मंसिर ८, २०७८ १९:५९

काठमाडौं- खेलाडी वर्गीकरणको विषयमा असन्तुष्टि जनाउँदै सञ्चारमाध्यममा अभिव्यक्ति दिएका कप्तान ज्ञानेन्द्र मल्लसहित चार खेलाडीले नेपाल क्रिकेट संघ (क्यान)लाई स्पष्टीकरण बुझाएका छन्।

कार्यवाहक सचिव प्रशान्तविक्रम मल्लका अनुसार मल्लसहित उपकप्तान दीपेन्द्रसिंह ऐरी, सोमपाल कामी र बलर कमलसिंह ऐरीले स्पष्टीकरण बुझाएका हुन्।

गत सोमबार सचिव मल्लले सामाजिक सञ्जालमा एक पत्र पठाउँदै कप्तान मल्ल, उपकप्तान ऐरी, अलराउण्डर कामी र तीव्र गतिका बलर ऐरीसँग स्पष्टीकरण मागेका थिए।

उनीहरुलाई आज (बुधबार)सम्म लिखित स्पष्टीकरण दिन क्यानले समय दिएको थियो। ‘खेलाडीले पत्रहरु पठाएका छन्। त्यसमा अध्ययन गर्नेछौं। अध्ययनपछि अन्य कार्य अघि बढ्नेछ,’ मल्लले भने।

कार्यवाहक सचिव मल्लको संयोजकत्वमा गठित ५ पाँच सदस्सीय समितिले खेलाडीले बुझाएको स्पष्टीकरणमा अध्ययन गर्ने छन्।

समितिमा कोषाध्यक्ष रोशनकुमार सिंह, महाप्रबन्धक रौनक मल्ल र क्रिकेट म्यानेजर विनोद दास रहेका छन्। क्यानले सार्वजनिक गरेको वर्गीकरणमा खेलाडीहरूको असन्तुष्टि बाहिरै आएको थियो।

नयाँ सम्झौतामा सोमपाल कामीलाई ‘बी’ ग्रेडमा राखिएको छ भने रोहितकुमार पौडेल वर्गीकरणमै परेका छैनन्। यता, गुल्सन झा पनि वर्गीकरणमा अटाएका छैनन्।

उता, कमलसिंह ऐरीले आफूलाई ‘सी’ ग्रेडमा राखिएपछि असन्तुष्टि जनाएका थिए।

वर्गीकरणका क्रममा खेलाडीको श्रेणी निर्धारणमा गडबड गरेको भन्दै केही खेलाडीले सम्झौतामा हस्ताक्षर गर्नसमेत अस्वीकार गरेका थिए।

क्यानले सन् २०२१ को सम्झौता वर्षको सुरूमै गर्नुपर्नेमा वर्ष सकिनलाग्दा गरेको थियो।

वर्गीकरणअनुसार ‘ए’ श्रेणीमा रहेका क्रिकेटरले मासिक ५० हजार, ‘बी’ श्रेणीका क्रिकेटरले मासिक ४० हजार र ‘सी’ श्रेणीका क्रिकेटरले मासिक ३० हजार रुपैयाँ पाउँदै आएका छन्।

सुरूमा वर्गीकरणमा ढिलाइ र अहिले खेलाडीको असन्तुष्टिका कारण राष्ट्रिय क्रिकेट खेलाडीले गत मार्चपछिको मासिक तलब पाएका छैनन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

पाकिस्तानको साम्प्रदायिक हिंसामा ३२ जनाको मृत्यु

रसुवाका तीनवटा आयोजनाबाट राष्ट्रिय प्रसारण प्रणालीमा थपियो १६८ मेगावाट विद्युत

सार्क मुलुकका पर्यटकको आकर्षण बन्दै ‘हट एयर बेलुन’